Sulat Gikan sa Mexico

“Gihigugma ba Mi ni Jehova Bisag mga Indian Mi?”

SI Melesio, nga O’dam ug pinulongan, usahay molugsong gikan sa bukid aron mangitag trabaho. Siya magtambongan sa Kristohanong mga tigom ug magdalag literatura sa Bibliya inigpauli aron ipaambit sa iyang mga kauban sa tribo. Siya mihangyo nga may moduaw kanila ug tudloan sila bahin sa Bibliya.

Ang O’dam, usa ka nahilit kaayo nga etnikong grupo, nagpuyo sa Sierras sa amihanan sa sentral Mexico, mga 240 ka kilometros gikan sa labing duol nga kongregasyon sa mga Saksi ni Jehova. Ubay-ubay kanamo ang nakahukom nga moduaw kanila.

Sa dihang nakaandam na mig sakyanan nga pick-up, mga tolda, ug tulganan, ug ingon man igong pagkaon ug gasolina alang sa tulo ka adlaw, kami nanukad sa siyudad sa Durango. Migikan mi sa alas kuwatro sa kaadlawon ug mibiyaheg walo ka oras latas sa abogon nga dalan sa kabukiran. Mao kini ang agianan paingon sa dapit sa mga O’dam. Sa unahan mao ang usa ka lawom nga lugot ug may lain pang bukid.

Among gibilin ang pick-up sa usa ka ranchito o sityo, ug sa misunod nga tulo ka oras kami nagbaktas dala ang among mga gamit padulhog sa ubos sa lugot. Didto, nagkampo mi ug nagkuhag mga kahoy aron magdaob aron dili moduol ang ihalas nga mga mananap, ug unya nagrelibohay mig katulog kada tulo ka oras aron dili mapalong ang kalayo.

Pagkabuntag sayo, nanungas mi sa bukid. Daghan ang agianan ug pirme ming masaag. Usa sa among grupo may gamayng nahibaloan sa pinulongang O’dam, busa nagsangyaw mig kadiyot sa mga balay nga among maagian. Nakurat mi kay gisultihan mi sa mga tawo nga sa Los Arenales nga among adtoan, duna konoy mga Saksi ni Jehova ug sila dunay gihimong Biblikanhong mga panagkatigom. Kini makapahibulong apan makapadasig nga balita.

Kami nangabot sa Los Arenales nga naluthan ang mga tiil. Niini nga dapit, katagkatag ang mga balay nga tisa ug karton ang mga atop—walay eskuylahan ug elektrisidad. Kay layo sa sibilisasyon, ang mga tawo pobre kaayo, nga nabuhi lang sa bibingka  nga mais. Among nahibalag si Melesio, nga yagpison nga batan-ong lalaki nga nalipay kaayo sa pagkakita kanamo. Iya ming gidala sa iyang gamayng balay ug giingnan mi nga nag-ampo siya kada adlaw nga si Jehova magpadala unta sa Iyang mga Saksi aron tudloan ang iyang pamilya ug iyang mga kauban sa tribo bahin sa Bibliya. Iyang gibati nga siya dili makatubag sa tanan nilang pangutana bahin sa Bibliya.

Ang mga O’dam nagtuo ug shamanismo. Sila mogamit ug mga anting-anting sama sa balhibo ug bukog sa agila, mosimba sa mga puwersa sa kinaiyahan, ug nahadlok sa mga shaman, nga mangdaogdaog kanila. Miingon si Melesio nga sa dihang iyang nakat-onan sa iyang mga biyahe didto sa siyudad nga si Jehova mao ang tinuod nga Diyos, iyang gihanaw ang tanan niyang idolatrosong mga gamit. Ang iyang mga kauban sa tribo nagtuo nga patyon siya sa ilang mga diyos. Sa dihang walay nahitabo kaniya, ilang nakita nga si Jehova mas gamhanan pa kay sa ilang mga diyos. Busa miapil sila sa pagtuon sa Bibliya nga gidumala ni Melesio uban sa iyang pamilya, ginamit ang atong literatura.

“Giingnan ko sila nga sunogon una ang tanan nilang mga anting-anting ug mga idolo,” matod ni Melesio. Nabuntog sa daghan ang ilang kahadlok sa mga patuotuo, ug miuswag ug kapin sa 80 ang tigtambongan sa tigom. Kay nalipay sa pagkadungog niini, kami nagtigom nianang hapona mismo. Among gipamalihogan ang mga nagsakayg kabayo nga balitaan kadtong nagtambongan sa balay ni Melesio. Bisan tuod nga kadto tungatunga sa semana ug dinalidali ang pagpahibalo, dihay 25 nga nanambong nga nagbaktas ug nagsakayg asno.

Gitubag namo ang ilang mga pangutana sa Bibliya nga giinterpretar ni Melesio. Ingon niini ang ilang mga pangutana: “Gihigugma ba mi ni Jehova bisag mga Indian mi?” “Dunggon ba ni Jehova ang pag-ampo sa pinulongang O’dam?” “Kon moabot ang Armagedon, luwason ba pod kaha mi ni Jehova bisan tuod kami layo na kaayo sa siyudad?” Ginamit ang Bibliya, among gipasaligan kining mapainubsanong mga tawo nga si Jehova nahingawa sa mga maaghop bisan unsa pa ang ilang pinulongan o bisan sila naa sa hilit. Mihangyo sila nga duna untay moadto kanila aron sila tudloan pag dugang.

Human sa tigom, gipaambit namo ang among pagkaon niining bag-ong mga higala. Tungod kay bukid ang maong dapit, tugnaw kaayo pagkagabii, busa mapasalamaton mi sa dihang ila ming gihatagag lawak nga katulgan bisag wala pa kini mahuman. Sa pagkabuntag gihatod mi ngadto sa among pick-up agi sa laktod nga dalan, ug mibiyahe mi balik sa Durango nga gikapoy apan malipayon.

Pagkadakong pribilehiyo nga mahibalag kining sinserong mga tawo, nga ang kadaghanan dili makabasa ug makasultig Espanyol apan gustong makakat-on bahin sa matuod nga Diyos ug mosimba kaniya! Sukad sa among pagduaw, may nakaadto na usab didto nga unom ka Saksi nga miestar ug tulo ka semana. Sila naghatag ug espirituwal nga tabang sa mga 45 ka tawo nga buot gayong moalagad kang Jehova. Silang tanan regular nga nagtambong sa mga tigom.

Ania pay lain. Ang bugtong gamayng tindahan sa Los Arenales wala na mamaligyag sigarilyo. Tungod kini kay daghan na kaayo ang nagtuon sa Bibliya ug sila miundang na sa pagpanigarilyo. Gihimo na usab nilang legal ang ilang kaminyoon.

[Hulagway sa panid 24]

Si Melesio uban sa iyang asawa, upat ka anak nga babaye, ug ugangang babaye

[Mga hulagway sa panid 25]

Pagtuon sa Bibliya ug Kristohanong tigom didto sa Los Arenales

[Picture Credit Line sa panid 25]

Servicio Postal Mexicano, Correos de Mexico