Twe Bikye Nyamenle
““Ɛ Nwo Balɔ” Bɛ
SAA yɛ dɔvolɛ bie nwu amaneɛ na ɔwu a ɔyɛ nyane kpalɛ. Ɔmaa yɛdi alɔbɔlɛ. Noko Gyihova Nyamenle, yɛ Bɔvolɛ ne, te alɔbɔlɛ mɔɔ yɛdi la abo. Ɛhye kyekye yɛ rɛle. Eza ɔlɛ ɛhulolɛ kɛ ɔbava ye tumi bedevinli ne yeadwazo mɔwuamra. Yɛ anyelazo mɔɔ ɛnee Dwobu lɛ ye mɔɔ bɛhɛlɛ ye wɔ Dwobu 14:13-15 la nzonlɛ.
Suzu mɔɔ manle Dwobu hanle edwɛkɛ ɛhye la anwo. Ɛnee Dwobu lɛ diedi noko ɔyiale ngyegyelɛ dɔɔnwo. Ye anwonyia vile ɔ sa, ɔ mra wule yɛɛ anwonyane bɔle ye. Wɔ ye amaneɛnwunlɛ ne anu, ɔzunle ɔvɛlɛle Nyamenle kɛ: “Anrɛɛ wɔava me wɔavea ɛbolɔ.” (Ngyɛnu 13) Dwobu nwunle kɛ ɔbahola yeahɔlie ɔ menle wɔ ɛbolɔ. Ɔnrɛnwu nyane bieko. Nyamenle bava ye azie wɔ ɛbolɔ kɛ agudeɛ bie la. *
Asoo Dwobu baha ɛbolɔ? Kyɛkyɛ, ɛnee ɔze ye kɛ ɔnrɛha ɛkɛ. Ɔdoale ye nzɛlɛlɛ ne azo kɛ: “Anrɛɛ wɔahile me mekɛ, na ɔdwu a wɔahakye me.” Ɛnee Dwobu lɛ anyelazo kɛ ɔnrɛha ɛbolɔ yɛɛ Gyihova arɛle ɛnrɛvi ye. Dwobu vale mekɛ mɔɔ ɔbali ye wɔ ɛbolɔ la ɔtotole “ɛzonlenlɛ mekɛ” nwo. Ɔbahendɛ mekɛ tendenle nyɛ? Ɔse, “Toonwo me ɛkpɔnelɛ mekɛ adwu.” (Ngyɛnu 14) Ye ɛkpɔnenlɛ ne bayɛ mekɛ mɔɔ bɛbadwazo ye bɛavi mɔwuamra anu la!
Duzu a manle Dwobu nwunle kɛ bɛbakpɔne ye a? Ɛnee ɔze kɛzi yɛ Bɔvolɛ ne mɔɔ lɛ ɛlɔlɛ la te nganeɛ wɔ Ye nɔhalɛ azonvolɛ mɔɔ ɛwu anwo la. Dwobu hanle kɛ: “Ɛbavɛlɛ, na mebalie wɔ zo; ɛ nwo balɔ ɛdawɔ ɛ sa anloa gyima.” (Ngyɛnu 15) Ɛnee Dwobu ze kɛ Nyamenle a bɔle ye a. Ngoane Maavolɛ ne mɔɔ bɔle Dwobu dole ɛkolɛ nu la bahola adwazo ye avi ewule nu.—Dwobu 10:8, 9; 31:15.
Dwobu edwɛkɛ ne maa yɛnwu kɛ Gyihova lɛ ɛlɔlɛ kpole: Ɔfa menli mɔɔ fa bɛ nwo to ɔ nwo zo kɛmɔ Dwobu yɛle la agɔnwolɛ kyengye na ɔziezie bɛ ɔmaa bɛyɛ menli mɔɔ ɔ nye die bɛ nwo. (Ayezaya 64:8) Gyihova nɔhalɛ azonvolɛ sonle bolɛ maa ye. Ɔ nwo ‘dɔ’ ye nɔhavoma mɔɔ ɛwu la. Abɔlɔba bie kile kɛ Hibulu edwɛkɛkpɔkɛ mɔɔ bɛvale bɛlile gyima la le “edwɛkɛ mɔɔ bɛfa bɛkile ɛhulolɛ kpole mɔɔ awie lɛ kɛ ɔkɛnwu ɔ gɔnwo bie la.” Ɛhɛe, tɛ kɛ Gyihova kakye ye azonvolɛ ala emomu ɔ nwo dɔ bɛ kɛ ɔkɛdwazo bɛ ɔkɛra ngoane nu bieko.
Yɛda Gyihova ase kɛ ɔmanle bɛhɛlɛle kpɔkɛ mɔɔ yebɔ kɛ ɔbadwazo mɔwuamra la wɔ Dwobu buluku ne mɔɔ boka Baebolo nu mbuluku mɔɔ bɛlumuale bɛhɛlɛle anwo la anu a. * Nyamenle kulo kɛ ɛnwu wɔ alɔvolɛ mɔɔ ɛwu la bieko. Edwɛkɛ ɛhye kyekye yɛ rɛle. Yɛsɛlɛ wɔ sukoa ɛlɔlɛ Nyamenle ne anwo edwɛkɛ na sukoa kɛ ɔkɛyɛ na wɔamaa yeaziezie wɔ amaa Ye bodane ne mɔ ba nu a wɔanwu ye.
^ ɛden. 2 Buluku bie kile kɛ edwɛkɛ “wɔava me wɔavea” mɔɔ Dwobu hanle la kola kile “bɔ [me] nwo bane kɛ anwonyia mɔɔ sonle bolɛ la.” Buluku fofolɛ noko se zɔhane edwɛkɛ ne kile “fa me sie kɛ agudeɛ.”
^ ɛden. 6 Saa ɛkpondɛ Baebolo ne anu ɛwɔkɛ mɔɔ fane ewudwazo ne nee tenlene ewiade fofolɛ ne anwo a, nea tile 7 wɔ Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la anu.