Faamanuiaga Mai Tauaofiaga Itumalo i Rusia

I TAIMI o le taumāfanafana, e tuua ai e tagata Rusia o latou fale i le aai, ae gasolo i nofoaga e tele ai laau, e mālōlō ma tafafao i fale e faaigoa o dachas. E latou te manatu, o se taimi lea e mapu ai mai le olaga pisi i le aai. I taimi o taumāfanafana ua mavae, na vaaia ai foʻi le toʻatele o Molimau a Ieova i Rusia o agaʻi atu i nuu i tua, ae e ese le māfuaaga.

E ui ina faasā la latou galuega talaʻi i nisi aai, ae o loo saʻoloto pea Molimau a Ieova e faia a latou sauniga, e faatino ai lo latou saʻolotoga e tapuaʻi ai. Ae i nisi taimi, ona o teteega ma omiga mai taʻitaʻi o le malo po o taʻitaʻi o le lotu Orthodox, ua faigatā ai ona maua ni nofoaga talafeagai e fai ai a latou tauaofiaga itumalo i tausaga taʻitasi. O lea, na fuafua ai e Molimau e fai a latou tauaofiaga i le togāvao, po o laufanua taalaelae. E mai i le 2007 e oo i le 2009, e tusa ma le 40 faatasiga faaleagaga na faia i nofoaga e 25 i Rusia atoa.

Na taʻua e se Molimau o lē na auai i tauaofiaga i Rusia mo le tele o tausaga: “I tausaga ua mavae, pe a matou faaaogā se malae taalo po o ni fale tetele i aai e fai ai a matou tauaofiaga, e toʻatele tagata lotofaamaoni ma taʻitaʻi o malo na faia ni faamatalaga lelei e uiga  i la tatou faalapotopotoga, ona o le mamā ma le maopoopo. A o lenei la ua faamalosia i matou e feiloaʻi i le togāvao e na o manufeʻai o le vao o loo faalogologo mai. E faanoanoa ona e lē o mafai ona molimauina e tagata lautele nei faatasiga matagofie, o loo auai tagata o talaaga eseese, lanu ma tapuaʻiga.”

O na faatasiga o ni taimi fiafia, ma na taʻua e se tasi Molimau e faapea: “E sili ona olioli i le vaai atu i le agaga faataulaga ma le faamaoni o uso Molimau, o ē o loo mafai ona auauna iā Ieova i tulaga faigatā. A o le mea moni, pe a faafaigatā ona faia a matou tauaofiaga e taʻitaʻi o le malo, e lē faigofie foʻi la iā i matou i le itu faaletino ma i faalogona. Ona e faatapulaa ai foʻi lo matou saʻolotoga e tapuaʻi ai i le Atua e ona le malosi uma lava i se auala mamalu.” E faapefea ona feagai Molimau a Ieova i Rusia ma nei tulaga faigatā?

Tauaofiaga i le Togāvao i le Atunuu Atoa

O le soloia i le taimi mulimuli o maliega i fale totogi e fai ai tauaofiaga, e masani lava ona lē lava ni aso e fai ai ni fuafuaga auā le faitau afe o le ʻauusufono. O se faaaʻoaʻoga, i le 2008, sa faia ai se tauaofiaga itumalo a Molimau i Cheboksary, Chuvash Republic, i se laufanua taalaelae e siʻomia e laau tetele, e iloa atu ai le vaitafe o le Volga. Ua matuā faigatā ai le galuega ua feagai nei ma i latou. E mai i le 1,930 o le ʻauusufono na faatalitalia, e 1,700 i latou na manaʻomia ni mea e nonofo ai i lea laufanua. Sa latou manaʻomia ni fale tāʻele e iai le vaivevela ma le vai mālūlū, ni faleese, ma le eletise, ma e latou te manaʻomia foʻi ni mea taumafa.

Na galulue mamafa uso e saunia uma na mea. Na iai kamuta, fai molī, ma palama. E toʻa 350 Molimau na tauofo e fesoasoani i le galuega, ma o le toʻa 14 o i latou, na nonofo ai i inā mo aso e sefulu. Sa latou ʻili laupapa, laʻu mai vao mamago, ma faatutū faleʻie, fale tāʻele ma faleese. Na ō soo uso i le taulaga e faatau mai mea na manaʻomia. Talu ai e leai ni pusa ʻaisa e teu ai meaʻai, na manatu ai uso e saunia meaʻai i inā, ina ia maua e tagata uma ni ʻaiga vevela se tolu i le aso. Sa fesoasoani ane le pulega o le malae lea sa fai ai le tauaofiaga, ma totogi ni tagata e saunia meaʻai mo sui usufono. I le iʻuga, e 500 sui usufono na aumai o latou faleʻie, na mautotogi isi i fale e 150 e lata i le malae, e 15 na lotomalilie e momoe i luga o vao mamago, a o isi uma na nonofo i faleʻie na faatutū e uso.

Ina ua taunuu ane sui usufono, na latou vaaia ai le anoanoaʻi o nofoa felanulanuaʻi. O loo iai i luma ni pulelaa se lua ua teuteuina i fugālaau, o le tasi mo le polokalame i le gagana Rusia a o le isi mo le gagana Chuvash. Sa fiafia tagata uma i le polokalame faaleagaga ma talisapaia galuega mamafa a ē na tauofo. Na faapea mai se tasi o i latou na saunia meaʻai, “Pe ana ou lē vaaitino i nei mea uma, semanū ou te lē talitonu e iai se faalapotopotoga e maopoopo ma pulea lelei e pei o outou!” Na faatusatusa e nisi le tauaofiaga i Tausamiga o Faleapitaga, ia sa faamanatuina e le nuu o Isaraelu i taimi o le Tusi Paia.

I isi aai, e na o le tasi le aso e saʻili ma sauniuni ai e Molimau se isi nofoaga e fai ai le tauaofiaga itumalo. O le tulaga lenā na iai i  Nizhniy Novgorod, na galulue feauauaʻi uso tauofo i le pō ma le ao, i le fanua o le a fai ai le tauaofiaga. Sa tātuu laau, moa le vao ma fana utufiti ma loi. E taunuu ane sui usufono i le taeao o le Aso Faraile, ua saunia e le ʻautauofo nofoa e 2,000, faleese feaveaʻi e sefulu, o pesini fulumata, le pulelaa, ma se afi eletise ma mea faaleotele leo. Na faamatala e se tasi uso: “O le mea e sili ona ofo ai, ona o uso ia na galulue i le ao ma pō, e leʻi mananaʻo e viiviia i latou ona o a latou galuega. Sa faaauau pea ona auauna ma le lotomaulalo i taimi o le tauaofiaga. Sa galulue mamafa i latou ina ia sologa lelei mea uma mo uso ma tuafāfine, ma fiafia ai i sauniuniga faaleagaga.”

Ua tusi mai se tasi uso: “Sa iai moni le agaga o le galulue felagolagomaʻi. E ui o le taimi muamua lea ua faia ai e uso se tauaofiaga i fafo, ma e puupuu foʻi le taimi, ae sa latou taumafai ia iai mea uma e manaʻomia e le ʻauusufono, ina ia sologa lelei le polokalame. E matou te leʻi lagona le vaivai ina ua uma le tauaofiaga. Ae na foaʻi mai e Ieova le malosi ma le tomai e vave ai ona faatino galuega!”

Galue le Agaga o le Atua

O le taumafai e taulimaina faafitauli e tulaʻi mai ona o tauaofiaga, na atili ai ona māfana Molimau i le atunuu, ma faaalia ai o loo galue le agaga o le Atua. I le aai o Smolensk, na soloia i le afiafi e sosoo ma le aso o le tauaofiaga le tele o api na faatonu. Na faamatala e se tasi toeaina: “E tā le tasi i le vaveao, ae taunuu mai pasi na ō mai ai le ʻauusufono, a ua leai ni api e nonofo ai. Na ou tagi ona ua leai se mea e mafai ona ou faia mo i latou. Na ou tatalo iā Ieova ma tuu atu iā te ia le faafitauli e na te taulimaina. Na ou fiafia lava ina ua mavae se itula, a ua maua se isi nofoaga e api ai tagata uma! O se mea e ofo ai, auā ua faamaonia ai e lē tuua e Ieova le tagata amiotonu e aunoa ma se fesoasoani!” I se isi tauaofiaga i le togāvao, na ō atu ai uso i se tasi nuu mo se fesoasoani i api, ma ona o le talaaga lelei o Molimau i lea vaipanoa, na malilie ai tagata o le nuu e faanonofo sui usufono e 2,000 i o latou fale i le taimi o le tauaofiaga.

Ua faapea mai se tasi Molimau: “Ona na mafai ona faataunuuina le tauaofiaga, ua matuā faamaonia ai le tāua o le faalagolago iā Ieova i mea uma.” Aemaise lava ina ua ō mai ni tagata e leʻi valaaulia, e faavevesi le tauaofiaga. I le aai o Novoshakhtinsk, na sau ai se solo tetee a taʻitaʻi o le lotu Orthodox ma isi, ua usu leotetele a latou pese lotu i mea faaleotele leo, ina ia aua neʻi lagona atu le failauga. Ae peitaʻi, na taofia e leoleo i latou mai le faavevesiina o le tauaofiaga. Ina ua matapogia se fafine o le solo tetee ona o le vevela, na ave o ia e uso i le Matagaluega o le Fesoasoani Muamua i le tauaofiaga, ma togafiti ai. Sa matuā faateʻia lava lenei fafine i le alolofa o le ʻauuso.

 Maofa i Mea na Latou Vāai i Ai

Ona o le mataʻituina o faiga faatupu faalavelave, e masani ona taulaʻi atu le ʻaufaitulafono o le malo ma tagata lautele i faatasitasiga tetele i Rusia. O se faaaʻoaʻoga, na mātauina e se vaega o leoleo e mataʻituina tagata faatupu faalavelave, le tauaofiaga na faia i Volzhskiy. Na leiloa le telefoni feaveaʻi a se tasi o i latou i le taimi o le tauaofiaga, ma na fesoasoani uso e saʻili le telefoni i le Matagaluega o Mea e Leiloa. E leʻi umi ae maua se telefoni mai lona pule, sa manaʻo e fia iloa po o tutupu ni faalavelave po o ni misa i le tauaofiaga. Na tali atu le leoleo: “O loo lelei mea uma, e toʻa 5,000 tagata ia e i inei ae leai ma se mea o gāsē. E leai ni tagata faatupu vevesi. Vaai foʻi, na leiloa laʻu telefoni, ae na latou maua ma toe faafoʻi mai iā te aʻu!”

Na fiafia se tasi o leoleo i le mamā o le laufanua, ma na ofo foʻi ona o le toʻatele o tamaiti na iai, ae e na te leʻi maua ai se lapisi e oo lava i sina pepa lole. I se isi tauaofiaga, sa faafeiloaʻi ai e le pule o le malae se leoleo na alu atu e siaki pe e iai ni faalavelave i lenei faatasiga tele faalelotu. Na ia ave le leoleo i le poletito o le fogāfale tolu lea e iloa atu ai le tauaofiaga, ma faapea atu: “Seʻi tagaʻi atu foʻi! O lenā ua e vaai atu i ai. E ese le maopoopo!” Na ofo le pule o le malae ona e lē inu pia pe ulaula Molimau, ma na ō ma ave a latou lapisi ina ua uma le fono, ma e pei lava e leʻi iai ni tagata i le fanua. Na faapea mai ma le maofa: “E pei lava o se parataiso!”

Vaaia le Autasi o Tagata o le Atua

Ina ua uma se tauaofiaga na faia i se togāvao, sa faapea mai lē na faauluulu i ai se nuu e lata ane: “Ou te iloa o outou o tagata e lotomaulalo, ae e tou te fai mea mafai. O matou, e nofo lava le tagata ia i lona fale, a o outou, ua mafai ona autasia tagata e toʻatele!” Mai Kaliningrad e oo i Kamchatka, e matuā maofa tagata o lenei atunuu telē, ona o le autasi o tagata o le Atua i a latou tauaofiaga. Po o le ā lava le faafuaseʻia ona toe sui o a latou fuafuaga, ae e tasi le mea e lē suia, e latou te faaaloalo i taʻitaʻi o malo ma o latou uso a tagata.

Po o le ā lava lo latou tulaga, ae e olioli pea Molimau a Ieova e faatasitasi mo aʻoaʻoga faaleagaga. E latou te tatalo “e faatatau i tupu ma i latou uma i tulaga maualuluga, ina ia [latou] ola i ni olaga toʻafimālie ma le filemu, e faamaoni i le Atua ma ia faatagata matua.”—1 Timoteo 2:2.

[Faamatalaga i le itulau 27]

O se Molimau na tauofo e faatulaga le tauaofiaga i le togāvao

[Faamatalaga i le itulau 29]

O loo faaauau ona ola Molimau i Rusia i se “olaga toʻafimālie ma le filemu, e faamaoni i le Atua”

[Ata i le itulau 28]

O loo galulue faatasi tagata tauofo e faamamā le fanua mo le tauaofiaga, ma saunia taumafa mo le faitau afe o sui usufono

[Ata i le itulau 29]

Na olioli tagata uma i le polokalame faaleagaga ma talisapaia galuega fitā a le ʻautauofo