MELESIO, tuˈugë yetyëjk diˈib kyajpxypyë oˈdam. Näˈä gänäˈäty ijty nyijkxy mëduumbë mä syudad. Ets ta jam nyijkxy mä nyaymyukëdë Jyobaa tyestiigëty ets tˈaxäjë ëxpëjkpajn diˈib myëjjëmbijtypy mä kyäjpn parë tmoˈoyë jäˈäy. Nan xyˈanmääytyëbëts mëktaˈaky parëts nëjkxtët mä tsyëënë etsëtsë Diosë yˈAyuk ndukniˈˈixëdët.

Pënaty kyäjxtëbë oˈdam diˈib nanduˈun yajtijtëp tepehuanos tunoty kopkoty tsyëënëdë mä Sierra Madre Occidental. Yëˈë naymyujkën diˈib mas wingon wëˈëmp ja jyagamëty 240 kilometrë. Tuˈugë xëë, tajëts nduknibëjtakëdë niganääk nëjkxäˈändë.

Tajëts nˈijxtë tuˈugë kamionetë, witëjk, tijatyëts ndukmäˈädëp, tijatyëts njëˈxtëp tëgëk xëë ets nanduˈunë gasolinë. Jats ntsoˈondë Durango a las 4 de la mañana. Tuktujk oorëts jawyiin nbajttë tunoty kopkoty. Ets mä kyexyë karreteerë jamën mä tsyondaˈaky ja yˈit lyugäär pënaty kyäjpxtëbë oˈdam. Tajëts nˈijxtë ko aktimwinjënakandëptsë naty, etsëts ja tuˈugë kopk ninaxäˈändë.

Tajëts nikatë ja kamionetë mä tuˈugë rantsyë ets ntsëmëˈktëts ja nxuumy parëts tekyyeˈepy ojts nëjkxtë. Tëgëk oorëts nwinjënäjktë, tajëts jam nyaˈoˈoyëdë witëjk ets nˈëxtääytyëtsë jäˈäxy parëts ojts nyajmëjëdë jëën këdiibëts ja jëyujk animal xymyëwingondët. Ets parë kyaj pyiˈitsët, tajëts naytyukniwijtsëdë tëgëk ooraty nguentˈattët.

Ko xyëëntyaky, tajëts ja kopk nˈëxwäˈkëdë, per jantsy kanäägë paduˈu ets kanäk okëts ndëgooytyë. Per diˈib tyukˈoy, yëˈë ko niduˈuk mä ëëtsëty jyajtypy wanatyë tepehuano, tajëts ojts nmëtmaytyäˈäktë jäˈäy mäjatyëts ja tëjk nbäättë. Mëj mëdooyëts ojts njawëdë kots nyaˈˈanmääytyë ko mä ja käjpn mäjëts nëjkxtë, diˈib xyëˈäjtypy Los Arenales, tamë jäˈäy diˈib jënandëp ko Testiigëty ets ko naymyujkëdëp. Kyajts njamëbëkandë, per jantsy oyëts nmëdoodë.

Kojëts njäjttë Los Arenales, tëjëtsë natyë ndeky jyantsy tyukpëjijëˈktäˈäytyë mët ko jekyëts të njantsy tyuˈuyoˈoytyë. Mä tyäˈädë lugäär jeˈeyë naty jyamëty tuˈuk majtskë muutsy tyëjk diˈib nyikëˈëyˈajtypyë kartonk. Kyaj naty jyamëtyë eskuelë ets ni jëën. Ets ja jäˈäyëty jantsy ayoodëp, jagam it jagam lugäär yajpäättë ets yëˈëyë  kyaaytyëbë mok ets jam ti gatiijëty tmëdattë. Taanëmtsë net nbattë Melesio, diˈib jantsy jotkujkëtyaay kojëts xyˈijxpattë ets tajëts netyë xywyoodë mä proobë tyëjk. Tyäˈädë yetyëjk ta jyënany ko xëmë naty të tˈamdoyë Jyobaa parë tkaxëdë Testiigë, diˈib tukniˈˈixëdëbë Biiblyë mëdë fyamilyë ets nanduˈun ja myëgugäjpn. Pes yëˈë kyaj naty tnijawë wiˈix tˈatsoojëmbitët tijaty yajtëëjëdëp.

Yëˈë oˈdam jäˈäyëty tyuundëbë brujëˈäjtk. Yëˈë yajtuundëbë päjk etsë witsn jëmk parë nyaytyukuwäˈänëdë, ets yëˈë yˈawdäjttëbë it naxwinyëdë ets tsyëˈkëdëbë brujëtëjk diˈib winˈëˈënëdëp. Melesio tajëts xytyukmëtamytyaktë ko mä syudat jam tnijäˈäjë ko Jyobaa yëˈë Dios diˈib tëyˈäjtën, ets pääty dyajkutëgooytyaay tukëˈëyë yˈawinax. Ja myëdëjkpäˈäjëty, ta yˈanmääyëdë ko yaˈoogëdëbë net ja diˈib diosˈäjttëp, per kom kyaj wiˈix jyajty, ta tpëjktë kuentë ko Jyobaa yëˈë diˈib mas niˈigyë mëjää myëdäjtypy. Päätyë net ojts nyëjkxtë mä Melesio dyaˈëxpekyë jyiiky myëguˈuk mëdë ëxpëjkpajn diˈib yajpëtsëëmdëbë Testiigëty.

Melesio ta yˈanmääyëdë ets tnoˈktäˈäytyëdë yˈawinax ets diˈib naytyukkuwanëdëp. May ja jäˈäy kyaj nyekytsyëˈkëdë ets nan kyaj tijaty ojts tnekyyajkäjpxtë. Ets ko waanë yˈijty, ta ojts nyimayëdë 80 naxy mä ja Melesio yaˈëxpeky. Mëjwiin kajaajëtsë tyäˈädë nmëdoodë, päätyëts nduknibëjtakëdë nduˈukmukäˈändë tadë tsuu. Kanäägë jäˈäy tsyoˈondë kuääygyëjxy parë ojts tˈawanëdë pënaty tuˈukmujktëp mä Melesio tyëjk. Ets oyë naty syëmäängujkyëty ets oy jantsy pojënë ojts yaˈˈawanëdë, ja tyuˈukmujktë 25 jäˈäy, tam diˈib jäjttë tekyyeˈepy ets tam diˈib burrëkëjxy.

Melesio yëˈë ojts wyingajpxy parëts nˈanmääytyë ja jäˈäy ets dyajtëwdët tijaty nyijawëyandëp mä Biiblyë. Nääk proobë tyäˈädë jäˈäyëty, ta dyajtëëdë: “¿Xytsyojktëbëtsë Jyobaa oyëts nˈindijënëˈattë?”, “¿Myëdooˈijtypyë Jyobaa kots nmëgäjpxtë mätsë nˈayuk?” ets “Ko myinëdë Armajedon, ¿nëjkxëbëtsëdaa xyjamyatstë oyëts jantsy jagam ntsëënëdë?”. Jantsy oyëts nayjäˈäwëdë kots ndukmëtmaytyaktë ko Jyobaa tsyejpyë jäˈäy diˈib oyë jyot kyorasoon, oy ti ayuk tkäjpxtët ets oy mä tsyëënëdët. Kots nyajjëjpkëjxtë, tajëts xyˈamdoodë mayˈäjtën etsëts pën ngaxtët parë mas niˈigyë tyukniˈˈixëdët.

Ko ja naymyujkënë jyëjpkejxy, tajëts mëët ngääy nˈuktë tyäˈädë njiiky nmëguˈugëtyëts. Ta ojts kyootsënë, ets kom jantsy këjxmë tyäˈädë lugäär mëk jyantsy xyuxy o tyëtykyëty, tajëts ojts xyajmäˈädë mä tuˈugë tëjk diˈibë naty kyojtëp. Ja kum bom, tajëts ojts xymyënëjkxtë mä tuˈu yaˈˈayoˈoytyuky parëts njäjttë mä ja kamionetë. Jantsy anuˈkxëts njäjttë Durango, per jantsy agujk jotkujk.

Jantsy oyëts nayjäˈäwëdë kojëts nˈixyˈäjttë tyäˈädë jäˈäyëty. Mëjwiin kajaa tˈixyˈatäˈändë ets tˈawdatäˈändë Diosë tëyˈäjtënbë, oy tkamëdattë ëxpëjkpajn mä yˈayuk. Axtë tyambäät të jatëgok nyijëmbitëdë nidëdujkë Testiigë. Ja ojts yˈittë tëgëk sëmään, ets ja ojts dyaˈëxpëktë 45 jäˈäy diˈib myëdunandëbë Jyobaa. Ets tyam, niˈamukë tyäˈädë jäˈäy nyëjkxtë mä naymyujkën.

Ets tyä ja tuk peky diˈib të tyuny të jyatyëty: mä tyäˈädë käjpn Los Arenales, jeˈeyë jam tuˈugë tiendë, mä natyë tabakë yajtooky, per tyam kyaj yˈokˈyajtoˈknë. ¿Tiko? ¡Yëˈko jantsy nimayë jäˈäy tˈëxpëjknëdë Biiblyë ets kyaj pën yˈokjuˈknë! Nan mayë jäˈäy të syëbilpëktë diˈibë naty duˈunyë tsënääytyëp.

[Letrë diˈib miimp mä dibujë mä pajina 31]

Melesio, nyëdoˈoxy, taxkë nyëëx etsë myëˈt

[Letrë diˈib miimp mä dibujë mä pajina 32]

Yˈëxpeky tuˈugë jäˈäy ets tyuˈukmuktë Los Arenales

[Letrë diˈib miimp mä dibujë mä pajina 32]

Servicio Postal Mexicano, Correos de México