PATUDI tumona muntu utudi banange usama ne ufua, bidi bitutonda bikole. Tutu tudila patudi tufuisha. Kadi, bidi bitukolesha ku muoyo patudi tumanya ne: Yehowa Nzambi udi umvua kanyinganyinga ketu. Mmusue kabidi kuenza mudimu ne bukole buende buonso bua kubisha bafue. Mona ditekemena didi mu mêyi a Yobo adi mu mukanda wa Yobo 14:13-15.

Tumona nsombelu uvua nende Yobo. Yobo uvua ne ditabuja dikole; wakapeta ntatu mikole, kujimijaye bintu biende, kufuisha bana bende bonso ne kupetaye disama dikole. Pavua Yobo mu lutatu lukole elu, wakasengelela Nzambi ne: “Nakadi kusua bua wewe unsokoke mu Muaba wa Bafue.” (Mvese wa 13) Yobo uvua umona Muaba wa Bafue bu muaba wa dikisha. Uvua ne bua kuikala anu bu tshiuma tshisokoka kudi Nzambi mu Muaba wa Bafue; kavua ne bua kukenga kabidi to. *

Yobo uvuaku mua kushala kashidi mu Muaba wa bafue anyi? Kavua wela meji nanku to. Udi utungunuka ne kulomba Nzambi ne: ‘Bua wewe unsunguile tshikondo tshijalame ne bua wewe umvuluke!’ Yobo uvua mutekemene ne muoyo mujima ne: kavua mua kushala mu Muaba wa bafue kashidi to, Yehowa uvua ne bua kumuvuluka. Yobo wakafuanyikija matuku avuaye ne bua kuenza mu Muaba wa bafue ne tshikondo tshia ‘kuluangana mvita’ anyi tshia kuindila ne muoyo mujima. Bua matuku anga? Udi wamba ne: ‘Too ne palua tshikondo tshia kundekelela.’ (Mvese wa 14) Kumulekelela kudi kumvuija kumupatula mu Muaba wa bafue, tuambe ne: kumubisha ku lufu!

Bua tshinyi Yobo uvua mutuishibue ne: neabike ku lufu? Bualu uvua mumanye mudi Mufuki wa dinanga umvua padi batendeledi bende badi bamulamate bafua. Yobo udi wamba ne: ‘Wewe wakadi kumbikila ne meme ngakadi kuitaba kuudi; wewe wakadi kunjinga, meme mudimu wa bianza biebe.’ (Mvese wa 15) Yobo uvua mumanye ne: Uvua tshifukibua tshia Nzambi. Nzambi uvua mumupeshe muoyo ne mumufuke munda mua mamuende ke uvua kabidi ne bua kumubisha pavuaye ufua.​—Yobo 10:8, 9; 31:15.

Mêyi a Yobo adi atulongesha ne: anu muvua Yehowa munange Yobo, ke mudiye kabidi munange bikole bantu badi bamueyemena, badi basue bua abafumbe ne abalengeje bua kuluabu bantu badi bamusankisha. (Yeshaya 64:8) Yehowa mmunange batendeledi bende badi bamulamate. Kadi bua aba bakadi bafue udi ‘ubajinga’ bikole. Mumanyi mukuabu wa Bible udi wamba ne: muaku wa tshiena Ebelu udibu bakudimune ne: ‘kujinga’ udi uleja “dîyi dia kueyemena dia mu mêyi a bukole adi muntu mua kuamba bua kuleja dijinga dikole didiye nadi.” Yehowa kena anu uvuluka batendeledi bende patupu to, kadi mmusue kabidi kubabisha.

Diakalenga, mu mukanda wa Yobo, (umue wa ku mikanda ya kumpala ivuabu bufunde), Yehowa mmulejamu dijinga diende dia kubisha bantu ku lufu. * Mmusue bua numonangane kabidi ne bananga bebe bakadi bafue. Bualu ebu budi mua kukusulakaja paudi ufuisha. Kuenaku mua kulonga malu a bungi adi atangila Nzambi wa dinanga eu anyi? mmunyi muudi mua kuitaba bua Nzambi akufumbe bua ulue mukumbane bua kumona muakumbana malu adiye mulaye?