Ileta Nọ I No Obọ Mexico Ze

“Kọ Jihova O You Omai Dedenọ Mai Yọ Ahwo Iwhre nọ I Rovie Aro Ho?”

MELESIO, ọzae jọ nọ ọ rẹ ta ẹvẹrẹ O’dam nọ ọ be rria ofẹ igbehru, ọ jẹ hae ziọ obọ otẹwho te gwọlọ iruo. Ọ jẹ hae ziọ iwuhrẹ Ileleikristi mai jẹ wha ebe jọ nọ a kere no Ebaibol ze kpo nọ o re se kẹ ahwo iwhre riẹ. Ọ lẹ omai inọ ma vi ohwo jọ bru rai nyai wuhrẹ ae kpahe Ebaibol na ziezi.

Ahwo O’dam, a be rria ẹkwotọ igbehru nọ i kpehru gaga evaọ ofẹ ẹkpẹlobọ ovatha-ọre udevie orẹwho Mexico nọ u si oma no gaga, onọ o rọ emaele udhuhrẹ gbikpe (150) thabọ no ukoko Isẹri Jihova nọ o mae kẹle etẹe. Mai ahwo jọ ma tẹ jiroro nọ ma rẹ nya bru rai.

Ma tẹ gwọlọ ipikọpo, wọ etapolini nọ a rẹ rọ gha uwou-owhre họ, gbe ito nọ a re kiẹzẹ, ma tẹ jẹ wha emu buobu gbe epẹtiro nọ i re te kẹ onya edẹ esa, ma tẹ wọ no ẹwho Durango ruọ edhere. Ma ruọ edhere evaọ ighọjọ ene irioke, ma tẹ dhẹ euwa eree evaọ edhere igbehru nọ ovu ọ vọ, rite oka edhere na. Etenẹ ẹkwotọ ahwo O’dam o jo muhọ vrẹ, avọ ukiekpotọ udidi jọ gbe ugbehru nọ e nwane rrọ aro.

Ma nyasiọ ipikọpo na ba iwhre jọ, ma te mu owọ họ ẹrọ nya euwa esa avọ ekwakwa mai nọ ma wọ be whrẹrẹ ruọ ukiekpotọ na. Ma tẹ gha etapolini uwou-owhre mai họ, gwọlọ ire nọ ma ro koko erae họ nọ e rẹ sae whaha erao ẹwọ nọ i re bru omai ze, jẹ ghale omamai re ahwo jọ a tẹ wezẹ euwa esa no a vẹ kpama bi fou erae na re ahwo ọdekọ a ruẹse wezẹ re.

Ohiohiẹ gaga evaọ okiokiọ riẹ, ma te mu obọ ehru ugbehru na họ ẹgadiẹ nya. Idhere buobu e jariẹ, fikiere ma vru kpohọ ofẹ ofa unuẹse buobu. Omọvo mai jọ ọ riẹ ẹvẹrẹ O’dam omojọ, fikiere ma tẹ jẹ ta usiuwoma kpẹkpẹe kẹ ahwo nọ a jọ iwou nọ ma jẹ nyaku. U gbe omai unu nọ ahwo a jẹ vuẹ omai inọ u wo ahwo jọ evaọ iwhre Los Arenales, oria nọ ma je kpohọ na, nọ a se omarai Isẹri Jihova gbe nọ a be hai kuomagbe wuhrẹ Ebaibol na evaọ etẹe. Dede nọ onana u gbe omai unu, o kẹ omai evawere gaga.

Ukuhọ riẹ, ma te te iwhre Los Arenales, avọ awọ mai nọ i horie. Iwou nọ a rehọ ọviẹ bọ jẹ rehọ ekatọno egaga tehe ehru rai wọhọ idhe eye e rrọ iwhre na godo godo—isukulu hayo ikpẹ ẹlẹtriki  e riẹ hẹ. Fikinọ a thabọ no eria efa kpobi, uvuhu o da ahwo iwhre na oma fia; ebrẹdi nọ a rọ eka ru gbe emeware efa jọ họ emu nọ a jọ etẹe wo. Ma tẹ te ruẹ Melesio, ọzae ọkaoma na, yọ eva e were riẹ gaga nọ ọ ruẹ omai. O zizie omai kpobọ uwou riẹ jẹ vuẹ omai inọ ọ be hae lẹ kẹdẹ kẹdẹ inọ Jihova o vi Isẹri riẹ ze te rọ Ebaibol wuhrẹ ahwo uviuwou riẹ gbe ahwo O’dam nọ a kiọkọ. Ọ ta nọ ọ be sae za enọ rai kpobi hi.

Ahwo O’dam a rẹ gọ imizi. A rẹ rehọ ileli gbe igbenwa ugo ru enua gbe ekpọfia, a rẹ gọ eware sa-sa jẹ dhozọ enuahwo, enọ e rẹ ta ozọ họ ai oma nọ a jẹ rọ igho gbe ekwakwa rai ze kẹ iruẹru imizi rai. Melesio ọ ta inọ okenọ o kpohọ obọ otẹwho, jẹ jọ obei wuhrẹ inọ Jihova họ Ọghẹnẹ uzẹme na, ọ tẹ raha ekwakwa emedhọ riẹ kpobi. Ahwo iwhre na a je rẹro nọ imizi na e te tehe iei kpe. Nọ uvumọ oware o via kẹe he, ahwo na a te vuhumu nọ Jihova ọ ginẹ ga vi edhọ rai. Fikiere a te je kuomagbe uwuhrẹ Ebaibol nọ Melesio ọ jẹ rọ ebe mai ru kugbe uviuwou riẹ.

Melesio ọ ta nọ: “Mẹ vuẹ rai inọ oware ọsosuọ nọ a re ru họ, a rẹ mahe igbelẹ gbe emedhọ rai.” Ibuobu rai a fi ozodhẹ orọ ugbẹrọwọ rai kparobọ, ahwo nọ a je kpohọ uwuhrẹ Ebaibol evaọ uwou Melesio a te ti bu te udhone. Nọ ma yo onana, u gbe omai unu gaga, ma tẹ jiroro nọ ma re ru ewuhrẹ evaọ uvo ẹdẹ yena. Ma te vi ahwo nọ e dhẹ enyenya nyae vuẹ ahwo nọ e jẹ hae ziọ uwou Melesio kẹ uwuhrẹ ẹsikpobi na inọ a nyaze. Dede nọ ẹdẹ nana yọ udevie-oka, yọ ma vabọhọ ae, ahwo udhegbisoi a nyaze, ejọ e nyotọ ze efa e dhẹ enyenya esese ze.

Ma kẹ iyo enọ nọ ahwo na a wo kpahe Ebaibol, yọ Melesio ọ be rọ ẹvẹrẹ rai fa otọ eme na kẹ ae. A nọ enọ wọhọ: “Kọ Jihova o you omai dedenọ mai yọ ahwo iwhre nọ i rovie aro ho?” “Kọ ọ rẹ kuyo elẹ nọ ma rọ ẹvẹrẹ O’dam lẹ sei?” “Okenọ Amagẹdọn ọ te ze, kọ Jihova ọ te kareghẹhọ omai, nọ orọnọ ma be rria thabọ no ikpewho na?” O jọ oware evawere kẹ omai nọ ma rọ kẹ ahwo omaurokpotọ nana imuẹro no Ebaibol ze inọ Jihova ọ rẹ daezọ ahwo nọ e rọ oma kpotọ, ghelọ ẹvẹrẹ rai hayo oria nọ a be rria. A lẹ omai inọ ma vi ohwo jọ bru rai nọ o re wuhrẹ ai eware efa.

Nọ ewuhrẹ na o kuhọ no, mai gbe egbẹnyusu ekpokpọ mai nana ma tẹ gbẹ re emu nọ ma wha lele oma. Whaọ aso o te no, yọ ekpahe oria na e rrọ gaga, fikiere eva e were omai gaga nọ a kẹ omai uwou jọ nọ a bọ kẹle ere no inọ ma wezẹ. Evaọ ohiohiẹ okiokiọ riẹ, a tẹ rọ edhere ọvẹvẹrẹ jọ su omai kpohọ oria nọ ma nyasiọ omoto mai ba na, ma te zihe kpohọ ẹwho Durango, oma o rọ omai gaga rekọ iyẹrẹ nọ i no erẹ nana ze e da omai ẹro fia.

O jọ uvẹ-ọghọ ulogbo nọ ma rọ ruẹ ahwo evezi nana, enọ ibuobu rai e riẹ epanọ a re se obe hayo kere he, yọ a rẹ sae ta ẹvẹrẹ Spen hi, rekọ a gwọlọ wuhrẹ kpahe Ọghẹnẹ uzẹme na, jẹ gọe! Anwẹnọ ma ro kpohọ obei zihe ze no na, inievo ezeza mai a nya jẹ rria etẹe eka esa no. A fi obọ họ kẹ ahwo udhuvẹ gbe isoi no, enọ e ginẹ gwọlọ gọ Jihova. Aikpobi a be hai kpohọ ewuhrẹ ẹsikpobi.

U wo emamọ oware ofa jọ re. A gbẹ be jọ uwou-eki osese ovo nọ o rrọ Los Arenales na zẹ isigareti hi. Oware nọ o wha onana ze họ, ahwo buobu evaọ iwhre na a bi wuhrẹ Ebaibol, fikiere a siọ isigareti ba evovo no. Ibuobu rai a ru orọo rai lele uzi no re.

[Uwoho nọ o rrọ ẹwẹ-obe avọ 28]

Melesio avọ aye riẹ, emetẹ ene riẹ, gbe oni-aye riẹ

[Iwoho nọ e rrọ ẹwẹ-obe avọ 29]

Obe-uwuhrẹ Ebaibol gbe ewuhrẹ ukoko evaọ Los Arenales

[Ọnọ o wo uwoho nọ o rrọ ẹwẹ-obe avọ 29]

Servicio Postal Mexicano, Correos de Mexico