Li skarta jun krixchano ta Mexicoe

«¿Mi skʼanojunkutik Jeova akʼo mi ta batsʼi kʼop chi kʼopojkutik?»

LI Melesioe jaʼ jun kerem vinik ti oʼdam stsʼunbal ti chkʼopoj ta batsʼi kʼope. Bakʼintike chyal ta vitstikaltik sventa chbat saʼ yabtel ta jteklum. Jaʼ yuʼun chkʼotilan bakʼintik li bu tstsob sbaik li yajrextikotak Jeovae xchiʼuk chichʼ batel vunetik ti lokʼem ta Vivlia sventa chakʼbe li buchʼutik xojtikinane. Jaʼ yuʼun li Melesioe xvokolet chalbunkutik ti akʼo xbat jvulaʼankutike xchiʼuk ti xbat jchanubtaskutik ta Vivliae.

Li j-oʼdametike (ojtikinbilik xtok kʼuchaʼal tepehuanoetik) nakalik te ta Sierra Madre Occidental, ta snorteal México. Li tsobobbail yuʼun yajrextikotak Jeova mas nopol xilike 240 kilometro snamal. Jun kʼakʼale oy jayvoʼunkutik la jnopkutik ti chbat jvulaʼankutik li krixchanoetik tee.

La jsaʼkutik jkot jkamionetakutik, jkarpanakutik, kuni vayebkutik ti xkoʼolaj kʼuchaʼal koxtale, jveʼelkutik xchiʼuk gasolina sventa oxib kʼakʼal. Chanib ora ta sob li lokʼkutik ta Durango. Vaxakib ora li xanavkutik ta jun be ti lumtike xchiʼuk ti vitstik tajeke. Kʼalal laj li be karoe te xa chlik batel yosilal li j-oʼdametike. Li bu li kʼotkutike la jtakutik yalobaltik xchiʼuk yan vits.

Li jkarokutike laj kiktakutik komel ta jun uni bikʼit rancho, vaʼun lik xanavkunkutik xchiʼuk jkuchojkutik batel skotol li kʼusitik chtun kuʼunkutike. Oxib ora laj yichʼ kuʼunkutik li yalobaltike. Jaʼ te la jpas jkarpanakutik xchiʼuk la jtsob jsiʼkutik sventa ta jtsan jkʼokʼkutik yoʼ mu xnopaj tal chonbolometik. Sventa mu xtupʼe, la jel jbakutik ta stikʼbel siʼil ta ox-ox ora sjunul akʼobal.

Kʼalal sakube lik muykunkutik li ta yan vitse, pe ta skoj ti ep li bikʼtal bebetike, ep ta velta li chʼaykutik. Ta skoj ti oy buchʼu snaʼ kuʼunkutik jutuk li kʼop tepehuanoe la jcholkutik batel mantal li ta naetik ti la jtakutik batele. Labal to la jkaʼikutik ti oy la yajrextikotak Jeova li ta Los Arenalese, ti jaʼ li bu chi batkutike. Maʼuk noʼox taje, yuʼun la tstsob sbaik noxtok. Manchuk mi labal jutuk laj kaʼikutik taje, xi muyubajkutik ta skoj.

Ta skoj ti toj ep li xanavkutike, kʼalal li kʼotkutik li ta Los Arenalese xvuchojan tajek yaʼlel li kokkutike. Li ta lum taje kʼajom noʼox jaypʼej naetik oy ti pasbil ta xamit xchiʼuk ti lamina karton sjole. Muʼyuk chanob vun mi jaʼuk oy lus. Li jnaklejetike abol sbaik tajek, mu xojtikinik li mukʼta lume xchiʼuk kʼajomal noʼox vaj tslajesik xchiʼuk jutuk kʼusi yan. Ta slajebal xae la jtakutik  li Melesioe, xmuyubaj tajek ti kʼalal laj yilunkutike, vaʼun ta anil noʼox laj yikʼunkutik batel ta sna. Li jichʼ-jichʼ kerem taje laj yalbunkutik ti skotol kʼakʼal tskʼanbe Jeova ti akʼo stak batel yajrextikotak sventa xchanubtasatik ta sventa Vivlia li yutsʼ yalale xchiʼuk li buchʼutik te nakajtik ta slumale. Laj yalbunkutik ti mu xa snaʼ stakʼel li kʼusi tsjakʼ xchiʼiltake.

Li j-oʼdametike tspasik li tiʼavalil o akʼ chamele. Tstunesik baketik xchiʼuk skʼukʼumal mukʼta xik (águila) sventa tspoj sbaik li ta kʼusitik chopole, chichʼik ta mukʼ li yiptak kʼusitik ta Balumile xchiʼuk chiʼtaik li jtiʼavaletik o j-akʼchameletik ti chloʼlavanike. Li Melesioe laj yalbunkutik ti kʼalal chbatilan li ta jteklume la xchan ti jaʼ melel Dios li Jeovae, jaʼ yuʼun la xchʼay li kʼusitik chichʼ ta mukʼe. Li Melesioe laj yichʼ albel yuʼun slakʼnatak ti chichʼ milel yuʼun li sdiosike, pe ta skoj ti mu kʼusi xkʼot ta pasele, laj yakʼik venta ti jaʼ mas tsots sjuʼel li Jeovae, ti jaʼ mu jechuk li sdiosike. Ta tsʼakale kʼalal chchanubtas ta Vivlia yutsʼ yalaltak li Melesioe lik kʼotikuk ek li slakʼnatake. Kʼalal chchanubtasvane jaʼ tstunes li vunetik yuʼun yajrextikotak Jeovae.

Li kʼusi laj yal baʼyel Melesio ti skʼan spasik li krixchanoetike jaʼ ti akʼo xchikʼik li lokʼoletike xchiʼuk li kʼusitik tstunesik sventa tspoj-o sbaik li ta kʼusitik chopole. Ep buchʼutik tsal yuʼunik li xiʼele xchiʼuk li labtael o metsʼtaele, mu jaluk jelav sventa mas ta 80 krixchanoetik lik stsob sbaik. Toj labal sba kʼalal laj kaʼikutik taje, jech oxal li mal kʼakʼal taje la jnop la jtsob jbakutik. Oy jayvoʼ krixchanoetik ta kaʼ bat yalbeik li buchʼutik ta xa onoʼox tsob sbaik ta sna li Melesioe. Manchuk mi ta oʼlol xemana yichʼ pasel li tsobajele xchiʼuk ti ta anil xa laj yichʼik albele, kʼotik 25 krixchanoetik, junantike ta yokik, li yantike ta buro.

Sventa laj kalbekutik li buchʼutik te tsobolik ti mi oy kʼusi tskʼan tsjakʼik ta sventa Vivliae, jaʼ tun ta jelubtasej kʼop li Melesioe. Li manxo krixchanoetik taje xi la sjakʼbunkutike: «¿Mi skʼanojunkutik Jeova akʼo mi ta batsʼi kʼop chi kʼopojkutik?», «¿Mi chaʼibunkutik kʼalal ta jtakutik ta kʼoponel ta jbatsʼi kʼopkutike?» xchiʼuk «Mi tal li Armagedone, ¿mi tstaunkutik van ta naʼel Jeova akʼo mi nom tajek oyunkutik li ta jteklume?». Toj lek laj kaʼikutik ti laj kalbekutik smelolal ta Vivlia ti skʼanoj skotol krixchanoetik li Jeovae, ti mu ventauk bu nakalike o kʼusi kʼopal chkʼopojike. Kʼalal laj koʼontonkutike, li jnaklejetik tee laj yalilanbunkutik ti akʼo jtakkutik batel buchʼu xbat chanubtasatikuk mase.

Kʼalal laj li tsobajele, li jveʼelkutik kichʼojkutik batele komon la jlajeskutik xchiʼuk li achʼ kamigotakkutike. Mu jaluk ikʼub osil xchiʼuk ta skoj ti ta jol vitsetik oyunkutike toj echʼem sik, jaʼ yuʼun ti kʼalal laj yalbunkutik ti akʼo te xi vaykutik ta snaike toj lek laj kaʼikutik. Li kuarto bu li komkutike muʼyuk toʼox tsutsem. Ta yokʼomale laj yikʼunkutik batel ti bu jkomtsanojkutik li kamionetae, sventa taje la jtamkutik batel jun be ti mas komkome. Manchuk mi lubem tajek li sutkutik li ta Durangoe, xi muyubajkutik tajek.

Li voʼonkutike jaʼ jun matanal laj kaʼikutik ti laj kojtikinkutik li krixchanoetik ti chkʼopojik ta batsʼi kʼope. Manchuk mi chʼabal ta skʼopik li vunetik lokʼem ta Vivliae oy tajek ta yoʼontonik tskʼan chojtikinik xchiʼuk chichʼik ta mukʼ li melel Diose. Li avie oy xa kʼotemik yan vakvoʼ yajrextikotak Jeova. Li oxib xemana ayike laj yakʼbeik chanubtasel ta Vivlia te van 45 jtepehuanoetik ti oy ta yoʼontonik chtunik ta stojolal Jeovae. Li avie chkʼotilanik xa skotolik li ta tsobajeletike.

Yoʼ to skʼan stsuts li kartae, ta to xkal yan jloʼil. Li ta Los Arenalese kʼajomal jun tienda oy ti chchon toʼox sikʼolale, pe li avie muʼyuk xa bu chchon. ¿Kʼu yuʼun? Yuʼun muʼyuk xa buchʼu mas tsikʼolaj ta skoj ti toj ep xa li buchʼutik yakal xchanel Vivliae. Jech noxtok, ep li buchʼutik muʼyuk toʼox nupunemik ta registro civile, nupunik xa.

[Lokʼol ta pajina 25]

Melesio, yajnil, chanib stsebetak xchiʼuk smeʼniʼ

[Lokʼol ta pajina 26]

Chanubtasel ta Vivlia xchiʼuk jun tsobajel ta Los Arenales

[Stojel ta vokol ta pajina 26]

Servicio Postal Mexicano, Correos de México