Dagiti Bendision Kadagiti Kombension Distrito iti Kalgaw Idiay Russia

KADA kalgaw, dagiti Russian nga agessem iti nakaparsuaan panawanda ti siudad tapno mapanda agbakasion iti probinsia ken agyanda kadagiti balay a maawagan dacha. Dayta ti tiempo a panawanda ti okupado a biag iti siudad. Kadagiti napalabas a kalgaw, dagiti Saksi ni Jehova idiay Russia mapmapanda met kadagiti probinsia, ngem naiduma ti panggepda.

Nupay maparparitan ti panangasabada iti dadduma a siudad, sipapanayag nga itultuloy dagiti Saksi ni Jehova idiay Russia ti aggigimong, ta kalinteganda dayta sigun iti konstitusionda. Ngem no dadduma, marigatanda a mangala iti permiso a mangabang iti maitutop a pasilidad para iti tinawen a kombensionda bayat ti kalgaw gapu iti ibubusor ken pananglapped dagiti autoridad a di umiso ti nadamagda wenno dagiti klero ti Russian Orthodox. Gapuna, nangorganisar dagiti Saksi kadagiti kombension iti “kabakiran” wenno “kataltalonan.” Sipud 2007 agingga iti 2009, naangay dagita a naespirituan a “piknik” iti agarup 40 a daras kadagiti 25 a lokasion iti intero a Russia.

Malagip ti maysa a Saksi a timmabuno kadagiti kombension idiay Russia iti adu a tawen: “Kadagiti napalabas a tawen no agabangkami kadagiti istadium ken pasdek kadagiti dadakkel a siudad, adu a napudno a tattao ken autoridad  ti agkomento maipapan iti kinadalus ken urnos a makitada iti organisasiontayo. Itan, mapilitankami nga agtataripnong iti kabakiran, a dagiti laengen atap nga animal ti makapaliiw kadakami. Ngem makapaluksaw ta saan a mapaliiw ti publiko dagitoy a nagsayaat a taripnong a tabtabunuan dagiti tattao a nagduduma ti puli, relihion, ken kasasaad ti panagbiagda.”

Nupay naragsak dagita a taripnong, annugoten ti maysa a Saksi: “Makaparagsak a makita ti panagsakripisio ken kinasungdo dagiti pada a Saksi a makibagay iti nagduduma a kasasaad. Ngem kinapudnona, no parigatendakami dagiti autoridad a mangangay iti kombension, mabannogkami iti pisikal ken emosional. Malimitaran met ti wayawayami nga agdayaw iti mannakabalin-amin a Dios iti nadayaw a pamay-an.” Kasano a napagballigian dagiti Saksi ni Jehova idiay Russia ti kasta a pakarigatan?

Dagiti Kombension iti Kabakiran iti Intero a Pagilian

Masansan a gapu iti naladaw a pannakakanselar dagiti kontrata iti panagabang, sumagmamano laengen nga aldaw ti busbosen dagiti mangorganisar iti kombension tapno mayurnos ti sabali a lugar a pagkombensionan ti rinibu a delegado. Kas pagarigan, dagiti Saksi idiay Cheboksary, Chuvash Republic, napilitanda a mangangay iti kombensionda idi 2008 iti nalawa a pagkampuan a napalawlawan kadagiti kayo a birch ken tumannawag iti Volga River. Nagdakkel daydi a trabaho. Iti 1,930 a manamnama a tumabuno, 1,700 kadakuada ti masapul a maibirokan iti pagdagusan. Kasapulanda ti banio ken lababo nga addaan iti napudot ken nalamiis a danum, kasilias, ken koriente. Masapul met a mapakan ti amin a tumabuno.

Sigagaget a nagtrabaho dagiti kakabsat tapno maipaay dagita a kasapulan. Nangbirok dagiti kakabsat kadagiti karpintero, elektrisian, ken tubero. Adda grupo ti 350 a Saksi a nagboluntario a tumulong iti trabaho, a 14 kadakuada ti nagnaed iti pagkombensionan iti 10 nga aldaw. Nagragadida kadagiti tabla, nagbunagda iti garami, nagibangonda kadagiti tolda, ken nagaramidda kadagiti banio ken kasilias. Nagboluntario ti sabali a grupo ti kakabsat a gumatang iti bambanag a masapul. Tangay awan ti pagpalamiisan iti taraon, inkeddeng dagiti kakabsat ti agluto ken mangidasar iti napudot a taraon, mamitlo a daras iti tunggal aldaw. Timmulong met ti administrasion ti pagkampuan babaen ti panangtangdanda iti dadduma a trabahador a mangisagana iti taraon dagiti tumabuno. Idi agangay, 500 a delegado ti nangitugot iti bukodda a tolda, 150 ti nagabang kadagiti balay iti asideg ti pagkombensionan, 15 ti siraragsak a naturog kadagiti garami, ket ti dadduma nagyanda kadagiti tolda nga imbangon dagiti kakabsat.

Idi simmangpet dagiti delegado, nakitada dagiti nagadu a naurnos a linia dagiti asul a plastik a tugtugaw. Iti sango, adda dua a simple nga entablado a naarkosan kadagiti sabong, maysa para iti programa ti lenguahe a Russian ken ti sabali para iti lenguahe a Chuvash. Naragsakan ti amin iti naespirituan a programa ket inapresiarda ti kinagaget dagiti boluntario. Kinuna ti maysa kadagiti nagisagana iti taraon, “No diak nakita a mismo, diak koma mamati nga adda nasayaat ken disiplinado nga organisasion a kas kadakayo!” Indilig ti dadduma ti urnos ti kombension iti Piesta Dagiti Abong-abong a ramrambakan idi ti nasion ti Israel idi panawen ti Biblia.

Iti dadduma a siudad, maysa laeng nga aldaw ti panagsagana dagiti Saksi para iti nabaliwan a lugar a pakaangayan ti kombension. Kasta ti  napasamak idiay Nizhniy Novgorod, a nagsisinnublat a nagtrabaho dagiti boluntario iti uneg ti 24 nga oras iti pribado a lote a pakaangayan ti kombension. Nagpukanda kadagiti kayo ken palungpong, inarbasanda dagiti ruot, ken inikkanda ti insektisidio ti lugar tapno mapaksiat dagiti ampas ken kuton. Idi simmangpet dagiti delegado iti agsapa ti Biernes, nangiplastar dagiti boluntario iti 2,000 a plastik a tugaw, sangapulo a mayakar-akar a kasilias, lababo nga addaan suplay a danum, entablado, generator, ken sound system. Impadamag ti maysa a kabsat: “Ti nakaskasdaaw kadagiti kakabsat a nagsisinnublat a nagtrabaho iti 24 nga oras ket saanda a kayat a maibilangda a bida. Imbes ketdi, sipapakumbaba nga intuloyda ti nagserbi iti sabsabali bayat ti kombension. Literal nga impaayda ti amin a pigsada tapno komportable ken maragsakan dagiti kakabsatda para iti naespirituan a pannakaisuro.”

Insurat ti sabali pay a kabsat: “Mariknam a talaga ti panagtitinnulong. Nupay damo dagiti kakabsat ti mangorganisar iti kombension iti nawayang a lugar ken ababa laeng ti tiempoda, pinanunotda dagiti mabalin nga aramiden tapno basbassitton ti pakasingaan bayat ti programa. Nupay nabannogkami, kasla saanmi a narikrikna dayta. Kasla inikkannakami ni Jehova iti payak tapno alisto a malpasmi ti trabaho!”

Agtigtignay ti Espiritu ti Dios

Gapu iti panangrisut dagiti lokal a Saksi iti adu a parikut iti panangangay kadagiti kombension, ad-adda a simmingedda iti maysa ken maysa ken nakitada ti panagtignay ti espiritu ti Dios. Idiay Smolensk, nakanselar ti adu a naireserba a pagdagusan iti rabii sakbay ti kombension. Impadamag ti maysa a panglakayen: “Awan ti pagdagusan dagiti delegado a naglugan iti bus a simmangpet iti 1:00 ti parbangon. Nakasangitak ta awan ti maaramidak iti situasionda. Nagkararagak ken Jehova ket impakaasik a risutenna koma ti problema. Anian a ragsakko ta maysa nga oras kalpasanna, nakabirokkami iti pagdagusanda amin! Talaga a saan a baybay-an ni Jehova dagiti nalinteg!” Iti sabali pay a kombension iti kabakiran, nagpatulong dagiti kakabsat kadagiti agindeg sadiay no mabalinda a padagusen dagiti tumabuno iti kombension. Gapu iti nasayaat a pakasarsaritaan dagiti Saksi iti dayta a lugar, sibubulos ti nakem dagiti lumugar a nangpadagus kadagiti 2,000 a timmabuno iti kombension.

“Ti balligi dagiti naangay a kombension ipakitana a nakapatpateg ti panagpannuray ken Jehova iti amin a kasasaad,” kuna ti maysa a Saksi. Pudno daytoy nangruna idi dimteng dagiti di naimbitaran a “bisita” tapno riribukenda ti kombension. Idiay Novoshakhtinsk, dimteng dagiti klero ti Russian Orthodox ken dagiti agprotprotesta. Babaen iti mikropono, nagkantada kadagiti himno ken nagtatagarida tapno saan a mangngeg ti palawag ti espiker iti kombension. Ngem inanawa dagiti polis ti panangriribukda iti programa. Idi naglusdoy gapu iti pudot ti agprotprotesta a babai a kameng ti Orthodox, immarayat kenkuana dagiti kakabsat ket intarayda iti First Aid Department ti kombension. Nasdaaw unay ti babai iti itutulong kenkuana dagiti kakabsat.

 Nasdaawda iti Nakitada

Gapu iti pangta ti terorismo idiay Russia, dagiti dadakkel a taripnong ti masansan a pakaiturongan ti atension dagiti pannakabagi ti linteg ken dagiti tattao. Kas pagarigan, dagiti pannakabagi ti anti-extremism police squad pinaliiwda ti maysa a kombension iti kabakiran idiay Volzhskiy. Maysa kadakuada ti nakapukaw iti selponna bayat ti programa, ket tinulongan dagiti kakabsat a mangsapul iti daytoy iti Lost and Found Department. Di nagbayag, timmawag kenkuana ti superiorna, ta kayatna a maammuan no adda napasamak a kinaranggas wenno riribuk iti kombension. Kastoy ti insungbat ti opisial: “Natalna ti kasasaad; 5,000 a tao ti adda ditoy ket awan a pulos ti panagsalungasing iti linteg. Damdamagenyo kadi no adda riribuk? Ayna, mamatikay man wenno saan, napukawko ti selponko, ngem nabirokanda, ket insublida kaniak!”

Maragsakan ti maysa a guardia gapu iti kinalinis ti arubayan ken nasdaaw ta awan man la ti nakitana a naiwara nga ukis ti kendi uray adu ti ubbing. Ti makinkukua iti nakaangayan ti sabali pay a kombension kinasaritana ti polis a teniente, a nabagaan a maangay ti maysa a dakkel a narelihiosuan a panagtataripnong. Impanna ti teniente iti balkonahe ti maikatlo a kadsaaran ti maysa a pasdek tapno matannawaganda ti pagkombensionan sa kinunana: “Paliiwem ida! Nakaur-urnosda!” Nasdaaw ti opisial ta saan nga agiinum wenno agsigsigarilio dagiti Saksi ken panawanda a nadalus ti lugar. Kinunana: “Kasla paraiso ditoy!”

Nabatad ti Panagkaykaysa ti Ili ti Dios

Kalpasan ti maysa a kombension iti kabakiran, sibubulos a kinuna ti panguluen ti asideg a purok: “Ammok a napakumbabakayo a tattao, ngem nabilegkayo ta mapagkaykaysayo dagiti tattao, idinto ta saanmi a maaramid dayta.” Manipud Kaliningrad agingga iti Kamchatka, masmasdaaw dagiti umili daytoy nagdakkel a pagilian gapu iti panagkaykaysa nga ipakpakita ti ili ti Dios kadagiti dadakkel a naespirituan a panagtataripnongda. Nupay kasapulan a kellaat a baliwanda dagiti planoda, daytoy ti saan a pulos agbaliw​—raemendanto latta dagiti autoridad ken ti padada a tattao.

Aniaman ti agbalinto a situasion dagiti Saksi ni Jehova iti Russia, itultuloydanto latta ti siraragsak nga agtitipon tapno umawatda iti pannursuro ti Biblia. Ikarkararagda “maipuon iti ar-ari ken kadagidiay amin nga adda iti nangato a saad; tapno maitultuloy[da] ti agbiag a natalinaay ken naulimek buyogen ti naan-anay a nadiosan a debosion ken kinaserioso.”​—1 Timoteo 2:2.

[Blurb iti panid 27]

Maysa a boluntario a Saksi a tumultulong iti pannakaibangon ti pagkombensionan

[Blurb iti panid 29]

Dagiti Saksi ni Jehova idiay Russia itultuloyda ti agbiag a “natalinaay ken naulimek buyogen ti naan-anay a nadiosan a debosion”

[Dagiti Ladawan iti panid 28]

Dagiti boluntario nagtitinnulongda a nagdalus sakbay ti kombension ken nagisaganada iti taraon para iti rinibu a tumabuno iti kombension

[Dagiti Ladawan iti panid 29]

Naragsakan ti amin iti programa ti kombension ken inapresiarda ti kinagaget dagiti boluntario