Fuena Ku Huku

“Ove Mokeivaluka”

TYIIHAMA unene okutala tyina umwe tuhole amona ononkhumbi alo ankhia. Tyotyili otyo tyituihama unene. Mahi, tyituungumanesa unene okunoñgonoka okuti, Omupakeko wetu, Jeova Huku wii omuihamo wetu. Haunene oe uhanda unene okuundapesa epondolo liae opo apindulepo vokuankhia. Tala ekevelo likahi monondaka mba Job liahonekwa mu Jó 14:13-15.

Tala oñgeni tyaenda. Job, omulume umwe wekolelo, wamuene ononkhumbi onene, okukutikinyamo epese liomalumono ae, no nonkhia mbovana vae aveho ononthyolwa, nouvela umwe omunene. Etyi amona ononkhumbi ombo, aiti ku Huku okuti: “Inkha tyetavelele vala, ñgeno wanthyoleka mo Seol [elangalo ine ondyembo kuenda ovanthu aveho]!” (Oversikulu 13) Job ankho utala Ondyembo ngatyina omphangu yokupululukwapo. Ngolumono luaholekwa na Huku, kuna, oe kakamona vali ononkhumbi no nongembia. a

Okuti Job ankho makakala melangalo apeho? Job ankho ha ngotyo asoka. Oe watualako okulikuambela okuti: ‘Ñgeno . . . unaka omuvo pala ame iya onthyinangela!’ Job ankho una ekevelo liokuti Melangalo makalamo vala omuwo uhehi iya Jeova emuhinangela. Job waeleka omuwo makevela melangalo, nomuvo ‘wovilinga viokukuluminyua’—omuwo omunthu akuluminyua okukevelela. Alo nalupi? Oe wati, “Alo eyovo liange liya.” (Oversikulu 14) Eyovo olio maliya tyina apinduluapo melangalo!

Omokonda yati Job ankho ena onthumbi yokuti eyovo liae maliya? Omokonda oe ankho utyii oñgeni Omupakeko wetu woluembia elitehelela konthele yovafendi Vae vekolelo wokuankhia. Job wati: “Ove moihana, iya ame andyikutavela. Moivaluka ovilinga waundapa nomaoko ove.” (Oversikulu 15) Job ankho utyii okuti oe ovilinga viomaoko a Huku. Omuavi Womuenyo, una wapakele Job meimo, ankho upondola okumukondola vali komuenyo.—Jó 10:8, 9; 31:15.

Onondaka mba Job mbutulongesa konthele yokankhenda ka Jeova: Oe una oupanga omunene na vana velipakula pomaoko ae nga Job, okuyeka Huku evelongese opo vakale ovanthu ehole. (Isaías 64:8) Jeova upanda unene ovafendi vae vekolelo. Oe una “otyiivaluko” novakuatyili vokuankhia. Omunongo umwe wati ondaka oyo mo Hebreu “ondaka imwe, yatona pala okulekesa ehando enene.” Tyotyili Jeova kahinangela vala ovafendi vae mahi tupu uhanda okuvekondola komuenyo.

Tyimoneka nawa okuti, omukanda wa Job, umwe pomikanda Viombimbiliya vihonekwa tete, Jeova walekesa ehando liae liokututilisa vokuankhia. b Oe uhanda okukuwaneka vali na vana uhole vokuankhia. Okusoka kuotyo tyituungumanesa tyina tuasiwapo. Oityi kulilongesila vali konthele ya Huku woluembia? Iya oñgeni moyeke ekulonge opo ukale omunthu makamona etyi mafuisapo ehando Liae?

[Onondaka Poutoi]