Sud Machiegni gi Nyasaye
Sud Machiegni gi Nyasaye
‘Chunyi Noher’
EN GIMA lit ahinya neno ng’at mihero kasandore kae to tho. Pile wajokuyo ka mano otimore. Kata kamano, en gima hoyo chunywa ng’eyo ni Jachwechwa Jehova Nyasaye ong’eyo kuyo ma wabedogo. E wi mano, ogombo tiyo gi teko mogundho ma en-go mondo oduok jogo mosetho obed mangima. Ne ane geno mochiw e weche ma Ayub nowacho mondiki e Ayub 14:13-15.
Par ane chal ma ne nitie. Ayub, ng’at ma ne nigi yie makende kalo e tembe malit ahinya—moriwo lalo mwandune, lalo nyithinde duto e tho, koda tuwo makelo rem ahinya. E bwo chandruoge malit ahinyago, noywak ne Nyasaye niya: “Mad ipandae e liel!” (Kwan matindo 13) Ayub ne neno ni ne ibi gonye owuog e chandruogene ka otho ma oike e liel. Ei liel, nobiro bet kaka mwandu ma Nyasaye opando, kendo ne ok obi yudo chandruok kata rem moro amora. *
Be en adier ni Ayub ne dhi siko e liel? Ayub ne ong’eyo ni ooyo. Ne odhi nyime lemo kama: “Mad ichikae ndalo mong’ere, kendo para!” Ayub ne nigi adier kogeno ni obiro bet e liel kuom kinde machuok kendo ni wi Jehova ok ne dhi wil kode. Ayub kawo ni kinde ma ne odhi bedogo e liel ne en kinde mag rito mochune. Nodhi rito kuom kinde maromo nade? Owacho ni, “nyaka wach magonya obi.” (Kwan matindo 14) Gony ma ne odhi yudo ne dhi gole oa e liel—matiendeni ne idhi chiere a kuom jomotho!
Ang’o momiyo Ayub ne nigi adier ni ne idhi gonye? Nikech nong’eyo kaka Jachwechwa ma jahera gombo chiero jogo mosetho to ne lame gadier. Ayub wacho niya: ‘Niluong nyinga eka naduoki wach: Chunyi noher tich mar lweti.’ (Kwan matindo 15) Ayub nong’eyo ni en tij lwet Nyasaye. Onge kiawa ni Jachiw Ngima ma nochueyo Ayub kane pod en e ich, ne nyalo miye ngima kendo bang’ tho.—Ayub 10:8, 9; 31:15.
Weche mag Ayub nyisowa wach moro kuom ng’wono mar Jehova: Ohero e yo makende ji kaka Ayub, maketo ngimagi e lwete, kendo weyo mondo ochuegi kolosogi gibed jo mabeyo e wang’e. (Isaiah 64:8) Jehova ogeno jogo malame gadier. ‘Ohero’ kata ogombo chiero jogo ma nosetho to ne omakore kode. Jasomo moro wacho ni wach motigono e dho-Hibrania ni “doher,” en ‘wach mitiyogo e nyiso e yo mapek gombo motegno ma ng’ato bedogo e chunye mar timo gimoro.’ Ee, Jehova ok par apara jogo mosetho to ne lame, to bende ogombo duokogi gibed mangima kendo.
En gima ber ni e bug Ayub—achiel kuom buge Muma ma ne ondik mokwongo—Jehova noneno ni en gima owinjore nyiso dwache mar chiero jomotho. * Odwaro riwi kendo gi jogo mihero mosetho. Genono nyalo miyo nyagruok gi kuyo obed mayot matin. Donge diber ka ipuonjori weche momedore kuom Nyasaye ma jaherani koda kaka inyalo timo mondo iwe ochueyi ibed gi kido mar ng’at mabiro neno dwaro mare kachopo gadier?
[Weche moler piny]
^ par. 4 Buk moro wacho ni wach ma Ayub nowacho ni, ‘ipanda,’ tiende nyalo bedo “kana kama ayudoe rit maber kaka mwandu ma nengone tek.” Buk moro to wacho ni wachno tiende nyalo bedo “panda kaka ipando mwandu.”
^ par. 8 Mondo ipuonjri weche momedore e wi singo mar Muma mar chiero joma otho odag e piny makare manyien, ne sula mar 7 mar buk miluongo ni Ang’o ma Muma Puonjo Kuom Adier? mogo gi Joneno mag Jehova.