«Oy ta avoʼonton cha chaʼkʼel li yabtel akʼobe»
Nopajan ta stojolal Dios
«Oy ta avoʼonton cha chaʼkʼel li yabtel akʼobe»
KʼALAL oy buchʼu chcham kuʼuntike mu albajuk xkʼuxul chkaʼitik, solel lilijem tajek koʼontontik chkom yuʼun. Jaʼ yuʼun tspatbutik tajek koʼontontik ti snaʼ kʼuyelan chkaʼi jbatik li Jpasvanej kuʼuntik Jeovae. Jech xtok, oy tajek ta yoʼonton tstunes li stsatsal juʼel sventa chchaʼkuxes li animaetike. Li spatobil koʼontontik taje te ta jtatik ta Job 14:13-15.
Jun vinik ti lek tsots xchʼunel yoʼontone, jech laj yal kʼalal jaʼo tsots tajek chil svokol ta xkuxlejale, taje jaʼ li Jobe. Yuʼun cham li xnichʼnabtake, chʼay li skʼulejale xchiʼuk ipaj. Ta skoj ti chlaj xa laj yaʼi yuʼun li svokole, xi laj yalbe li Diose: «[Ti] oyuc cʼuxi xanacʼun ta yavil animaetique», xut (versikulo 13). Kʼalal yavil animaetik xi li ta versikuloe, li ta hebreo kʼope Seol, xi, taje jaʼ chalbe skʼoplal li mukinal ta komon yuʼun li krixchanoetike. Jaʼ yuʼun li Jobe xkoʼolaj kʼuchaʼal xkuxobil yoʼonton laj yaʼi li lajele, yuʼun jaʼ te chlaj skotol li svokoltake. Xkoʼolaj kʼuchaʼal meʼ takʼin ti lek kʼejbil o nakʼbil yuʼun Dios sventa mu kʼusi spase. *
¿Mi smalaoj ti te chkom sbatel osil ta yavil animaetik li Jobe? Moʼoj, yuʼun xi laj yalbe li Diose: «Xuʼ chavacʼbe yorail ti cʼusi ora chlic to anaʼune», xut. Lek xchʼunoj ti chvulesat ta sjol yuʼun li Jeovae, jech oxal spatoj yoʼonton ti oy noʼox kʼu sjalil te oy ta Seol li Jobe. Ti kʼu sjalil taje, la skoʼoltas ta jun «[abtelal] ti persa skʼan ta [s]pase» o ti persa skʼan smalae. Pe ¿kʼu to sjalil skʼan smala? Xi la stakʼe: «Jaʼ to mi vul li jkʼexole [o li jkolebe]» (versikulo 14, NM). Jaʼ yuʼun, li Jobe jaʼ to chkol lokʼel ta yavil animaetik kʼalal mi chaʼkuxesate.
¿Kʼu yuʼun xchʼunoj tajek Job ti chkʼot li yorail taje? Yuʼun li stuke xojtikin lek kʼuyelan chaʼi sba li Jpasvanej kuʼuntik ta skoj li yajtuneltak ti chamemike. «Voʼot cha ikʼvan —xut li Diose—, voʼon ta jtakʼbot. Oy ta avoʼonton cha chaʼkʼel li yabtel akʼobe.» (Versikulo 15, NM.) Li stuke snaʼoj ti jaʼ pasbil yuʼun Jeovae. Yuʼun jaʼ onoʼox Dios ti buchʼu laj yakʼ chʼiuk ta yut xchʼut smeʼ li Jobe xchiʼuk ti xkuxie. Jech oxal li Jeovae xuʼ xchaʼakʼbe li xkuxlejal xtoke (Job 10:8, 9; 31:15).
Oy kʼusi tsots skʼoplal chakʼ jchantik li versikuloetik liʼe: li Jeovae oy tajek ta yoʼonton li yajtuneltak ti chakʼ sbaik ta skʼobe xchiʼuk ti chakʼik akʼo xlekubtasbat stalelalik yuʼune, jech kʼuchaʼal la spas li Jobe (Isaías 64:8). Toj ep tajek sbalil chil xchiʼuk oy tajek ta yoʼonton li tukʼil yajtuneltak ti chamemike. Ta sventa li jpʼel kʼop hebreo «oy ta avoʼonton» xie, xi chalbe smelolal jun pʼijil vinik ti jaʼ chchanbe skʼoplale: «Ta melel, li jpʼel kʼop taje chakʼ ta aʼiel ti solel oy tajek ta oʼontonal» li jun krixchanoe. Jaʼ jech, li Jeovae maʼuk noʼox tsvules ta sjol li yajtuneltak ti chamemike, moʼoj, yuʼun oy tajek ta yoʼonton xchiʼuk tskʼan ti chaʼkuxiemikuk xae.
Ti laj yakʼ ta tsʼibael Jeova ta jlik slivroal Vivlia ti mas voʼne li spatobil oʼontonal taje, ¡jaʼ skʼelobil ti toj lek yoʼontone! * Li stuke oy ta yoʼonton ti jchaʼkʼeltik li kutsʼ kalaltik chamemike. Mi ta jvules ta joltik taje jaʼ tskoltautik ta stsʼikel li xkʼuxul chkaʼitik kʼalal oy buchʼu chamem kuʼuntike. ¿Mi mu oyuk ta avoʼonton chavojtikin mas li jun Dios ti kʼanvanem tajeke? Mi chavakʼ sbeiltasot ta akuxlejale, xuʼ me te akʼoplal sventa xavil ti chkʼot ta pasel li kʼupil sba skʼakʼalil ti chchaʼkuxes animaetik li Jeovae, jech kʼuchaʼal yaloj stuke.
Ti bu kʼalal xuʼ jkʼeltik Vivlia li u liʼe:
[Tsʼibetik ta yok vun]
^ Jlik vun ti chchanbe skʼoplal taje, chal ti verbo «xanacʼun» xi jelubtasbile, xuʼ la chakʼ ta aʼyel ti xkoʼolaj kʼuchaʼal «lek chichʼ kʼejel jtosuk kʼusi ti ep sbalile». Jech oxal, yan vun xtoke, laj yal ti xuʼ la xi chichʼ jelubtasel xtok li kʼusi laj yal li Jobe: «Nakʼun kʼuchaʼal jun meʼ takʼin».
^ Cha tabe mas yaʼyejal ta sventa li chaʼkuxesel chal Vivlia te ta kapitulo 7 li ta livro ¿Kʼusi chchanubtasvan ta melel li Vivliae?, ti pasbil yuʼun yajrextikotak Jeovae.