Mbono District Ini Ndaeyo ke Russia Ini Inemesịt

KPUKPRU ndaeyo, mbon emi ẹsimade n̄kpọ-obot ẹsikpọn̄ ufọk mmọ ke ikpọ obio ẹwọrọ ẹka obio-in̄wan̄ ẹkedụn̄ ke ataya emi ẹkotde dacha. Esinem mmọ ndikpọn̄ itọk itọk uwem ikpọ obio n̄kọduọk odudu esisịt. Ke mme isua ifan̄ emi ẹbede, ẹsikụt Mme Ntiense Jehovah ke Russia ẹtienede ẹwọn̄ọ ọkwọkudịm ke ini ndaeyo ẹka mme obio-in̄wan̄, edi n̄kpọ en̄wen esida mmọ ọwọrọ.

Okposụkedi emi ukara mîyakke Mme Ntiense Jehovah ẹkwọrọ ikọ ke ndusụk obio ke Russia, mmọ ke ẹsosop idem ọtọkiet ke eferife ẹkpono Abasi koro ibet Russia enyịme owo odụk ido ukpono emi enye amade. Edi ndusụk ini, ukara ẹsinọ nnyịn mfịna ke ntak nsu emi ẹsude ẹdori nnyịn, mîdịghe mme oku Ufọkabasi Orthodox n̄ko ẹsinam mfịna ye nnyịn tutu iyakke ikeme ndibọ nti itie nda nnịm mbono district. Emi anam Mme Ntiense Jehovah ẹsiwọrọ ẹkenịm ikpọ mbono mmọ ke akai. Tọn̄ọ ke 2007 esịm 2009, ẹnịm mme mbono ntem n̄kpọ nte utịm ike-40 ke nsio nsio ebiet 25 ke ofụri Russia.

Ntiense kiet emi ama okodụk ikpọ mbono ke Russia ke ediwak isua eti nte n̄kpọ eketiede ini oro ete: “Ini akpa emi ikesinịmde ikpọ mbono ke mme an̄wambre ye ikpọ ufọk ke ikpọ obio, ediwak mme enyene esịt akpanikọ ye ukara ẹma ẹsikụt ke idemmọ nte esop nnyịn etiede, akpan akpan ke ini ẹkụtde nte  isanade idem inyụn̄ inamde n̄kpọ ke nde ke nde. Idahaemi-e, emi inịmde mbono nnyịn ke akai mi, mme unam kpọt ẹkụt se inamde. Ọdiọk nte mme owo mîkemeke aba ndikụt utọ inem inem mbono emi nsio nsio orụk owo ẹsidụkde mi.”

Okposụkedi mme utọ mbono emi ẹsidide ini inemesịt, Ntiense kiet ọdọhọ ete: “Esinem etieti ndikụt nditọete nnyịn ẹwade idem, ẹsọn̄ọde ẹda ẹnyụn̄ ẹdade uwem nte mmọ ẹkụtde. Edi ke nditịn̄ ofụri akpanikọ, esibiak nnyịn onyụn̄ ọsọn̄ nnyịn ndidụk mme mbono ke ini ukara mîyakke inịm mme mbono nnyịn. Emi esinam nnyịn ikûkeme ndituak ibuot nnọ Ata Ọkpọsọn̄ Abasi nnyịn ifụre ifụre ye ke ido nte eyede.” Didie ke Mme Ntiense Jehovah ke Russia ẹyọ utọ mfịna emi?

Mbono District ke Akai ke Ofụri Russia

Ediwak ini, mme anam-ndutịm mbono ẹsiyom ebiet emi ẹdinịmde mbono emi ediwak tọsịn owo ẹdidụkde ke ayakde usen ifan̄ kpọt mbono nditọn̄ọ koro mme enyene-itie emi ẹkebọde ndida nnịm mbono isimaha aba ndinọ mme itie emi. Ke uwụtn̄kpọ, ke 2008, Mme Ntiense ke Cheboksary, Chuvash Republic ẹkeka ẹkenịm mbono ke akai emi asakde iso ese Akpa Volga. Utom emi akanade mmọ ẹnam ama okpon etieti. Akana nte ẹyom itieidụn̄ ẹnọ owo 1,700 ke otu owo 1,930 oro ẹkekerede nte ẹdidụkde mbono oro. Akana ẹnam itie uyeremmọn̄ ye itie uyetn̄kpọ emi ẹnyenede ufiop ye mbịtmbịt mmọn̄, itie uken̄idem, ye ikan̄ ilektrik. Ndien akana ẹnọ kpukpru mme andidụk mbono emi udia.

Nditọete ẹma ẹnam kpukpru emi. Ẹma ẹkụt nditọete emi ẹdide mme anamusọ eto, mme anamutom ikan̄ ilektrik, ye mme esịn-mmọn̄ esan̄ukwak. Mme Ntiense 350 ẹma ẹnyịme ndin̄wam nnam utom emi ndien owo 14 ke otu emi ẹkedodụn̄ọ ke ikọt emi ke ofụri usen duop. Mmọ ẹma ẹkpok eto ye nnyanyan̄a ẹda ẹbọp tent, itie uyeremmọn̄ ye itie uken̄idem. Nditọete eken ẹma ẹka obio ediwak ini ẹkedep mme n̄kpọ oro ẹyomde. Sia ekebe ntụhube mîkodụhe ndisịn udia, nditọete ẹma ẹbiere nditie ke an̄wa mbono oro ntem udia ikata ke usen nnọ kpukpru owo. Mme enyene-ebiet emi ẹma ẹbere ye nditọete nnyịn, ẹnọ mmọ mbon emi ẹditemde udia inọ mmọ ke ukpeokụk. Nditọete 500 ẹma ẹmen tent mmọ ẹdi, nditọete 150 ẹkpe ufọk ke mbọhọ oro ẹdụn̄, owo 15 ẹna ke mbiet ke ufọk ufene, mmọ eken ẹna ke mme tent oro nditọete ẹkebọpde.

Ke ini mme andidụk mbono ẹdide ẹdisịm, mmọ ẹma ẹkụt ediwak akpakaha ọkpọ nte obonode ke udịm ke udịm ye ke nde ke nde. Ẹma ẹtuak n̄kpri n̄kpoto iba ke iso iso oro ẹnyụn̄ ẹbon ndiye flawa. N̄kpoto kiet ekenyene mbon emi ẹdinamde n̄kpọ ke usem Russia, enye eken enyene mbon emi ẹdinamde n̄kpọ ke usem Chuvash. Kpukpru owo ẹma ẹma se ẹkekpepde ke mbono oro ye ọkpọsọn̄ utom oro mme anamutom unyịmesịt ẹkenamde. Kiet ke otu mme etemudia oro ama ọdọhọ ete: “Ekpedi n̄kodụhe mi nda enyịn mi n̄kụt, n̄kpenịmke ke esop odu emi ẹnamde n̄kpọ ke ndutịm ye ke nde ke nde ntem!” Ndusụk owo ẹkedọhọ ke mbono emi ebiet Usọrọ mme Ataya emi nditọ Israel eyo Bible ẹkesinamde.

Ke mme obio efen, Mme Ntiense ẹkenyene usen kiet kpọt ndiyom nnyụn̄ ntịm ebiet en̄wen ida inịm mbono district. Se iketịbede edi emi ke Nizhniy Novgorod. Nditọete ẹma  ẹnyịme ndinam utom okoneyo ye uwemeyo ke ikọt ete kiet. Mmọ ẹkenyene ndikek eto, ntem mbiet, nnyụn̄ nduọk ibọk man ẹbịn ikop ye nnuene. Etisịm ini emi mme andidụk mbono ẹdide ẹdisịm ke usenubọk Friday, nditọete nnyịn ẹma ẹbobon akpakaha ọkpọ 2,000, ẹnam itie uken̄idem 10, ye itie uyetn̄kpọ, ẹtuak n̄kpoto ẹnyụn̄ ẹwụk ukwak unọikan̄ ye ukwak utịn̄ikọ. Eyenete nnyịn kiet ọdọhọ ete: “Se ikakpade mi idem ikan edi nte ke nditọete emi ẹkenamde ofụri utom emi ikatan̄ke idem. Mmọ ẹma ẹsụhọde idem ẹnam n̄kpọ ẹnọ mme owo ke mbono oro. Mmọ ẹkenam ofụri n̄waidem emi man nditọete mmọ ẹkop inem mbono oro.”

Eyenete en̄wen ewet ete: “Nditọete ẹma ẹdiana kiet ẹnam utom. Okposụkedi emi ekedide akpa ini emi ikenịmde mbono ke akai, ini mîkonyụn̄ idụhe, nditọete ẹma ẹnam ofụri se mmọ ẹkekeme man ẹnyene kpukpru se ẹyomde ndida nnịm mbono oro. Ndien idem ke mbono ama akasuana, idem ikememke nnyịn. Jehovah ọkọnọ nnyịn odudu!”

Spirit Abasi Anam Utom

Ndiyom ebiet emi ẹdinịmde mbono esinam Mme Ntiense Jehovah ke mme obio emi mfịna odude ẹnen̄ede ẹdiana kiet onyụn̄ owụt nte spirit Abasi esinamde utom. Ke uwụtn̄kpọ, ke Smolensk, mme enyene-ufọk emi ẹkebọde ndinọ nditọete nnyịn ẹdụn̄ọ ẹma ẹdọhọ okoneyo emi ekesierede usen emi ẹdinịmde mbono ke mmimọ idinọhọ aba ufọk mmimọ. Ebiowo kiet ọdọhọ ete: “Ke ini nditọete ẹkedide edisịm n̄kanika kiet okoneyo, ufọk ikodụhe ndinọ mmọ ẹna. Mma ntọn̄ọ eyet koro mmen̄kenyeneke se n̄kemede ndinam nnọ mmọ. Ekem mma mbọn̄ akam nnọ Jehovah nte ese aban̄a mfịna emi. Mma n̄kop inemesịt etieti koro ke hour kiet ama ekebe, nnyịn ima ikụt itieidụn̄ inọ kpukpru owo. Se iketịbede emi ama akpa nnyịn idem etieti onyụn̄ owụt ke Jehovah isikpọn̄ke ikọt esie.” Ke ebiet en̄wen emi ẹkenịmde mbono ke akai, nditọete ẹma ẹkebọ mbio obio oro ufọk ẹdụn̄, ndien ke ntak eti etop emi Mme Ntiense ẹwọrọde ke obio oro, mbio obio oro ẹma ẹnyịme ndinọ nditọete 2,000 ufọk ẹdụn̄ ẹdụk mbono.

Ntiense kiet ọdọhọ ete: “Nnyịn ndikakam n̄keme ndidụk mbono kpa ye ofụri afanikọn̄ emi enen̄ede owụt nte ọfọnde ndibuọt idem ye Jehovah kpukpru ini.” Ẹkenen̄ede ẹkụt emi ke ini oro mbon afanikọn̄ ẹkedide ndisịn ntịme ke mbono oro. Ke uwụtn̄kpọ, ke Novoshakhtinsk, oku Ufọkabasi Orthodox ama asan̄a ye mbon ntịme akama ukwak utịn̄ikọ edikwọ ikwọ ufọkabasi mmọ mbak nnyịn idikop n̄kpọ aba ke itie mbono emi. Edi mme bodisi ẹma ẹkpan mmọ. Ke ini ufiop akanamde owo mmọ kiet osụhọ, Mme Ntiense ẹma ẹsọsọp ẹmen enye ẹka ẹkenọ usọbọ ke itie unọ usọbọ mbono emi. Idem ama akpa enye etieti ke enye ama ekeset.

Se Mmọ Ẹkekụtde Ama Akpa Mmọ Idem

Ke ntak edinam oyomonsia oro esitịbede ke ubọk ke ubọk, mme owo ye ukara ẹsima ndifiọk  se ikade iso ke ebiet ekededi emi ẹkụtde ediwak owo. Ke uwụtn̄kpọ, mme bodisi ẹma ẹkese se ikakade iso ke mbono district emi ẹkenịmde ke akai ke Volzhskiy. Ke ini mbono okosụk akade iso, akama-ke-ubọk a-telefon owo bodisi kiet ama osop, ndien eyenete kiet ama okokụt fon oro ke Itieutom Ubon Mme N̄kpọ Oro Ẹfiọhọde onyụn̄ emen ọsọk enye. Ikebịghike, akwaowo mmọ ama okot enye ke telefon obụp m̀mê itie mbono oro etie nte mboho mbon ntịme. Enye ama ọbọrọ ete: “Mfịna ndomokiet idụhe; owo 5,000 ẹdu mi, edi owo isịnke ntịme. Se n̄kụtde akpa mi idem, onyụn̄ anam ntọn̄ọ ndikere n̄kpọ. Mmọ ẹkam ẹmen fon mi emi okosopde ẹsọk mi!”

Bodisi kiet ama enen̄ede ama nte ẹkekamade itie mbono oro asana. Idem ama akpa enye nte ke ukpọk efọk swid kiet ikanaha ke isọn̄ kpa ye adan̄a ediwak nditọwọn̄ emi ẹkedude do. Ete enyene-ebiet emi ẹkenịmde mbono en̄wen, ama edi edisobo ye bodisi emi ẹketịn̄de ẹnọ enye nte ke mme owo ke ẹnịm akamba mboho ido ukpono. Enye ama emen bodisi emi ọdọk akada ke etehe ke ọyọhọ enyọn̄ ita ke ufọkenyọn̄ kiet onyụn̄ ọdọhọ ete: “Sese mmọ ko. Sese nte mmọ ẹnamde n̄kpọ ke nde ke nde.” Idem ama akpa ete enyene-ebiet emi nte ke Mme Ntiense ikọn̄wọn̄ke mmịn m̀mê sika, ikonyụn̄ isebekede ebiet oro idem ke ẹma ẹkesuana. Enye ama ọdọhọ ete: “Onyụn̄ etie nte paradise!”

Ikọt Abasi Ẹdiana Kiet

Ke ẹma ẹkesuana mbono district kiet ke akai, ọbọn̄ obio kiet ke mbọhọ oro ama ọdọhọ ete: “Mmenen̄ede n̄kụt ke mbufo ẹdi mbon nsụhọdeidem kpa ye emi ẹnyenede odudu. Ke adan̄aemi mbufo ẹnamde se ẹkekeme man ẹdiana kiet, eke nnyịn mi edi enyene-idem etie.” Mme owo ke akamba idụt emi, ọtọn̄ọde ke Kaliningrad esịm Kamchatka, ẹsinen̄ede ẹma edidianakiet emi ẹsikụtde ke otu ikọt Abasi ke mme ikpọ mbono mmọ. N̄kpọ kiet edi nte ke nditọete nnyịn ẹsika iso ẹkpono ukara ye mme owo inamke n̄kpọ m̀mê ini ewe ke ẹtịmede ndutịm mmọ.

Se ededi oro ekpetịbede, Mme Ntiense Jehovah ke Russia ẹsụk ẹnenem esịt ndisop idem ọtọkiet n̄kpep Ikọ Abasi. Mmọ ẹbọn̄ akam “ẹban̄a ndidem ye kpukpru mmọ emi ẹdude ke ikpọ itie; man [mmọ ẹkpeka iso ẹdu] uwem ifụre ye emem ye ọyọhọ uten̄e Abasi ye nsịnifịk.”—1 Timothy 2:2.

[Se ẹwetde ke ikpọ abisi ke page 27]

Kiet ke otu Mme Ntiense oro ẹkediọn̄de akai man ẹda ẹnịm mbono

[Se ẹwetde ke ikpọ abisi ke page 29]

Mme Ntiense Jehovah ke Russia ẹka iso ndidu “uwem ifụre ye emem ye ọyọhọ uten̄e Abasi”

[Mme Ndise ke page 28]

Nditọete ẹma ẹnam ebiet oro asana mbemiso mbono ọtọn̄ọde, ẹnyụn̄ ẹnọ ediwak tọsịn owo oro ẹkedụkde mbono oro udia

[Mme Ndise ke page 29]

Kpukpru owo ẹma ẹma se ẹkekpepde ke mbono oro ye ọkpọsọn̄ utom oro mme anamutom unyịmesịt ẹkenamde