Batamela Kgauswi le Modimo

“O tla Hlologela”

GO BOHLOKO go bona motho yo o mo ratago a ekwa bohloko le go hwa. Ka tlhago re a lla ge re lahlegelwa bjalo. Lega go le bjalo, go a homotša go tseba gore Mmopi wa rena, Jehofa Modimo, o a kwešiša ge re lla. Go feta moo, o hlologela go diriša matla a gagwe a magolo go tsoša bahu. Ela hloko kholofelo yeo e hwetšwago mantšung a Jobo, ao a begilwego go Jobo 14:13-15.

Ela hloko boemo bjo. Jobo, monna yo a nago le tumelo e tiilego, o lebeletšana le diteko tše šoro—go akaretša go lahlegelwa ke dithoto tša gagwe, go hwa ga bana ba gagwe ba rategago le bolwetši bjo bo kwešago bohloko. A le bohlokong bjo bogolo, o bitša Modimo o re: “A mola o ka be o nkuta Bodulabahu.” (Temana 13) Jobo o bona Bodulabahu e le lefelo leo le ka mo imollago. Ge a le moo, a etša letlotlo leo le fihlilwego ke Modimo, o tla lokologa mathateng le bohlokong. *

Na Jobo o be a tla dula Bodulabahu ka mo go sa felego? Jobo ga a dumele bjalo. O tšwela pele go rapela ka gore: “A mola o . . . mpeela nako gomme wa nkgopola!” Jobo ka kgodišego o holofela gore go dula ga gagwe Bodulabahu e tla ba ga nakwana le gore Jehofa a ka se ke a mo lebala. Jobo o swantšha nako yeo a tlago go e fetša a le Bodulabahu le “mošomo wa kgapeletšo”—nako ya go leta ka kgapeletšo. O tla leta nako e kaakang? O re: “Go fihla kimologo ya ka e etla.” (Temana 14) Kimollo yeo e tla bolela go lokollwa Bodulabahu—ka mantšu a mangwe, go tsošwa bahung!

Ke ka baka la’ng Jobo a kgodišegile gore kimologo ya gagwe e tla tla? Ka gobane o tseba kamoo Mmopi wa rena yo lerato a ikwago ka gona ka barapedi ba Gagwe ba botegago bao ba hwilego. Jobo o re: “O tla bitša, gomme nna ke tla go araba. O tla hlologela modiro wa diatla tša gago.” (Temana 15) Jobo o lemoga gore yena ke modiro wa diatla tša Modimo. Moneibophelo yo a bego a ikarabela ka go bopša ga Jobo ge a be a le ka popelong a ka kgona go mo tsoša bahung.—Jobo 10:8, 9; 31:15.

Mantšu a Jobo a re ruta ka lešoko la Jehofa: O kgomarela ka mo go kgethegilego bao, go swana le Jobo, ba ipeago ka diatleng tša gagwe, ba mo dumelela gore a ba bope gore e be batho ba kgahlišago mahlong a gagwe. (Jesaya 64:8) Jehofa o tšeela godimo barapedi ba gagwe ba botegago. O “hlologela” babotegi bao ba hwilego. Seithuti se sengwe se re, lentšu la Seheberu leo le dirišitšwego mo “ka ntle le pelaelo ke le lengwe la mantšu a tseneletšego ao a bontšhago maikwelo a go hlologela.” Ee, ga se feela gore Jehofa o gopola barapedi ba gagwe eupša gape o hlologela go ba tsošetša bophelong.

Re leboga gore ka pukung ya Jobo—e nngwe ya dipuku tša pele tša Beibele tšeo di ilego tša ngwalwa—Jehofa o ile a bona go swanetše gore a utolle morero wa gagwe wa go tsoša bahu. * O nyaka go go kopanya gape le baratiwa ba gago bao ba hwilego. Kgopolo yeo e ka dira gore bohloko bja go lahlegelwa bo se tsenelele kudu. Ke ka baka la’ng o sa ithute ka mo go oketšegilego ka Modimo yo yo lerato le kamoo o ka mo dumelelago a go bopa gore o be motho yoo a tlago go bona go phethagala ga morero wa Gagwe?

Mmalo wa Beibele o šišintšwego bakeng sa March:

▪ Esitere 1–Jobo 15

[Mengwalo ya tlase]