Lengolo le Tsoang Mexico

“Na Jehova oa re Rata Leha re le Maindia Tjee?”

NTATE e mong oa Moo’dam ea bitsoang Melesio, o ne a tla khafetsa mabalane ho tla batla mosebetsi. O ne a ea libokeng tsa Bokreste ebe ha a khutlela hae o nka lingoliloeng tsa Bibele ho ea li fa sechaba sa habo. O ile a kōpa hore ho be le motho ea ba etelang ho ea ba ruta ho eketsehileng ka Bibele.

Bao’dam, e leng morabe o lulang hōle le merabe e meng, ba phela holimo Mekolokong ea Lithaba Tse Matsaranka tse ka leboea, Mexico bohareng, lik’hilomithara tse ka bang 240 ho tloha phuthehong e haufi ea Lipaki Tsa Jehova. Re ile ra etsa qeto ea ho ba etela re le ’maloa.

Re ile ra fumana vene, ra nka litente le mekotla ea ho robala, lijo tse lekaneng hammoho le peterole ea matsatsi a mararo, eaba re tloha motseng oa Durango. Re ile ra qala leeto ka malungoalungoana, horeng ea bone, eaba re tsamaea lihora tse robeli lithabeng, tseleng e kubeletsang marōle ho fihlela re fihla moo e fellang teng. Mona ke moo ho kenoang le teng ha ho uoa sebakeng sa Bao’dam. Ho ne ho e-na le khohlo e tebileng ka pel’a rōna le thaba e ’ngoe hape.

Re ile ra siea vene motsaneng o mong, eaba re tsamaea ka maoto lihora tse tharo kaofela re theosa khohlo eo, re jareletse thepa ea rōna ho fihlela re fihla tlaase. Teng re ile ra hloma litente, ra roalla patsi e lekaneng hore re etse tetema ea mollo e le ho leleka liphoofolo tse hlaha, eaba re robala lihora tse tharo ka ho fapanyetsana e le hore ho be le ea ntseng a beselletsa mollo.

Hoseng ha letsatsi le hlahlamang, re ile ra qala ho nyolosa thaba. Ho ne ho e-na le litsela tse ngata thabeng moo, ka hona re ile ra lahleha ka makhetlo a ’maloa. E mong sehlopheng sa rōna o ne a tseba Seo’dam hanyenyane, ka hona re ne re tsamaea re bolella ba metseng eo re fetang ho eona molaetsa oa Bibele ka bokhutšoanyane. Re ile ra makala ha re utloa batho ba re bolella hore motseng oo re habileng ho oona, oa Los Arenales, ho na le ba ipitsang Lipaki Tsa Jehova, ba bile ba tšoara liboka tsa Bibele hona moo. Litaba tsena li ile tsa re makatsa haholo le hoja ka lehlakoreng le leng li ile tsa re khothatsa.

Re ile ra fihla Los Arenales re babaila ke machachetsi maotong. Motse oo o ne o e-na le matlo a makote a qaqolohaneng a ruletsoeng ka lik’hateboto —ho se sekolo, ho se motlakase. Kaha motse oo o hōle haholo le metse e meng, batho ba moo ba kolla ntsi hanong, ba iphelisa ka ho rekisa liphaphatha tsa poone le lintho tse ling tse fokolang. Re ile ra fumana Melesio, ntate ea mosesaane ea sa leng mocha lilemong, ea ileng a thaba haholo ha a re bona. O ile a re memela ntlong ea hae ea boemo bo itekanetseng eaba o re bolella hore letsatsi le letsatsi o ne a rapela Jehova hore a romele Lipaki tsa Hae hore li tl’o ruta lelapa la hae le Bao’dam ba bang Bibele. O ile a re o ne a sitoa ho araba lipotso tsa bona kaofela.

Bolumeli ba Bao’dam ke boshaman. Ba sebelisa lithatho tse kang masiba le masapo a ntsu, ba rapela matla a tlhaho ’me ba lula ba tšohile bo-shaman, e leng baeta-pele ba bona bao ha e le hantle ba ba hanyapetsang. Melesio o re ha a ntse a etela toropong ’me a ithuta hore Jehova ke Molimo oa ’nete, o ile a senya lintho tsa hae tse amanang le borapeli ba litšoantšo. Batho motseng oa habo ba ile ba lebella hore melimo ea bona e tl’o mo fa kotlo ea lefu. Ha seo se sa etsahale, ba ile ba elelloa hore Jehova o matla ho feta melimo ea bona. Ka lebaka leo, ba ile ba qala ho tla thutong ea Bibele eo Melesio a neng a e tšoara le lelapa la hae a sebelisa libuka tsa rōna.

Melesio o re: “Ke ile ka ba bolella hore ba lokela ho qala ka ho chesa lithatho tsa bona le litšoantšo tseo ba li rapelang.” Ba bangata ba ile ba hlōla tšabo eo ba neng ba e-na le eona ka lebaka la litumela-khoela ’me palo ea ba tlang thutong ea Bibele ea eketseha ho fihlela e feta 80. Re ile ra hlolloa ke seo re se utloang eaba re etsa qeto ea ho tšoara liboka hona thapameng ea letsatsi leo. Re ile ra kōpa ba bang hore ba tsamaee ka lipere ho ea bolella batho ba tloaetseng ho kopana ntlong ea Melesio. Le hoja e ne e le har’a beke le hona molaetsa o entsoe ka nako e khutšoaane, ho ile ha tla batho ba 25, ba tla ka maoto le ka litonki.

Re ile ra ba le nako ea ho araba lipotso tsa Bibele ’me Melesio o ne a toloka. Batho ba ne ba botsa lipotso tse kang: “Na Jehova oa re rata leha re le Maindia tjee?” “Na o utloa lithapelo tsa Seo’dam?” “Na Jehova o tla re hopola ka Armagedone empa re lula hōle hakaale le metse ea litoropo?” Re ile ra sebelisa Bibele ho kholisa batho bana ba ikokobelitseng hore Jehova o tsotella batho ba ikokobelitseng, ho sa tsotellehe hore na ba bua puo efe kapa hona hore na ba lula hōle hakae. Ba ile ba re kōpa hore re romele motho ea tla tsoela pele a ba ruta.

Ka mor’a liboka tseo, re ile ra arolelana lijo tsa rōna le metsoalle eo ea rōna e mecha. Shoalane e ne e se e tšoere ’me ho ne ho bata haholo kaha sebaka seo se moo ho phahameng, ka hona re ile ra thaba ha re fuoa kamore ntlong e neng e ntse e hahuoa e le hore re robale ho eona. Letsatsing le hlahlamang ba ile ba re felehetsa ho theosa khohlo ka tsela e paroletsang ho leba veneng ea rōna, eaba re khutlela Durango re shoele ke mokhathala empa re khotsofetse.

Ruri e bile tlotla e khōlō hore ebe re kopane le batho bana ba lipelo li ntle, bao boholo ba bona ba sa tsebeng ho bala kapa ho ngola, kapa hona ho bua Sepanishe empa ba batla ho ithuta ka Molimo oa ’nete le ho mo rapela! Ka mor’a leeto leo la rōna, Lipaki tse tšeletseng li se li kile tsa ea motseng oo, tsa lula libeke tse tharo. Li ile tsa thusa batho ba ka bang 45 ba batlang ho sebeletsa Jehova ka lipelo tsohle tsa bona. Kaofela ha bona ba tla libokeng kamehla.

Ntlha e ’ngoe e thahasellisang ke ea hore lebenkele la Los Arenales, leo e leng lona feela le teng motseng oo, ha le sa rekisa lisakerete. Lebaka ke hore batho ba bangata ba ithuta Bibele ’me ba khaolitse ho tsuba. Hape ba bangata ba tiisitse manyalo a bona ka molao.

[Setšoantšo se leqepheng la 24]

Melesio le mosali oa hae, barali ba hae ba bane le mohoehali oa hae

[Litšoantšo tse leqepheng la 25]

Thuto ea Bibele le liboka tsa Bokreste Los Arenales

[Tlhaloso ea Moo Setšoantšo se Nkiloeng Teng e leqepheng la 25]

Servicio Postal Mexicano, Correos de Mexico