‘U Ḓo Ṱuvha’
Sendelani Tsini Na Mudzimu
‘U Ḓo Ṱuvha’
ZWI a pfisa vhuṱungu u vhona muthu ane na mu funa a tshi shengela nahone a fhedza o fa. Kanzhi ri a lila musi ri tshi felwa. Naho zwo ralo, zwi a ri khuthadza u ḓivha uri Musiki washu, Yehova Mudzimu u a ri pfesesa musi ri tshi lila. Zwa ndeme vhukuma ndi uri u ṱulutshelwa u shumisa maanḓa awe u itela u vusa vho faho. Ṱhogomelani fulufhelo ḽi re kha maipfi a Yobo o ṅwalwaho kha Yobo 14:13-15.
Ṱhogomelani eneo mafhungo. Yobo munna wa lutendo lu swayeaho o sedzana na milingo—i katelaho u xelelwa nga lupfumo lwawe, u felwa nga vhana vhawe vhoṱhe vhane a vha funa na vhulwadze vhu vhavhaho. Musi e tshengeloni yeneyo, o vhidzelela Mudzimu a ri: “Ngavhe [u tshi] tou mmbulunga vhafuni!” (Ndimana ya 13) Yobo o vhona vhiḓa sa tshithu tshine tsha ḓo fhelisa tshengelo yawe. O vha a tshi vhona u nga musi e vhiḓani zwi ḓo nga o tou dzumbiwa henefho nahone o vha a sa ḓo pfa vhuṱungu. *
Naa vhiḓa ḽo vha ḽi tshi ḓo vha fhethu hune Yobo a ḓo dzula hone lwa tshoṱhe? Yobo o vha a sa fulufheli uri u ḓo dzula vhiḓani lwa tshoṱhe. O bvela phanḓa na thabelo yawe a ri: “Ngavhe [u tshi] mbetshela ḓuvha ḽine wa ḓo nkhumbula ngaḽo’.” Yobo o vha a tshi fulufhela nga ho khwaṱhaho uri u ḓo dzula lwa tshifhinganyana vhiḓani nahone Yehova o vha a sa ḓo mu hangwa. Yobo o fanyisa tshifhinga tshe a vha a tshi ḓo tshi fhedza e vhiḓani sa u vha “ndwani”—zwine zwa amba uri u a kombetshedzea u lindela. O vha a tshi ḓo lindela tshifhinga tshingafhani? U ri: “Ndó lindela u shanduka hanga” kana u vhofhololwa. (Ndimana ya 14) U vhofhololwa honoho zwo vha zwi tshi amba u vuswa vhafuni!
Ndi ngani Yobo o vha a tshi tenda uri u ḓo vuswa? Ndi ngauri o vha a tshi ḓivha nḓila ine Musiki washu a re na lufuno a ḓipfa ngayo nga vhagwadameli vhawe vho faho. Yobo o ri: “Ndi Misi U tshi ḓo mbidza nda aravha; ndi misi U tshi ḓo ṱuvha tshivhumbiwa tsha zwanḓa zwau.” (Ndimana ya 15) Yobo o vha a tshi zwi ḓivha uri o vhumbwa nga Mudzimu. Muṋei wa Vhutshilo we a vhumba Yobo o vha a tshi nga dovha a mu vusa arali o fa.—Yobo 10:8, 9; 31:15.
Maipfi a Yobo a ri gudisa nḓila ya lufuno ine Yehova a ri pfela ngayo vhuṱungu: U na vhushaka ho khetheaho na vhathu vha fanaho na Yobo vhane vha ḓiṋekedzela khae uri a vha vhumbe u itela uri vha vhe vhathu vhane vha mu takadza. (Yesaya 64:8) Yehova u dzhiela nṱha vhagwadameli vhawe vha fulufhedzeaho. U a “ṱuvha” vhathu vha fulufhedzeaho vho faho. Muṅwe mugudi a tshi amba nga ha ḽeneḽi ipfi ḽa Luheberu o amba uri, “a zwi timatimisi uri ḽi sumbedza lutamo luhulwane lwa u ṱoḓa u ita tshiṅwe tshithu.” I ngoho, Yehova ha sokou humbula vhagwadameli vhawe fhedzi, fhedzi u dovha a ṱulutshelwa u vha vusa.
Zwi takadzaho ndi uri buguni ya Yobo—ine ya vha iṅwe ya bugu dza Bivhili dze dza ṅwaliwa u thoma—Yehova o vhona zwo tea u dzumbulula ndivho yawe ya u vusa vhafu. * U ṱoḓa uri ni dovhe ni ṱangane na vhafunwa vhaṋu vho faho. U ḓivha zwenezwo zwi nga ita uri ni kone u konḓelela vhuṱungu ha u felwa. Ndi ngani ni sa gudi zwo engedzeaho nga ha Mudzimu onoyu a re na lufuno na tendela a tshi ni vhumba uri ni kone u vha muthu ane a ḓo vhona ndivho yawe i tshi ḓadzea?
[Ṱhaluso dzi re magumoni a siaṱari]
^ phar. 4 Iṅwe bugu yo ri maipfi a Yobo ane a ri ‘mmbulunge’ a nga amba u “vhea tshithu tsha ndeme fhethu ho tsireledzeaho.” Iṅwe i amba uri enea maipfi a amba uri “u ndzumbe sa lupfumo.”
^ phar. 8 U itela u guda zwo engedzeaho nga ha fulufhedziso ḽa Bivhili ḽa u vusela vhathu shangoni ḽiswa ḽo lugaho, sedzani ndima ya 7 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.