“I Kut Hnathawh I Ngaina”
Pathian Hnaih Rawh
“I Kut Hnathawh I Ngaina”
KAN hmangaih tak tuemaw hrehawm tuara a thi han hmuh chu tawrh a har ṭhîn ngei mai. Chutiang hunah chuan kan sûn hle a ni. Amaherawhchu, min Siamtu Pathian Jehova’n kan lungngaihna min hriatpui a ni tih hriat chu a thlamuanthlâk hle. Chu bâkah, ani chuan engkim a tihtheihna chu mitthite kaihthawh nâna hman a châk a ni. Joba 14:13-15-a chhinchhiah Joba thute’n chu beiseina a târ lan dân hi lo chhinchhiah ang che.
Thil awm dân han ngaihtuah teh. Rinna lama mi challang tak Joba chuan fiahna namai lo tak a tâwk a—a thil neihte chânin, a fa duh takte a chân bâkah, natna khirh tak a tuar bawk a ni. A mangan êm avângin Pathian hnênah: “Seolah chuan mi thukru teh la, i thinur reh hma chu mi thukru . . . teh la aw!” a ti hial a ni. (Châng 13) Joba chuan Seol chu a hrehawmna tâwpna tûr niin a hre tlat a. Chu mi hmunah chuan, Pathian ro phûm rûk ang maia awmin, hrehawmna leh natna a tuar tawh lo vang. *
Joba chu Seol-ah a awm kumkhua ang em? Chu chu Joba chuan a ring hauh lo. Heti hian a ṭawngṭai zawm a ni: “Hun bîk mi ruatsakin mi hre reng teh la aw!” tiin. Joba chuan Seol-ah a awm kumkhua dâwn lo tih leh Jehova’n a theihnghilh dâwn lo tih a ring tlat a ni. Ani chuan Seol-a a hun hman chhûng tûr chu loh theih lohva hman ngai “hun ruat” angin a sawi. Chu chu engtia rei nge ni ang? “Ka chhuahna a thlen thlengin,” tiin a sawi. (Châng 14) Chu chhuahna chu Seol ata chhuahna a ni ang a—thu danga sawi chuan, thihna ata thawhlehna a ni ang!
Engvângin nge Joba chuan a chhuahna hun a thlen a beisei? Amah betu mi rinawm thi tawhte chunga hmangaihna nei min Siamtu rilru put hmang a hriat vâng a ni. Ani chuan: “Mi ko vang a, keiin ka chhâng ang che; i kut hnathawh i ngaina a ni,” a ti. (Châng 15) Joba chuan Pathian kut hnathawh a ni tih a inhria a. Nu pum chhûnga Joba dintu, Nunna-Petu chuan a thih hnuah pawh a tinung leh thei ngei a ni.—Joba 10:8, 9; 31:15.
Joba thusawite chuan Jehova hmangaihna neihzia min zirtîr a ni: Ani chuan Joba anga a kuta inkawltîr tlat a, a mit hmuha mi duhawm tak ni tûra inchhertîrtute chu a ngaina bîk hle, tih hi. (Isaia 64:8) Jehova chuan amah betu mi rinawmte chu a hlut hle a. A mi rinawm thi tawhte chu a “ngaina” hle a ni. Scholar pakhat sawi dân chuan heta hman Hebrai thu mal hi “thinlunga thil châk ngawih ngawih sawi chhuahna ṭawngkam sâng ber” a ni. Ni e, Jehova chuan amah betute a hre reng mai ni lovin, anmahni nunna pêk leh hlân chu a nghâkhlel hle bawk a ni.
Lâwmawm takin, Jehova chuan Bible bute zînga ziak hmasak ber pâwl Joba lehkhabuah mitthite kaihthawh a tum thu chu a lo chhinchhiahtîr a ni. * Ani chuan i hmangaih tak thi tawhte nêna intawntîr leh che a duh a. Chu chuan lusûnna a tiziaawm thei a ni. Engvângin nge he hmangaihna Pathian chanchin leh A thiltumte thlen famkimna hmutu ni tûra inchhertîr dân chu i zir loh vang? (w11-E 03/01)
[Footnote-te]
^ par. 4 Lehkhabu pakhat sawi dân chuan Joba hman “thukru” tih ṭawngkam chu “thil hlu tak ang maiin [mi] dah ṭha rawh” tihna a ni thei a. Lehkhabu dang erawh chuan hêng ṭawngkam hian “ro hlu angin mi thukru rawh” tihna a ni thei a ti thung.
^ par. 8 Felna khawvêl thara thawhlehna chungchâng Bible thutiam hriat belh nân, Jehova Thuhretute tih chhuah Bible Zirtîrna Dik Tak Chu Eng Nge Ni? tih lehkhabu bung 7-na chu en rawh.