Den distrikt kongres na ini Rosiakondre e tyari blesi kon

IBRI yari na ini a waran pisi ten, furu sma fu Rosiakondre di lobi den boitipresi, e gowe libi den oso na foto fu tan na den oso na boiti. Gi den, disi na wan ten fu gowe fu a foto libi pe furu de fu du. Na ini den yari di pasa, furu Yehovah Kotoigi na ini Rosiakondre ben e go tu na den boitipresi, ma fu wan tra reide ede.

Aladi na ini son foto na Rosiakondre, Yehovah Kotoigi no mag preiki, toku den e kon makandra fu anbegi Gado, fu di soleki fa lantiwet e taki, den abi a reti fu du dati. Ma son leisi lantiman di abi wan fowtu denki fu den, noso den Orthodox kerki fesiman fu Rosiakondre e gens den Kotoigi. Disi e meki taki den no man feni bun presi fu hori den alayari distrikt kongres. Fu dati ede, den Kotoigi ben orga den kongres na busi noso na boitipresi. Fu a yari 2007 te go miti 2009, den sortu kongres disi ben hori sowan 40 leisi na ini 25 presi na ini heri Rosiakondre.

Wan Kotoigi di go furu yari na den kongres na ini Rosiakondre, e memre ete: „Na ini den yari di pasa wi ben yuru stadion nanga gebow na ini bigi foto. Furu reti-ati sma nanga lantiman ben kan si fa sani orga bun na ini na organisâsi fu wi èn taki wi e hori den presi krin. Now wi musu kon makandra na ini busi. A de wan sari sani taki now sma no man si o moi a de fa sma fu difrenti kulturu nanga kerki e kon na den sortu moi konmakandra disi.”

 Aladi den sortu konmakandra disi na prisiri okasi, toku wan Kotoigi e taki: „A moi fu si fa brada nanga sisa e gi densrefi èn fa den e tan gi yesi na Gado, te den e fiti densrefi na den difrenti situwâsi. Ma fu taki en leti, te lanti e meki en muilek gi wi fu hori den kongres, dan a sani dati e weri wi èn a e meki wi firi brokosaka. Boiti dati, a e tapu wi tu fu anbegi na Almakti Gado na wan lespeki fasi.” Fa Yehovah Kotoigi na ini Rosiakondre horidoro na ini den muilek situwâsi disi?

Na ini a heri kondre den hori kongres na ini busi

Nofo tron, na a lasti momenti den sma di e yuru den presi gi wi, e taki dati disi no kan moro. Na so den brada di e orga sani abi wan tu dei nomo fu seti tra sani gi den dusundusun sma di e kon na a kongres. Fu eksempre, na ini 2008, Kotoigi na ini Cheboksary, Chuvash Republiek, ben musu hori a distrikt kongres na wan bigi opo presi pe sma gwenti poti tenti, pe wan tu hei bon ben de na lontu, èn pe a Volga-liba ben de na a wan sei. Den brada ben musu du wan bigi wroko. Fu den 1930 sma di den ben fruwakti na a kongres, 1700 ben musu feni wan sribi presi drape. Na a opo presi disi den sma ben musu abi wasi-oso, wasibaki nanga waran watra, toilet, nanga stroom. Boiti dati, ala den sma ben musu kisi nyanyan.

Den brada wroko tranga fu sorgu gi den sani di ben de fanowdu. Den ben feni sma di sabi du temrewroko, sma di sabi fa fu seti stroom, èn sma di sabi fa fu seti toilet nanga wasibaki. Wan grupu fu 350 Kotoigi ben de klariklari fu yepi nanga a wroko, èn 14 fu den ben tan drape tin dei langa. Den ben sa planga, suku drei grasi, èn seti tenti, wasi-oso, nanga toilet. Wan tra grupu brada ben go furu leisi na foto fu bai sani. Fu di den brada no ben abi ijskasi fu poti den nyanyan sani, meki den bosroiti fu gi ala sma dri leisi wan dei, wan waran nyanyan di den ben bori drape. Den sma fu a presi drape, ben wroko makandra nanga den brada, èn den ben yuru wan tu wrokoman fu sreka nyanyan gi den sma di ben o kon na a kongres. Te fu kaba, 500 sma ben tyari den eigi tenti, 150 fu den ben yuru oso krosibei fu na opo presi, èn 15 fu den ben breiti fu sribi na wan presi pe sma e poti drei grasi gi meti. Den tra sma ben tan na ini den tenti di den brada ben seti gi den.

Di den sma fu a kongres doro, dan den ben si bun furu blaw plastiek sturu di ben seti na ini rèi. Na fesisei, tu podium ben de di ben abi wan tu bromki na tapu. Wan fu den podium ben de gi a programa na ini Rosiatongo èn a trawan ben de gi a programa na ini Chuvashtongo. Ala sma ben nyan bun fu a programa pe den ben kisi Bijbel leri èn den ben warderi a tranga wroko fu den sma di ben yepi seti sani. Wan fu den sma di ben yepi bori nyanyan ben taki: „Efu mi no ben si en nanga mi eigi ai, noiti mi ben o bribi taki na organisâsi fu yu sabi fa fu orga sani èn fa fu meki sani waka bun!” Son sma ben agersi den sani di ben seti gi a kongres nanga a Kampufesa di a pipel fu Israel ben hori na ini Bijbel ten.

Na ini tra foto, a ben de so nofo tron taki den Kotoigi ben abi wán dei nomo fu feni wan tra presi fu hori a distrikt kongres èn fu sreka sani. Na so a ben de na ini Nizhniy Novgorod, pe sma ben wroko dei nanga neti fu sreka wan pisi gron. Den ben musu koti bon trowe, koti a grasi, èn den ben musu puru kupari nanga mira di ben de na a gron. Di den sma doro na a kongres tapu freida mamanten, dan den sma ben tyari 2000 plastiek sturu nanga tin toilet. Den ben  seti wasibaki nanga watra, den ben bow wan podium, èn den ben poti wan lichtmotor nanga sani gi a geluid. Wan brada ben taki: „A moro moi sani ben de taki den brada di ben wroko dei nanga neti, no ben firi leki den ben du wan kefalek sani. Na wan sakafasi, den tan yepi trawan na a kongres. Den trutru gi ala den krakti so taki den brada nanga sisa fu den ben kan firi bun èn nyan bun fu a Bijbel leri di den ben kisi.”

Wan tra brada e skrifi: „Ala sma ben wroko bun nanga makandra. Aladi a ben de a fosi leisi di den brada orga wan kongres na wan boitipresi èn aladi furu ten no ben de, toku den ben denki fu ala sani so taki furu sani no ben de di ben o puru a prakseri fu sma na a programa. Bakaten wi no ben firi weri. A ben de neleki Yehovah ben gi ibriwan fu wi a krakti fu du a wroko!”

A yeye fu Gado e yepi

Den problema di den Kotoigi ben kisi te den ben musu hori den kongres, meki taki na difrenti fasi den kon moro krosibei fu makandra èn den kon si fa a yeye fu Gado e yepi den. Na ini Smolensk, den brada ben seti sani fu yuru presi pe sma ben o sribi, ma na a neti fosi a kongres den sma no ben wani yuru den presi gi den moro. Wan owruman e taki: „Di wan tu bus nanga sma doro na wan pisi ten fu wán yuru neti, nowan presi no ben de pe den ben kan tan. Mi bigin krei fu di mi no ben man du noti gi den. Mi begi Yehovah fu yepi mi lusu a problema. Mi ben breiti srefisrefi di wán yuru baka dati, wi ben feni tra presi gi ala sma fu tan! A ben de wan kefalek sani èn disi ben sori taki Yehovah no gowe libi den reti-ati sma na ini muilek ten!” Na wan tra kongres di ben hori na ini busi, den brada ben go na wan dorpu krosibei fu feni presi pe den sma ben kan tan. Fu di den Kotoigi abi wan bun nen na ini a kontren drape, meki den sma fu a dorpu ben de klariklari fu meki den 2000 sma di ben kon na a kongres, tan na ini den oso na a ten fu a kongres.

Wan Kotoigi e taki: „Fu di a kongres ben man hori, meki dati na wan buweisi kaba o prenspari a de fu frutrow na tapu Yehovah na ini ala situwâsi.” Disi ben de so spesrutu di wan tu sma ben kon na wan kongres fu tyari bruya kon. Na ini Novoshakhtinsk, den Orthodox kerki fesiman fu Rosiakondre nanga tra gensman, ben kon singi kerkisingi na ini mikrofon so taki sma no ben o man yere a takiman na a kongres moro. Ma skowtu ben tapu den fu bruya a programa. Wan uma fu na Orthodox kerki di ben de na ini a grupu, ben fadon flaw fu di a presi ben faya. Den brada ben tyari en go na a EHBO afdeling fu a kongres, fu yepi en. Na uma disi ben fruwondru srefisrefi taki den brada nanga sisa ben yepi en.

Den sani di den si meki den fruwondru

Fu di sma de na ai gi den ogri-ati sani di trawan e du fu gens tirimakti, meki nofo tron skowtu èn sosrefi sma na ini a kontren e go luku te sma e hori bigi konmakandra na ini Rosiakondre. Fu eksempre, wan kongres ben hori na busi na ini Volzhskiy, èn wan grupu skowtu di musu luku taki sma no e du ogri fu meki a tirimakti fadon, ben kon na a kongres. Wan fu  den skowtu ben lasi en cellulair na a ten di a programa ben e hori, èn den brada ben yepi en fu feni en na a afdeling pe sma kan go te den lasi wan sani. Syatu baka dati, a basi fu a skowtu ben bel en fu sabi efu den sma na a kongres ben gi trawan deki-ati fu du ogri noso fu gens tirimakti. A skowtu ben taki: „Ala sani e waka bun. Sowan 5000 sma de dyaso èn nowan ogri e pasa. Sortu sma di e gens tirimakti? San mi si dyaso poti mi na prakseri broki. Mi lasi mi cellulair, ma den feni en èn den gi mi en baka!”

Wan fu den sma di ben e hori wakti ben fruwondru fu si fa a gron ben krin èn aladi furu pikin-nengre ben de drape, toku a no ben feni nowan pisi papira pe sukrusani ben de na ini. A man di abi a gron pe wan tra kongres ben hori, ben miti nanga den skowtu, di ben kon yere taki wan bigi kerki konmakandra ben o hori. A man disi ben tyari a komsarsi fu skowtu go na a balkon na a di fu dri sodro fu wan gebow pe den ben kan si a heri gron pe a kongres ben e hori. A man ben taki: „Luku den! Yu kan si nanga yu eigi ai. Den orga ala sani bun!” A man ben fruwondru fu si taki den Kotoigi no ben e dringi sopi èn den no ben e smoko. Boiti dati, a ben gersi leki noiti wan sma ben de drape, fu di den ben krin a presi èn tyari a doti fu den gowe srefi. A ben taki: „A ben de leki wan paradijs!”

A de krin fu si taki a pipel fu Gado de na ini wánfasi

Baka wan kongres di ben hori na ini busi, wan basya fu wan dorpu krosibei, ben taki: „Mi e frustan taki unu a no sma di e meki bigi, ma unu kan du bigi sani trutru. Aladi ibriwan fu wi e hori wisrefi aparti, toku unu man tyari sma kon na wán!” Fu Kaliningrad te go miti Kamchatka, sma na ini a bun bigi kondre disi e tan fruwondru fu si fa a pipel fu Gado de na ini wánfasi na den bigi konmakandra fu den pe den e kisi Bijbel leri. Awansi o esi den musu kenki den sani di den ben seti gi a kongres, èn awansi dati e pasa sondro taki den fruwakti en, toku den e tan sori lespeki gi tirimakti èn gi tra sma.

Awansi sortu situwâsi e opo kon, den Kotoigi fu Yehovah na ini Rosiakondre e tan kon makandra nanga prisiri fu kisi Bijbel leri. Den e begi ’gi den kownu èn gi ala den bigiman fu kondre, so taki den kan libi wan tiri libi sondro dyugudyugu èn so taki den kan dini Gado dorodoro na wan getrow fasi èn na wan seryusu fasi’.​—1 Timoteyus 2:2.

[Prenspari pisi na tapu bladzijde 27]

Wan Kotoigi di e yepi fu seti sani na wan kongres di ben hori na wan opo presi

[Prenspari pisi na tapu bladzijde 29]

Yehovah Kotoigi na ini Rosiakondre e tan libi ’wan tiri libi sondro dyugudyugu, so taki den kan dini Gado dorodoro na wan getrow fasi’

[Prenki na tapu bladzijde 28]

Sma ben de klariklari fu wroko makandra fu krin den gron fosi a kongres hori èn fu sreka nyanyan gi den dusundusun sma di ben o kon na a kongres

[Prenki na tapu bladzijde 29]

Ala sma ben nyan bun fu a Bijbel leri di den kisi èn den ben warderi a tranga wroko di sma ben du fu seti sani gi a kongres