Ga nduru na Nzapa

“Bê ti Mo aye kusala ti tïtî Mo”

TI BÂ mbeni zo so mo ye lo abâ pasi ngbii na akui ayeke sara mo nzoni oko pëpe. A yeke na lege ni ti tene zo aduti na vundu na peko ti mara ti ye tongaso. Ye oko, bê ti e adë ti hinga so Jéhovah Nzapa, Wasarango e ahinga vundu ti bê ti e. Ye so ayeke nzoni mingi ahon so ayeke so lo yeke ku kungo ti mû ngangu ti lo ti zingo akuâ. Bâ so beku ti zingongo akuâ asigigi na yâ ti atënë ti Job so ayeke na Job 14:13-15.

Bâ ye so asi lani na Job. Job ayeke mbeni zo so ayeke na kpengba mabe. Lo wara lani gbâ ti akpale: Aye ti mosoro ti lo abuba, amolenge ti lo kue akui nga lo wara mbeni sioni kobela. Na ngoi so pasi ahon ndo ti lo, lo toto na Nzapa lo tene: “A yeke nzoni Mo honde mbi na yâ ndo-ti-awakinda”! (Versê 13). Job abâ ndo-ti-awakinda tongana ndo so ayeke sara si lo wu pupu. Nzapa ayeke honde lo na ndo-ti-awakinda tongana mbeni mosoro so ngere ni ayeke ngangu mingi. Kâ, lo yeke bâ pasi mbeni pëpe. *

Job ayeke ngbâ ande biani biani na ndo-ti-awakinda? Job ahinga so a yeke duti tongaso pëpe. Na yâ ti sambela ti lo, lo tene: “A yeke nzoni . . . Mo diko lâ ni na mbi, na Mo dabe Mo na mbi!” Job ahinga na bê ti lo kue so lo yeke duti na ndo-ti-awakinda gi teti kete ngoi nga so Jéhovah ayeke girisa ande lo pëpe. Job ahaka ngoi so lo yeke sara na ndo-ti-awakinda na “kusala” wala mbeni ngoi so a gbu zo na ngangu ti ku. Ngoi ni so ayeke ninga ngoi oke? Lo tene: “Juska lâ ti gbian mbi aga.” (Versê 14). Gbiango lo so aye ti tene ti sigigi na ndo-ti-awakinda wala ti zingo na kuâ.

Ngbanga ti nyen Job amä na bê ngangu so a yeke zingo lo ande? Ngbanga ti so lo hinga tënë ti bê ti Wasarango e so ayeke sara ye na ndoye na mbage ti azo ti lo so ayeke be-ta-zo na so akui. Job atene: “Fade Mo iri ndo, na mbi kiri tënë na Mo; bê ti mo aye kusala ti tïtî Mo [wala ‘mo toto ti bâ ye so maboko ti mo asara awe,’ Tene ti Nzapa, Kozo Mbouki].” (Versê 15). Job ahinga so lo yeke kusala ti tïtî Nzapa. Kite ayeke pëpe so Lo so amû fini na zo na so aleke Job na yâ ti mama ti lo alingbi ti sara si Job akiri na fini na peko ti kuâ ti lo.​—Job 10:8, 9; 31:15.

Atënë ti Job so afa na e mbeni pendere ye na ndo ti Jéhovah. Lo ye mingi azo so, tongana Job, azia tere ti ala na yâ ti maboko ti lo nga so ayeda ti tene lo leke ala si ala ga azo so ayeke nzoni na lê ti lo (Ésaïe 64:7). Jéhovah aye mingi awakua ti lo so ayeke be-ta-zo. Lo ‘toto ti bâ’ abe-ta-zo ti lo so akui. Mbeni wandara atene mbupa ti Hébreu so a kiri pekoni na ‘toto ti bâ’ aye ti sara tënë ti “kota nzara so mbeni zo ayeke na ni ti sara mbeni ye.” Biani, Jéhovah ayeke dabe ti lo na azo so avoro lo, lo yeke ku nga kungo ti kiri na ala na fini.

Merci so na yâ ti buku ti Job, oko ti akozo buku ti Bible so a sû ni, Jéhovah afa so lo yeke zingo akuâ. * Lo ye ti sara si mo kiri mo wara tere na azo so mo ye ala mingi so kuâ amû ala. Tënë so alingbi ti sara si vundu ti mo akiri na peko kete. Ngbanga ti nyen mo gi pëpe ti hinga ye mingi na ndo ti Nzapa so, so ayeke sara ye na ndoye? Mo lingbi nga ti gi ti hinga tongana nyen ti zia si lo leke mo ti ga zo so ayeke bâ ande gango tâ tënë ti aye so lo leke ti sara.

[Akete tënë na gbe ni]