MUNAKUSQANCHIS runa wañupuqtinqa ancha llakikuymi ñoqanchispaq, sonqonchispas ch’usaqmi qhepan. Chaymi sonqochawanchis Kamaqninchis Dios llakikusqanchista yachasqan. Hinaspapas Diosqa anchatan munan wañusqakuna kawsarichiyta. Chaymantan Job 14:13-15 texto rimashan.

Jobqa allin iñiyniyoq runan karqan, payqa wawankunata, qhapaq kayninta iman chinkachipurqan onqosqataq tarikurqanpas. Imaymanawan ñak’arispa ancha llakisqa tarikushaspan kayta nirqan: “May kusachá kanman phiñakuyniykiq thaninankama Wañuypachapi pakaykuwankiman chayqa”, nispa (versículo 13). Jobqa wañupuspa ñak’ariykunamanta samananpaqmi yuyaykurqan, chhaynapin lliw llakikuyninkuna sasachakuyninkunapas tukupunman. Chayqa pakaykusqan tarikunman Diospa pakasqan ancha valorniyoq illa hina. *

¿Wiñaypaq p’ampasqa kaytachu Job munarqan? Manan. Diostan rogakurqan: “Ñoqamanta yuyarikunaykipaqtaq huk p’unchayta churawaq”, nispa. Payqa yacharqanmi Jehová Dios mana qonqananta, chayraykun confiarqan huk tiempolla Wañuypachapi kananta. Chaymantataq chay tiempota tupanachirqan ‘muchuna p’unchaykunawan’, chay p’unchaymanta kacharichisqa kaytaqa mayta suyakuymi kanman. ¿Hayk’aqkaman suyanman? Pay kikinmi kutichin: “Suyallasaqpunin kacharisqa kanay p’unchaykama”, nispa (versículo 14). Chhaynaqa, Jobqa chay muchuymantan kacharichisqa kanqa kawsarichisqa kaspa.

¿Imaraykun Job seguro kasharqan chay p’unchay chayamunanmanta? Payqa allintan yacharqan Diosninchis runakunata ancha munakusqanta, chaymi nirqan: “Waqyamuwaqtiykiqa kutichimusqaykin, kamasqayki runamanta sonqoykita ‘ch’allaq’ nirichinki”, nispa (versículo 15). Jobqa yacharqanmi Diospa kamasqan kasqanta. Arí, Diospa munayninpin mamanpa wiksanpi formakurqan. Diosmi kawsayta qorqan payllataqmi kutichipunmanpas (Job 10:8, 9; 31:15).

Kay textomantan yachasunman Job hina Dioswan pusachikuspa paypi confiaqkunataqa ancha munakusqanta (Isaías 64:8). Diosqa anchatan valoran hunt’aq kamachinkunata sonqontataq “ch’allaq” nirichin wañupuqkunamanta. Hebreo rimaypi “ch’allaq” simimantan huk allin yachaq nin: “Chayqa imatapas chinkachispa mayta sienteymantan rimashan”, nispa. Arí, Jehová Diosqa yuyanmi llapa wañupuq kamachinkunata, chaymantapas anchatan paykunamanta sienten chaymi mayta kawsarichimpuyta munan.

Ancha munay Dios kasqanraykun kay suyakuyta Bibliapi qelqachirqan. * Payqa munanmi munakusqanchis runakunata hukmanta rikunanchista. Chayta yuyariymi yanapawasun pininchispas wañupuqtin llakikuyninchista atipananchispaq. ¿Munawaqchu chay munakuq Diosta astawan reqsiyta? Sichus Diospa nisqanman hina kawsanki chayqa, rikunkin promesanman hina Dios wañusqakunata kawsarichimpuqtin.