Sondzela KuNkulunkulu

KUBUHLUNGU kubona umuntfu lomtsandzako asebuhlungwini futsi afa. Kuyimvelo kutsi silile nakwenteka intfo lenjalo. Nanobe kunjalo, kuyadvudvuta kwati kutsi Nkulunkulu Jehova, longuMdali wetfu, uyabucondza buhlungu betfu. Ngetulu kwaloko, uyakulangatelela kusebentisa emandla akhe lamakhulu kute avuse labafile. Asewunake litsemba lelivetwe emavini aJobe latfolakala kuJobe 14:13-15.

Cabanga ngalesimo: Jobe, indvodza lebeyinekukholwa lokukhulu, wahlangabetana neluvivinyo lolumatima​—lolufaka ekhatsi kulahlekelwa yimphahla yakhe, kufelwa ngibo bonkhe bantfwana bakhe, kanye nekuhlaselwa sifo lesibuhlungu. Asebuhlungwini lobukhulu, wakhala kuNkulunkulu: “Ngifisa shangatsi ungangifihla ethuneni.” (Vesi 13) Jobe abebona shengatsi lithuna lingamphumuta ekuhluphekeni kwakhe. Abengakhululeka ebumatimeni kanye nasebuhlungwini, njengeligugu lelifihlwe nguNkulunkulu. a

Jobe abetawuhlala ethuneni kute kube phakadze yini? Abekholelwa kutsi loku bekungeke kwenteke. Wachubeka wathandaza: “Nawungamane nje ungincumele sikhatsi, ungikhumbule!” Jobe abeciniseka kutsi abetawuhlala sikhashana eShiyoli futsi Jehova abengeke amkhohlwe. Wafananisa sikhatsi labetawusihlala eShiyoli ‘nekusebenta kamatima’​—lokusikhatsi lapho usuke ulindzele khona kukhululwa. Abetawulindza sikhatsi lesinganani? Watsi: “Kuze kufike kuvuseleleka [kukhululeka] kwami.” (Vesi 14) Loko kusho kukhululwa eShiyoli, nobe kuvuswa ekufeni!

Kungani Jobe abeciniseka kutsi utawukhululwa? Kungobe abeyati indlela uMdali wetfu lonelutsandvo lativa ngayo ngetikhonti taKhe letetsembekile lesetifile. Jobe watsi: “Uyawungibita, mine ngikuphendvule. Uyawufisa kubona leso sidalwa lesentiwa ngetandla takho.” (Vesi 15) Jobe abecaphela kutsi wadalwa nguNkulunkulu. Njengobe Jehova anguMniki Wekuphila futsi kunguye lowambumba esibeletfweni, abengakhona kumvusa ekufeni.​—Jobe 10:8, 9; 31:15.

Emavi aJobe asifundzisa sifundvo lesibalulekile ngaJehova: Kutsi usondzelene kakhulu nalabo labafanana naJobe, labatibeka etandleni takhe, futsi bavume kutsi ababumbe kute babe bantfu labatsandzekako kuye. (Isaya 64:8) Jehova uyatitsandza tikhonti takhe letetsembekile. ‘Uyafisa’ kuvusa bantfu labacotfo. Lesinye sati sitsi leligama lesiHebheru lelisetjentiswe lapha “liligama lelinemandla kakhulu leliveta imiva yekulangatelela kwenta intfo letsite.” Jehova akagcini nje ngekukhumbula tikhonti takhe, kodvwa uyafisa kutivusa ekufeni.

Kuyajabulisa kutsi encwadzini yaJobe​—lokungulenye yetincwadzi teliBhayibheli letabhalwa kucala​—Jehova wembula injongo yakhe yekuvusa labafile. b Ufuna kuphindze akuhlanganise nebantfu lobatsandzako lasebafa. Kucabanga ngaloku kungakwenta ukwati kububeketelela kancono buhlungu bakho. Kungani ungafundzi lokubanti ngaNkulunkulu lonelutsandvo kanye nendlela longamvumela ngayo kutsi akubumbe kute nawe ukubone kugcwaliseka kwenjongo yaKhe?

[Imibhalo lengentansi]