“Uyoondiyandisisya Ndemulengwa Wako”
Amube Acilongwe A Leza
“Uyoondiyandisisya Ndemulengwa Wako”
CILACISYA moyo kubona muyandwa kapenga akufwa. Kusweekelwa ooku kulalizya kapati. Nokuba boobo, cilakkazika moyo kuzyiba kuti Mulengi wesu Jehova Leza ulaazyi mapenzi eesu. Kwiinda waawo, uliyandide kubelesya nguzu zyakwe ziteeli kubusya bafwide. Amubone bulangizi buli mumajwi a Jobu, aalembedwe kubbuku lya Jobu 14:13-15.
Amulange zyakacitika. Jobu muntu wakajisi lusyomo, wakanjila mumasunko mapati—lubono lwakamana, wakafwidwa bana bakwe alimwi wakaciswa citaambiki. Kapengede kapati wakamwiita Leza akuti: “Necakali cibotu kuti wandisisa munyika yabafwide [mucuumbwe].” (Kapango 13) Jobu wakabona kuti kufwa kwakali kabotu kwiinda kupenga. Mucuumbwe, naakaba mbuli mbono iisisidwe a Leza, taakacili kunoojisi mapenzi. *
Sena Jobu naakakkalilila mucuumbwe? Jobu wakalizyi kuti eeci tacikonzyi kucitika pe. Wakazumanana mumupailo wakwe kuti: ‘Elyo uyakundiyeeya casika ciindi.’ Jobu wakali kusyoma kuti uyakukkala buyo ciindi cisyoonto mucuumbwe akuti Jehova takamulubi pe. Jobu wakakozyanisya ciindi ncaakali kuyookkala mucuumbwe kukucita “mulimo”—iciindi ncaakeelede kulindila. Ino ciindi eeci cakali cilamfwu buti? Wakaamba kuti, “kusikila nkaangununwe.” (Kapango 14, BT) Kwaangununwa ooku cakali kwaamba kubusigwa kuzwa kucuumbwe—kubusigwa kuzwa kubafwide.
Ino nkaambo nzi Jobu ncakali masimpe kuti uyoobuka? Nkaambo wakalizyi Mulengi wesu mbwalimvwa kujatikizya bakombi bakwe basyomeka bakafwa. Jobu wakaamba kuti: “Waakundiita, njooingula, uyoondiyandisisya ndemulengwa wako.” (Kapango 15, BT) Jobu wakazumina kuti ngu Leza wakamulenga. Wakamulenga Jobu naakali mwida, nguukonzya kumupa buumi kuti naa wafwa.—Jobu 10:8, 9; 31:15.
Majwi aa Jobu atuyiisya Jehova mbwali siluyando: Ulabayanda aabo bali mbuli Jobu balibikka mumaanza aakwe, akumuzumizya kuti ababumbe alimwi akubeendelezya mbuli mbwayanda kutegwa babe bantu bayandwa kapati mumeso a Leza. (Isaya 64:8) Jehova ulabayanda bakombi bakwe basyomeka. ‘Uliyandide’ kubabusya bakombi bakwe bakafwa. Syaazibwene umwi wakaamba kuti ibbala lya Cihebrayo lyakabelesyegwa “lili abupanduluzyi bupati bwaamba kuyandisisya kuzwa ansi amoyo.” Masimpe, Jehova tabayeeyi buyo bakombi bakwe pele uliyandide kubabusya.
Cilakkomanisya kubona kuti mubbuku lya Jobu—lyalo ilili akati kamabbuku aa Bbaibbele aakasaanguna kulembwa—Jehova wakayubununa makanze aakwa akubusya bafwide. * Uyanda kuti mukababone alimwi bayandwa banu bakafwa. Cisyomezyo eeci inga catugwasya kuliyumya notuli mubuumba. Mbuti kuti mwayiiya zinji kujatikizya Leza ooyu siluyando ambomukonzya kumuzumizya kuti amubumbe mbwayanda kutegwa mukabone kuzuzikizyigwa kwamakanze aakwe?
[Bupanduluzi buyungizidwe]
^ munc. 4 Buvwuntauzyi bumwi bwakaamba kuti majwi aa Jobu aakuti, ‘kundisisa,’ inga aamba kuti “kundiyobola muluumuno mbuli cintu ciyandika kapati.” Buvwuntauzyi abumwi bwakaamba kuti majwi aaya alakonzya kwaamba kuti “undisise mbuli cintu ciyandisi.”
^ munc. 8 Kutegwa mwiiye zinji kujatikizya cisyomezyo camu Bbaibbele cabubuke abuumi munyika mpya, amubone cibalo 7 mubbuku lyakuti Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.