Yasukanya la Nzambi

‘Wɛ ayowoka kɛtshi’

SHO mongaka la pâ efula l’asolo etena kɛnaso lakiso ɔmɔtshi la ngandji asowa polo lo nyɔi. Sho mongaka la lɔkɔnyɔ etena kavushaso lakiso ɔmɔtshi la ngandji. Koko, ekɔ dui di’ekeketshelo dia mbeya dia Jehowa Nzambi, Otungi aso mɛnaka lɔkɔnyɔ laso. Lâdiko dia lâsɔ, nde nomɔlomɔka dia nkamba la wolo ande woleki tshɛ dia mbolola wanɛ wakavu. Ohenda elongamelo kele l’ɛtɛkɛta waki Jɔbɔ wele lo Jobo 14:13-15.

Tɔsɛdingole awui wakete. Jɔbɔ laki la mbetawɔ ka nge akahomana la ehemba wa wolo. Nde akashisha lomombo lande, akavusha anande wa ngandji ndo akandama la hemɔ ka wolo. Etena kakinde l’atei w’asui woleki wolo asɔ, nde akalelɛ Nzambi ɔnɛ: “Utuyetawo mbishemi lu Dihuli di’Edu!” (Divɛsa 13) Jɔbɔ akɛnaka dihole di’edo oko ekomelo k’asui. Lɛkɔ, oko ɛngɔ ka nɛmɔ kolamemi oma le Nzambi, nde takandakoke monga nto la pâ. a

Onde Jɔbɔ ototshikala pondjo lo dihole sɔ di’edo? Aha kanyi shɔ mbaki la Jɔbɔ. Nde tetemalaka la dɔmbɛlɔ diande ɔnɛ: “Utuyetawo nshikike etena ka we mbuhomi li!” Jɔbɔ aki l’elongamelo ɔnɛ nde ayotshikala lo dihole di’edo lo tshanda mɔtshi tsho ndo ɔnɛ Jehowa hatowohɛ lɛkɔ. Jɔbɔ akɛdikaka nshi yayondohomba mbetsha lo dihole di’edo la nshi y’“asui,” mbuta ate, etena kakandahombe nkonga. Edja ka ngande kakandahombe nkonga? Nde mbutaka ate: “Edja ndu lam’ayumutshungo.” (Divɛsa 14) Etshungwelo kɛsɔ nangaka nembetshiya ntomba oma lo dihole di’edo kana l’ɛtɛkɛta ekina, mbolɔ oma lo nyɔi.

Lande na kaki Jɔbɔ l’eshikikelo ɔnɛ nde ayotshungɔma? Nɛ dia nde mbeyaka woho wayaoka Otungi aso wa ngandji lo dikambo di’ekambi Ande wa kɔlamelo wavɔ. Jɔbɔ mbutaka ate: “We ayumbeta, ku dimi layuketawo. We ayukaka ulimu w’anya aye ketshi.” (Divɛsa 15) Jɔbɔ akeyaka dia nde aki olimu w’anya wa Nzambi. Jehowa ɔnɛ lele kiɔkɔ ya lɔsɛnɔ, mbidja ndo laki Jɔbɔ kokaka aha la tâmu mbosha nto lɔsɛnɔ kânga l’ɔkɔngɔ wa nde mvɔ.—Jobo 10:8, 9; 31:15.

Ɛtɛkɛta waki Jɔbɔ mɛnyaka dia Jehowa mbokaka anto ngandji ndo nde mamemaka lo yoho ya lânde anto wele oko Jɔbɔ, wendɛ l’anya ande, wawosha diaaso dia nde mbâkenga dia ndjadiema l’atei w’anto wɔsama la nɛmɔ lo washo ande. (Isaya 64:8) Jehowa mbɔsaka ekambi ande wa kɔlamelo oko diangɔ dia nɛmɔ. Nde ayoka akanga wa memakana wakavu “kɛtshi.” Nomb’ewo kɛmɔtshi mbutaka ɔnɛ: “Aha la tâmu,” tshɛkɛta ya lo Hɛbɛru yokadimɔmi ɔnɛ: “Kɛtshi” “yekɔ l’atei wa tɔtɛkɛta taleka nkɛnɛmɔla nsaki kana kɛnɛ kaleka nkombola onto.” Eelo, Jehowa hohɔ tsho ekambi ande, koko nde nomɔlomɔka dia nyumowasha lɔsɛnɔ.

L’ekimanyielo ka dibuku dia Jobo, diele l’atei w’abuku wa ntondo wakafundama Bible, Jehowa akashola sangwelo diande dia mbolola wanɛ wakavu. b Nde kombolaka dia wɛ nyomɛnana la wakiyɛ wa ngandji wakavu. Dui sɔ kokaka kokimanyiya dia wɛ mbikikɛ nyɔi ka lakiyɛ la ngandji lakavu. Lande na kahayeke awui efula wendana la Nzambi ka ngandji kɛsɔ ndo mbetawɔ kengama oma le nde, dia nde kokonya woho w’onto wayoyɛna ekotshamelo ka sangwelo diande?

[Nɔte ya l’ɛse ka dikatshi]