México nacionmanta carta

¿Munakunchu Jehová Dios hawa llaqtamanta runakunata?

MELESIO sutiyoq runan mayninpi hawa llaqtamanta Durango hatun llaqtaman haykumuq llank’anata maskhaq. Chay kutikunapiqa Jehová Diospa testigonkunaq huñunakuyninmanmi riq, hinaspa askha qelqakunata apaq reqsisqan runakunaman rakimunanpaq. Chaymantapas Testigokunatan valekuwaqku llaqtanta rispa Bibliamanta yachachimunaykupaq.

O’dam otaq tepehuano runakunaqa México nacionpa norte ladonpin tiyanku, Sierra Madre Occidental nisqapi. Chay llaqtamanta aswan qayllapi Jehová Diospa testigonkunaq iñiq t’aqanqa 240 kilómetros hinapin tarikun. Huk p’unchaymi wakinniyku chay llaqtaman viajanaykupaq decidikurqayku.

Conseguirqaykun huk camionetata, toldokunata, puñunapaq bolsakunata, mikhunata, kinsa p’unchaypaq gasolinatawan. Durango llaqtamantan 4 horas illarimuyta lloqsirqayku, pusaq horan orqo-orqonta rirqayku. Carroq purinan carretera tukuytan huk ñan karqan O’dam runakunaq tiyasqanman rinapaq. Ñawpaykupin hatun barrancota orqotawan rikurqayku.

Camionetaykuta huk huch’uy llaqtachapi saqespan chakillapi purirqayku q’epikunata aparikuspa. Kinsa horapin sayanpa qhata urayman purispa chayarqayku. Chaypin toldokunata armarqayku hinaspa llant’a maskhaq rispa ninata hap’ichirqayku animalkuna ayqekunankupaq. Tutantin nina hap’inanpaqtaq kinsa horata rikch’anaykupaq turnanakurqayku.

Illarimuytan orqoman seqarqayku, ichaqa askha ñankuna kasqanwanmi huk ladokunaman pantarqayku. Hukniykun pisillata yacharqan tepehuano rimayta, chaymi tarisqayku wasikunapi Bibliamanta predicarqayku. Chaypin runakuna willawarqanku rishasqayku Los Arenales llaqtapiqa Jehová Diospa testigonkuna kasqanta huñunakuykunatapas aparisqankuta. Manan cheqaqpaq hinachu qhawarirqayku ichaqa kusikurqaykun.

Los Arenales llaqtaman chayaqtiykuqa chakiykupas phusulluraqmi kasharqan nishu purisqaykumanta. Chay llaqtachapi wasikunaqa adobemantan kasqa techontaq cartonmanta, manan escuelapas luzpas kasqachu. Chaypi tiyaq runakunaqa sinchi wakchan kasqaku, runakunamanta t’aqasqa  hina kawsasqaku, saramanta tortillakunata hukkunatawantaq mikhusqaku. Chaymantataq Melesiota tarirqayku, payqa kusisqan kasharqan chaypi rikuwaspanku, hinan wasinman pusaywarqanku. Paymi willawarqanku: “Sapa p’unchaymi Jehová Diosmanta mañakusharqani Testigokunata kachamunanpaq, chhaynapi familiayta comunidadniypi runakunatawan Bibliamanta yachachinankupaq. Imaymanatan tapuwanku, manataqmi llapan tapukuyninkuman kutichiyta atinichu”, nispa.

O’dam runakunaqa watuykunatan yachanku. Ankaq tullunta phurunta ima suertepaq hap’inku, apukunapi pachamama nisqapi ima creenku, layqaq runakunatapas manchakunku, chaymi layqaq runakunaqa paykunamanta aprovechakunku. Melesion willawarqanku Durango llaqtaman viajaspa cheqaq Diosmanta yachasqanta, chaymi lliw yupaychasqan idolonkunata kanapusqa. Vecinokunan nisqaku chay ruwasqanmanta dioskuna wañuchinanta, ichaqa mana imapas pasaqtinmi repararqanku Jehová Dios aswan atiyniyoq kasqanta. Chaymi Testigokunaq qelqankunawan Melesio familianta yachachisqanman riyta qallarirqanku.

Melesion willarqan chayman rinankupaqqa ñawpaqta idolonkuta suertepaq hap’isqanku cosaskunata ima kananankuta. Chhaynapin askha runakuna manaña manchakurqankuchu imaymana creenciakunata, pisi tiempollapitaq 80 runa masña Bibliamanta estudio qosqanman risharqanku. Ancha kusisqan kasharqayku chayta uyarispa chaymi chay tardenpacha huñunakuyta aparinaykupaq rimanakurqayku. Caballopin askha runakunata kacharqayku Melesioq wasinpi huñukuq runakunaman willamunankupaq. Huñunakuy apakunanpaqqa kuskan semanatañan willakurqan hinaspapas chay p’unchayllañan willachirqayku, chaywanpas 25 runakunan chayamurqanku wakin chakipi wakintaq asnopi.

Melesiowan yanapachikuspaykun huñunakuyman hamuqkunata nirqayku imamantapas tapukunankupaq. Chaymi kaykunata tapuwarqanku: “¿Jehová Dios munakuwankuchu hawa llaqta runakunaña kaqtiykupas? ¿Uyariwankuchu rimayniykupi mañakuqtiyku? Armagedón p’unchay hamuqtin, ¿yuyariwanqakuchu sinchi karupiña tiyayku chaypas?” nispa. Kusikurqaykun chay tapuykunaman kutichispa. Bibliawanmi willarqayku Jehová Dios allin sonqoyoq runakunata munakusqanta, maypiña tiyaqtinkupas ima simitaña rimaqtinkupas. Huñunakuy tukuytan valekuwarqanku astawan yachanankupaq pitapas kachanaykupaq.

Chaymantataq mikhunaykuta paykunawan kuska mikhurqayku. Ratullan tutayarqan, chay wichaypiqa nishutan chirin chaymi chayllaraq ruwashasqanku cuartopi qhepakunaykupaq niwaqtinku kusisqa qhepakurqayku. Paqaristintaq camionetaykuman pusawarqanku ratulla chayanapaq ñanninta. Sayk’usqan Durango llaqtaman kutipurqayku ichaqa ancha kusisqa.

Paykunata reqsiyqa kusikunapaqmi karqan. Manaña rimayninkupichu Bibliamanta qelqakuna kanchu chaypas, Jehová Diosmantan tukuy sonqowan yachayta munanku payta yupaychaytapas. Chay p’unchaymantaqa soqta Testigokunañan chay llaqtaman rirqanku. Kinsa semana qhepakamuspankun 45 runakunata Jehová Diosmanta yachachimurqanku. Paykunan Diosta serviyta munarqanku chaymi kunanqa llapan huñunakuykunaman rishanku.

Chaymantapas Los Arenales llaqtapi kaq tiendan tabacota vendeq, ichaqa manañan vendepunchu, ¿imarayku? Askha runa Bibliata estudiaspa manaña fumapusqankurayku. Hinaspapas mana casarakuspalla tiyaqkunan casarakapunkuña.

[26 paginapi foto]

Melesio esposanwan tawa ususinkunawan suegranpiwan

[27 paginapi fotokuna]

Bibliamanta yachachishan, Los Arenales llaqtapi huñunakuy

[27 paginapi kaq fotota horqorqan]

Servicio Postal Mexicano, Correos de México