Carta xalak México

«¿Kinkapaxkiyan Jehová maski ni kchuwinanaw español?»

MELESIO xalak akgtum aktsu kachikin niku chuwinankan oʼdam, xan putsa taskujut klaklanka kachikin. Chu xan ktamakxtumit xla xtatayananin Jehová chu akxni xtaspita xkachikin xlin libros nema takilhtinit kBiblia chu xkamaxki tiku xkalakgapasa. Na xkinkaskiniyan xTatayananin Jehová pi xaklakgapaxialhnaw chu xakamasiyaniw xlakata Biblia.

Tiku chuwinankgo oʼdam (na kalilakgapaskan tepehuanos) wilakgolh klanka kakiwin xalak México, nema wanikan Sierra Madre Occidental. Congregación niku kwilaw asta niku wilakgolh oʼdam 240 kilómetros xlilakgamakgat. Akgtum kilhtamaku akit chu amakgapitsi natalan klakkaxwiliw nakkalakgapaxialhnanaw.

Kinkamasakwanikan akgtum camioneta chu kputsaw tuku litlawakan laktsu chiki xalhakgat, niku tajukan lhtatakan, tuku nakwayaw chu gasolina nema xkinkaʼakchanin akgtutu kilhtamaku. Lu tsisa, kamakgtati hora ktaxtuw kDurango. Akgtsayan hora ktlawaw asta kchaw xatalhman sipi. Anta niku kgalhsputa carretera anta wi tiji niku laktanukan niku wilakgocha oʼdam. Kkilakatinkan xwi lanka sipi.

Kmakgxtakgwi camioneta kʼakgtum aktsu kachikin chu ktlawaw, kkukaliw tuku xaklinaw. Akgtutu hora klitaktachaw. Anta kawiliw laktsu chiki nema xaklinaw chu kiputsaw kiwi xlakata xakwiliw lhkuyat chu ni xtalakatsuwikgolh animales. Xlakata ni xmixli lhkuyat klakaxwiliw chatunu chatunu akgtutu hora xkuentajtlawalh.

Lichali tsisa ktsukuparaw tlawanaw kʼatanu sipi, pero lhuwa laktsu tiji xʼanan chu makglhuwa kakgtsankgatapuliw. Xlakata chatum tiku xaktaʼanaw xkatsi tsinu chuwinan oʼdam, kalitachuwinaw tamakatsin xalak Biblia akgatunu chiki nema xaktitaxtutilhamaw. Tuku nila xakkanajlayaw wa pi kinkawanikgon pi anta kLos Arenales niku xakamaw xwilakgolh tiku xwankgo pi xtatayananin Jehová chu xtlawakgo tamakxtumit. Ni lu kkanajlaw, pero klipaxuwaw.

Alistalh kchaw kLos Arenales chu kintantunkan lu xkatsan asta taxulh tsinu xlakata lhuwa ktlawaw. Ama aktsu kachikin kaj makgapitsi chiki xwilakgolh nema akgsti cartón chu xpatsaps tiyat xlitatlawanit. Ni anan escuela na ni anan luz. Tiku anta wilakgolh lu nitu kgalhikgo, lakgamakgat  wi lanka kachikin chu kaj chaw wakgo chu atanu tuku limakgatsikgo. Chu ktekgswi Melesio, lu lipaxuwalh akxni kinkaʼakxilhni chu kinkataʼan xchik. Kinkawanin pi chali chali xtlawani oración Jehová chu xwani pi xkamalakgachalh xTatayananin xlakata xkamasiyanika xlakata Biblia xfamilia chu amakgapitsi latamanin. Kinkawanin pi ni la xkakgalhti takgalhskinin nema xtlawanikan.

Tiku chuwinankgo oʼdam skuwanankgo. Limaklakaskinkgo lukut chu xpekgen águila nema lakpuwankgo pi kamakgtaya, na kakninanikgo litliwakga xalak kakilhtamaku, chu latamanin kapekuanikgo skuwananin xlakata katlawani tuku nitlan. Melesio kinkawanin pi akxni xʼan klanka kachikin anta katsinilh pi Jehová xaxlikana Dios, wa xlakata kamalakgsputulh putum tuku xkakninani. Tiku xtalakatsu Melesio wanikgolh pi dioses xamakgolh makgnikgo, xlakata nitu lanilh katsikgolh pi Jehová tlakg kgalhi litliwakga nixawa atanu dioses. Wa xlakata, na tsukukgolh ankgo ktamakxtumit niku Melesio xkamasiyani xparientes xlakata Biblia chu xlimaklakaskin likgalhtawakga xla xtatayananin Jehová.

Melesio kawanilh pi pulana klhkuyukgolh imágenes chu tuku xlakpuwankgo pi xlitamakgtayakgo. Lhuwa nialh pekuanikgolh tuku xkanajlakgo, chu ni makgas titaxtulh max tatipuxum tsukukgolh ankgo xlakata nakamasiyanikan xlakata Biblia. Lu nila xakkanajlayaw tuku kgaxmatwi wa xlakata klakaxwiliw naktlawayaw akgtum tamakxtumit ama kakgotanun. Makgapitsi kkawayu ankgolh xlakata xkamakatsinika tiku xtamakxtumikgo xchik Melesio. Maski tamakxtumit itat semana ktlawaw chu ni tunkun kamakatsinika puxamakitsis tamakxtumikgolh, makgapitsi tlawaminkgolh chu amakgapitsi xkgewilakgolh xburrojkan.

Melesio matitaxtilh kintaʼakgchuwinkan kxtachuwinkan, chu kaskiniw tiku xminkgonit xkinkakgalhskinkgon tuku xkatsiputunkgo xlakata Biblia. Umakgolh tiku ni tlankajwa xwankgonit kinkatlawanikgon umakgolh takgalhskinin: «¿Kinkapaxkiyan Jehová maski ni kchuwinanaw español?», «¿Kinkakgaxmanityan akxni ktlawayaw oración chuna la akinin kchuwinanaw?», «Chu akxni namin Armagedón, ¿nakinkalakapastakan maski lu lakgamakgat kwilaw?». Lu lipaxuw kkalimasiyaniw Biblia niku wan pi Jehová kapaxki tiku tlan likatsikgo, maski lakgamakgat wilakgolh chu tanu tachuwin chuwinankgo. Akxni kgatsputli tamakxtumit kinkaskinikgon pi xakmalakgachaw tiku tlakg xkamasiyanilh.

Akxni kgastputli tamakxtumit, kkatawaw kiliwatkan umakgolh tiku aku kalakgapaswi. Lakapara tsiswalh chu lu xlonkgnan, wa xlakata kinkawanikgon naklhtatayaw kchiki nema aku xtlawamakgolh. Lichali kinkalinkgon chu ktiyaw tiji nema tlakg lakapara xchankan niku xwilacha camioneta. Ktaspitparaw kDurango lu xaktlakgwanitaw, o xakʼakgxuninitaw pero na lu xakpaxuwayaw.

Akinin lu klipaxuwaw pi kkalakgapaswi tiku atanu tachuwin kgalhikgo. Maski ni kgalhikgo likgalhtawakga kxtachuwinkan lu lakgapasputunkgo chu kakninaniputunkgo xaxlikana Dios. Alistalh kgalhchaxan xtatayananin Jehová kalakgapaxialhnamparakgolh. Chu akgtutu semana nema tamakgxtakgkgolh kʼuma kachikin kamakgalhtawakgakgolh tipuxamakitsis tepehuanos tiku skujnaniputunkgo Jehová. Chu la uku putum ankgo ktamakxtumit.

Chu awatiya kkawaniputunan. Kkachikin Los Arenales kaj akgtum pustan anan niku kstakan lixkuli, pero nialh stakan. ¿Tuku xlakata? ¡Xlakata lhuwa likgalhtawakgamakgolh Biblia chu nialh lhuwa tiku xkulikgo! Nachuna tiku kaj xlatawilakgolh tamakgaxtokgkgolha.

[Epígrafe xla página 31]

Melesio, xpuskat, kgalhtati xlaktsuman chu xtse xpuskat

[Epígrafe xla página 32]

Wi tiku limakgalhtawakgamaka Biblia chu akgtum tamakxtumit xla kstalaninanin Cristo kLos Arenales

[Epígrafe xla página 32]

Servicio Postal Mexicano, Correos de México