‘ʼE Ke Fakatalitali Mālohi Anai Kiai’
Kotou Fakaovi Ki Te ʼAtua
‘ ʼE Ke Fakatalitali Mālohi Anai Kiai’
ʼE KO he meʼa fakalotomamahi mokā tou sio ki he tahi ʼe tou ʼofa ai ʼe mamahi pea mate. ʼE ko he toe mamahi lahi mokā mate he tahi. Kae ʼe tou lotofīmālie mo kapau ʼe tou ʼiloʼi ko Sehova, totatou Tupuʼaga, ʼe ina logoʼi totatou ʼu mamahi. Pea ʼe tou toe fiafia foki ʼi tatatou ʼiloʼi ʼaē tana holi ʼaē ke ina fakaʼaogaʼi tona mālohi māfimāfi moʼo fakatuʼuake ki te maʼuli ia te kau mate. Kotou fakatokagaʼi ia te ʼamanaki ʼaē neʼe talanoa kiai ia Sopo, iā Sopo 14:13-15.
Tou tokagaʼi age muʼa ia te meʼa ʼaē neʼe hoko. Ko Sopo neʼe ko te tagata neʼe mālohi tana tui, pea neʼe tau mo he ʼu ʼahiʼahi lahi. Neʼe puli tona ʼu koloa, pea neʼe mamate fuli ia tana fānau ʼofaina, pea neʼe ina maʼu ia te toe mahaki fakamataku. Pea ʼi tona mamahi , neʼe pāui fēnei ia Sopo ki te ʼAtua: “Â! Kanapau lā neʼe ke fakanono au ʼi te Seole!” (Vaega 13) Neʼe fakaʼuhiga e Sopo ia te Seole ko he puleʼaki moʼo fakagata tona ʼu mamahi. Pea ohagē pē ko he koloa neʼe fufū e te ʼAtua, ʼe ʼāteaina anai ʼi ai mai te ʼu ʼahiʼahi pea mo te mamahi. *
Neʼe tonu koa ke liliu te Seole ko he nofoʼaga ʼo Sopo ʼo talu ai. Neʼe tui papau ia Sopo ʼe mole fēia anai. Neʼe toe hoko fēnei tana faikole: “Â! Kanapau lā ʼe ke tuku mai kiā au he tuʼakoi ke ke manatuʼi ai au!” Neʼe tui mālohi ia Sopo ʼe nofo fakatemi pē ia ʼi te Seole pea ko Sehova ʼe mole ina galoʼi anai ia ia. Neʼe fakatatau ʼe Sopo ia te temi ʼaē kā nofo ai ʼi te Seole ko hona ‘maʼua’—ko he temi ʼe fakamaʼua ai ke nofo ʼo ʼatalitali. ʼO aʼu ki ʼāfea? Neʼe ina tali fēnei: “ ʼO aʼu ki te haʼu ʼo toku fetogi.” (Vaega 14) Ko tona fetogi ʼaia ʼe fakaʼuhiga anai ki tona fakaʼāteaina mai te Seole, ʼaē ko tona fakatuʼuake mai te kau mate.
He koe neʼe tui papau ia Sopo ʼe haʼu anai tona fetogi? Koteʼuhi he neʼe kua ina ʼiloʼi te ʼofa ʼo totatou Tupuʼaga ki tana ʼu kaugana agatonu ʼaē kua mamate. Neʼe ʼui fēnei ʼe Sopo: “ ʼE ke pāui anai, pea ʼe au tali atu anai. ʼE ke fakatalitali mālohi anai ke ke sio ki te gāue ʼo tou ʼu nima.” (Vaega 15) Neʼe ʼiloʼi e Sopo ko ia ko te fua ʼo te gāue ʼo te ʼu nima ʼo te ʼAtua. Ko te Matapuna ʼo te Maʼuli, ʼaē neʼe ina faʼufaʼu te maʼuli ʼo Sopo ʼi te loto fatu ʼo tana faʼē, ʼe ina lava toe fakatuʼuake ia ia mai te mate ke toe maʼuli.—Sopo 10:8, 9; 31:15.
ʼE fakamahino mai kiā tātou e te ʼu palalau ʼa Sopo ia te ako lelei ʼo ʼuhiga mo Sehova: ʼE ʼofa makehe ia kiā natou ʼaē, ʼe natou hagē ko Sopo, ʼe natou tuku tonatou maʼuli ki tona ʼu nima, pea mo natou tali ke ina gāueʼi ia nātou ke natou liliu ko he ʼu hahaʼi ʼe leleiʼia ʼaupitō ki ʼona mata. (Isaia 64:8) ʼE ʼofa mamahi ia Sehova ki tana kau ʼatolasio agatonu. ʼE ʼi ai ‘tana fakaʼamu maʼa tana ʼu hahaʼi agatonu ʼaē kua mamate. Neʼe ʼui fēnei e te tagata poto ʼo ʼuhiga mo te kupu Fakahepeleo ʼaia neʼe fakaliliu mai ai, ʼe “ko te lagi kupu ʼaia ʼe mālohi ake ʼi te ʼu kupu ʼaē ʼe talanoa ʼo ʼuhiga mo te ʼu fakaʼamu mamahi.” ʼE mole gata pē kiā Sehova tana manatuʼi tana ʼu kau ʼatolasio kae, ʼe ina toe fakaʼamu foki ke ina fakatuʼuake ia nātou ki te maʼuli. *
Kae meʼa lelei, ʼi te ʼu ʼuluaki tohi Fakatohi-tapu ʼaē neʼe kua maʼu ʼi te temi muʼa, ʼi te tohi ʼo Sopo, neʼe fakahā ai e Sehova tana fakatuʼutuʼu ʼaē ke ina fakatuʼu ake te kau mate. ʼE loto e te ʼAtua ke ina toe fakatahiʼi ia koutou pea mo nātou ʼaē ʼe kotou ʼoʼofa ai kae kua mamate. Pea ko te manatu ʼaia ʼe feala ke ina fakamaʼamaʼa iā tātou te mamahi ʼi te mate ʼo he tahi. Kae he koʼē ʼe mole kotou ako ke kotou ʼiloʼi ia te ʼAtua ʼofa ʼaia pea mo ako peʼe feafeaʼi hatatou tuku ia ia ke ina gāueʼi ia tātou ke tou kau kiā nātou ʼaē kā natou sisio anai ki te fakahoko ʼo Tana fakapapau ʼaia?
[ʼU nota]
^ ʼE tou lau fēnei ʼi te tohi ʼo ʼuhiga mo te ʼu palalau ʼaē neʼe fai ʼe Sopo, ko te kupuʼi palalau “fakanono au” ʼe fakaʼuhiga “ke ke tuku au ʼi he koga meʼa ʼe au nofo puipui ai ohagē ko he koloa maʼuhiga.” Pea ʼe ʼui ʼi te tahi tohi ʼe fakaʼuhiga te ʼu palalau ʼaia “ke ke fufū au ohagē ko he koloa.”
^ Kapau ʼe kotou fia maʼu he tahi ʼu manatu ʼo ʼuhiga mo te fakapapau ʼaia ʼi te Tohi-Tapu ʼo ʼuhiga mo te fakatuʼuake ʼo te kau mate ʼi he mālama foʼou faitotonu, kotou vakaʼi te kāpite 7 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼaē neʼe tā ʼe te kau Fakamoʼoni ʼa Sehova.