“Wunafwili”
Kundamenu Kwakwihi Nanzambi
“Wunafwili”
KUMUCHIMA kwakataña hakumona muntu itwakeña nakukabakana nkumininaku yofwa nikufwa. Twadiilaña neyi tunafwishi muntu itwakeña. Hela chochu, twazañalalaña hakwiluka netu Nleñi yetu Yehova Nzambi weluka chitwatiyaña neyi tunaneñi. Kubombelahu wafwilaña kuzatisha ñovu jindi jabadika kulonda yakasañuli afu. Talenu kuchiñeja kwekala mumazu aYoba, asonekawu hamukanda waYoba 14:13-15.
Talenu yuma chiyidi. Yoba muntu washinshika chikupu, wahitili mukweseka kwasweja, wajimbesheli mahetindi, wafwishili anyanindi ejima, nawa wakatili nankashi. Hamuloña wayihuñu yaswejeli, walombeli kudi Nzambi nindi: “Mutenowu wadi kunsweka mukaluña.” (Vasi 13) Yoba welukili nindi Mukaluña dimwatela kunookelayi. Neyi yaya mukaluña wukwikala neyi maheta aswekawu kudi Nzambi, dichi hanateli kukabakanaku. *
Komana Yoba wakekala Mukaluña haya nyaka? Yoba hakuhweleleli muniyi njilaku. Watwalekahu nakulomba nindi: “Mutenowu . . . wadi kuntoñwela mwaka wami kulonda wakañanuki.” Yoba wakuhweleleli nindi wakashakama Mukaluña kapinji kantesha nawa nindi Yehova hamba kamuvulamenaku. Yoba wesekejeli mpinji yakekalayi Mukaluña “namafuku anjita,” mafuku atanjikawu kuhembelela. Wukahembelela kushika kumwakanyi? Wahosheli nindi, “Nichinakabalumuka hinidi wacheñi [nichikashika mpinji yami yakukasunuka].” (Vasi 14) Kukasunuka kweniku kwalumbuluka kufuma Mukaluña, munjila yikwawu hikusañuka kufuma mudi afu.
Muloñadi Yoba chakuhweleleliyi nindi wakakasunuka? Muloña welukili chatiyañayi Nleñi yetu wukweti kukeña hadi akwakudifukula Indi ashinshika afwa dehi. Yoba wahosheli nindi: “Wadi kutambika, ami nadi kwitiya; wunafwili mudimu wakumakaseyi.” (Vasi 15) Yoba welukili nindi amuleñeli kudi Nzambi. Mukwakuhana Wumi wamuleñeli Yoba mwivumu nateli kumusañula cheñi neyi yafwa.—Yoba 10:8, 9; 31:15.
Mazu aYoba atudizishaña nawu Yehova wukweti luwi: Wayikeña nankashi antu adi neyi Yoba adihanaña aweni mumakasindi kulonda yayifumbi nikuyolola hakwila ekali antu asweja kukeñewa kumesu indi. (Isaya 64:8) Yehova walemesha akwakudifukula indi ashinshika. ‘Wafwilaña’ kusañula antu jindi ashinshika afwa dehi. Kadizi wumu wahosheli nindi, izu dachiHeberu dazatishawu “chakadi nikujina hiizu dakola damwekeshaña chikupu chafwilañayi muntu mumuchima.” Eñañi, Yehova hakuminaña dakwanuka akwakudifukula indi ashinshikaku ilaña wafwilaña cheñi kuyisañula.
Kafwampi mukanda waYoba, wekala hanyikanda yamuBayibolu yatachi kusoneka, wamwekeshaña nkeñelu yaYehova yakusañula afu. * Wakeñaña mwakekali cheñi nawantu imwakeña afwa dehi. Awa mazu akuyikwasha kuumika neyi munafwishi. Komana kwila mudiza nsañu yayivulu yahosha hadi Nzambi wukweti kukeña nichimwatela kumwiteja yayifumbi kulonda mwikali antu akamona chakashikijayi nkeñelu Yindi nehi?
[Tumazu twaheshina]
^ Mukanda wumu wahosha nawu mazu aYoba, akwila nawu ‘nsweki’ anateli kulumbuluka cheñi nawu “kunsweka kumbadi neyi chuma chalema wuseya.” Mukanda wukwawu wahosha nawu awa mazu atalisha mukwila nawu “nsweki neyi maheta.”
^ Hakwila nawu mudizi yuma yayivulu yahosha hayikaninu yamuBayibolu yakusañukila mwituña dadiha daloña, talenu kapetulu 7 kamukanda waChumanyi Chacheni Chatañishaña Bayibolu? wasonekawu kudi aYinsahu jaYehova.