Mwikasha Abena Kristu Banenu

BA JAROSŁAW na bena mwabo ba Beata * batila, “pa myaka 10, twabikile fye amano ku makwebo pa kuti tulekwata indalama, kabili twali abakankaala icine cine. Nangu ca kuti twakuliile mu cine, twalitalwike sana kuli Yehova kabili twalemona ukuti te kuti tubweleleko.”

Munyinefwe na umbi, Marek, atila: “Pa mulandu wa kuti imikalile ne fya mapolitiki fyalyalwike mu Poland, ilingi line naleba pa bulofwa. Calenkalipa sana. Naletiina ukutampa ukucita ubukwebo pantu nshaishibe ifya makwebo. Lelo nalisukile natendeka ubukwebo, pantu naleti e lyo nkalasunga bwino ulupwa lwandi, e lyo no kupepa nkalapepa fye bwino. Mu kupita kwa nshita, naishilesanga ukuti naleibepa fye.”

Mu calo umo imikalile ilebipilako pa mulandu wa kuti imitengo ya fintu nainina no bulofwa nabufula, bamo balasakamikwa sana ica kuti tabasala bwino ifya kucita. Bamunyinefwe abengi balashala balebomba na pa numa ya kwinuka, nangu ukwingila incito na imbi, nelyo ukutendeka amakwebo nangu ca kutila tabaishiba bwino ifya makwebo. Batontonkanya ukuti nga balekwata indalama ishingi, ulupwa lwabo lukalaikala bwino sana no kuti ico tacakalenge  bakabwelele inuma mu kupepa Yehova. Lelo, amafya ayabula ukwenekela no kwaluka-aluka mu fya bunonshi mu calo na fyo kuti fyalenga na mapange ayali fye bwino ukufulungana. Ici calenga bamo ukulafwaisha ukukwata ifyuma ica kuti balekelesha ne fya kwa Lesa.—Luk. Mil. 9:11, 12.

Bamunyinefwe bamo na bankashi balibika sana amano ku fya muli ici calo ica kuti tabakwata ne nshita ya kuisambilisha abene, ukusangwa mu kulongana, nelyo ukushimikila. Abacita ifya musango yu, balafilwa ukubombela Lesa bwino kabili bucibusa bwabo na Yehova bulapwa. Kabili kuti baleka no kubika amano na kuli bucibusa bumbi ubwacindama ubwaba pali bena na ‘batetekela banabo.’ (Gal. 6:10) Bamo balaya baletaluka Abena Kristu banabo. Tontonkanyenipo sana pali ici.

Ifyo Tulingile Ukucitila Abena Kristu Banensu

Apo tuli ba bwananyina, fingi twingacita pa kulanga ukuti twalitemwa bamunyinefwe na bankashi. (Rom. 13:8) Napamo mu cilonganino umo mwaba mwaliba ‘abalanda abafwaya ubwafwilisho.’ (Yobo 29:12) Bamo nalimo tabakwata ifikabilwa mu mikalile. Umutumwa Yohane atweba ifyo tufwile ukucita ku ba musango yu. Atila: “Onse uukwete ifikabilwa mu mikalile ya pano calo, nga amona munyina nabulisha, lelo akaana ukumulanga inkumbu, bushe ninshi ukutemwa Lesa kwaikala shani muli uyu muntu?”—1 Yoh. 3:17.

Nalimo mwalyafwapo abantu abashikwata ifikabilwa mu mikalile. Na lyo line, tatufwile ukupelela fye pa kubafwa mu fyo bakabila. Bamo kuti bafwaya ukubafwa ilyo batalalilwa na lintu bafuupulwa. Bamo napamo baimona kwati tabalinga ukubombela Yehova, bambi balilwala sana, e lyo bamo balifwilwa. Ifyo twingacita pa kubakoselesha, kukutika ilyo balelanda e lyo no kulanshanya nabo. Ifi kuti fyalenga basansamuka na bucibusa bwabo na Yehova kuti bwakoselako. Nga twacita ifi, ninshi tulabasansamusha no kubafwa ukukosha bucibusa bwabo na Yehova. (1 Tes. 5:14) Ukucita ifi ilingi line kulakosha bucibusa bwesu na bamunyinefwe.

Baeluda mu cilonganino maka maka balingile ukukutikisha ilyo bamunyinabo balelanda e lyo no kubalangulukilako, kabili bafwile ukubafunda ukulingana na Malembo. (Imil. 20:28) Nga balecita ifyo ninshi balepashanya umutumwa Paulo ‘uwatemenwe sana’ Abena Kristu banankwe.—1 Tes. 2:7, 8.

Bushe Umwina Kristu nga afuma mu cilonganino, kuti abomba bwino umulimo wa kwafwa Abena Kristu banankwe uo apeelwa? Bakangalila mu cilonganino nabo bene kuti batunkwa ukukonkelela ifintu ifya muli ici calo. Kuti caba shani Umwina Kristu nga akonkelela ifi fintu?

 Ukusakamikwa Sana

Ukupoosa inshita iikalamba ku kusanga umwa kuliishisha ulupwa ilingi line kulaleta amasakamika kabili kuti kwalenga twilabika amano ku fya kwa Lesa. (Mat. 13:22) Ba Marek abo tulandilepo kale, batile: “Ilyo ubukwebo bwandi bwawile, nasalilepo ukuya ku calo cimbi mu kufwaya incito ya pa muulu. Nailepwako imyeshi itatu, lelo nalibweleleko na kabili no kuyaikalako imyeshi na imbi itatu, ifyo fine e fyo nalecita, kabili pa ng’anda naleikalapo fye inshita inono. Ici calesakamika sana umwina mwandi uushali Nte.”

Iyi mibombele yaliletele ubwafya pa lupwa lwabo. Ba Marek basosele no kuti: “Nalebombela umwakaba sana pa ma-awala ayengi, e lyo kabili nalebomba na bantu aba musaalula, abatemenwe ukucusha bambi. Bali kwati tupondo. Aba bantu balencusha kabili naleba no bulanda. Apo nshalekwata ne nshita ya kuisakamana ne mwine, naletwishika nga kuti nasakamana bambi.”

Ifyabipa ifyafumine mu fyo ba Marek basalilepo ukucita, fifwile ukutwafwa ukutontonkanya sana pali uyu mulandu. Nangu cingamoneka kwati ukwingila incito ku calo cimbi e kwingapwisha amafya ya ndalama, ukucita ifyo kuti kwaleta amafya yambi. Tutile mwakuukila ku calo cimbi, bushe ulupwa lwenu lukatwalilila ukuba ulwakosa mu kupepa Lesa no kuba ne nsansa? Bushe ukukuukila ku calo cimbi kukalenga mukaleke ukulongana? Bushe ico tacakalenge mukafilwe ukula-afwa Abena Kristu banenu?—1 Tim. 3:2-5.

Mufwile mwalimona ukuti te balya fye abaya mu kwingila incito ku fyalo fimbi abasendwa sana ne ncito. Tontonkanyeni pali ba Jarosław na ba Beata. Ba Jarosław batila: “Pa numa ya kuupana, twaiswile akalituuka pa ncende iisuma umo twaleshitisha ifya kulya. Pa kwamba calemoneka kwati cali fye bwino. Apo twalepanga sana indalama, twalilundulwile ubukwebo bwesu. Lelo tatwalesangwa ku kulongana pantu tatwalekwata inshita. Tapakokwele, nalilekele bupainiya no butumikila. Apo twalepanga indalama ishingi, twabikile indalama pamo no ushali Nte no kwisula ituuka ilikalamba. Natendeke no kulaya ku fyalo fimbi ku kucita ubukwebo umwalefuma indalama ishingi sana. Nshalesangwa sana pa ng’anda, kanshi umwina mwandi no mwana wandi baleikala fye beka. Na mu kulekelesha, ubukwebo bwesu ubwaletuletela sana indalama bwalengele twaleka ukubombela Lesa. Apo twalilekele ukulongana, tatwaletontonkanyapo na pali bamunyinefwe.”

Cinshi twingasambililako kuli ici? Ukufwaya ukwikala bwino kuti kwalenga Umwina Kristu aleka ukubika amano ku fyacindama, no kulufya “ifya kufwala fyakwe,” e kutila icishibilo ca kuti Mwina Kristu. (Ukus. 16:15) Ici kuti calenga twaleka ukwampana na bamunyinefwe abo twaleafwilisha kale.

Ibebeteni Bwino

Nalimo kuti twalatontonkanya ukuti ‘ica musango yu te kuti cincitikile.’ Lelo bonse tulingile ukutontonkanyapo sana pa fyo tukabila icine cine. Paulo alembele ukuti: “Tatwaletamo akantu muli ici calo, kabili teti tufumyemo akantu. E ico, pa kuba ne fya kulya ne fya kufwala no mwa kwikala, tuteke imitima kuli ifi fine.” (1 Tim. 6:7, 8) Kwena, imikalile ya bantu mu fyalo yalipusanapusana. Imikalile iingamoneka ukuti ya pa nshi mu calo icikankaala kuti nalimo yamoneka iya pa muulu sana mu fyalo fimbi.

Te mulandu ne fyo imikalile yaba mu calo twikala, tufwile ukutontonkanya pa mashiwi Paulo akonkeshepo ukulanda ayatila: “Abafwaisha ukuba ne fyuma bawila mu matunko kabili mu citeyo kabili mu lunkumbwa ulwingi ulwa kutumpa kabili ulwa kubaletelela, ifitwala abantu mu kuloba kabili mu bonaushi.” (1 Tim. 6:9) Abateya ifiteyo balafisa iciteyo, pa kuti inama icimona, ipulikilwe fye naikatwa. Kuti twacita shani pa kuti tatwiketwe mu ‘lunkumbwa lwa kuiletelela’?

Nga twaishiba ifyacindama kuti catwafwa ukulakwata inshita iikalamba iya kucita ifya Bufumu, no kulaisambilisha Baibolo. Ukuisambilisha kuti kwalenga Umwina Kristu  ukuba “uwafikapo bwino bwino, uwaipangasha icine cine” ukwafwa bambi.—2 Tim. 2:15; 3:17.

Baeluda balyeseshe pa myaka ukwafwa no kukoselesha ba Jarosław. Ici calengele baluke sana. Ba Jarosław batile: “Mu kulanshanya kumo ukwangafwile sana, baeluda balandile pa mulumendo umo uo Baibolo yalandapo uwakwete icuma, uwalefwaya ukwikala umuyayaya lelo talefwaya ukulekuluka mu fyuma fyakwe. Lyena, mu mucenjelo banjipwishe nga ca kuti ifyali ulya mulumendo e fyo na ine naba. Uko kulanshanya kwalengele namona ifyo nalingile ukucita!”—Amapi. 11:28; Marko 10:17-22.

Ilyo ba Jarosław babebetele imikalile yabo, basalilepo ukuleka ukucita amakwebo ayakalamba. Pa numa ya myaka ibili, ba Jarosław no lupwa lwabo batampile ukupepa na kabili. Pali ino nshita ni baeluda ababombela bamunyinabo. Ba Jarosław batile: “Ilyo bamunyinefwe babika sana amano ku makwebo yabo ica kuti balekelesha ne fya kwa Lesa, mbalondolwela ifyancitikile pa kubeba ububi bwaba mu kuba kwi koli limo line na bashatetekela. Calyafya ukukaana ifintu ifilemoneka ukuba ifisuma no kuba no bufumacumi.”—2 Kor. 6:14.

Ba Marek nabo balisambilileko fimo ilyo ifyabipa fyabacitikile. Nangu ca kuti incito balebomba ku calo cimbi yalebaletela indalama ishaleafwa ulupwa lwabo, bucibusa bwabo na Lesa na Bena Kristu banabo bwalipwile. Mu kuya kwa nshita, balimwene ukuti balingile ukubika sana amano ku fyacindama. Batile: “Pa myaka iingi, nali kwati ni Baruki ‘uwalefwaya ifintu ifikalamba.’ Mu kulekelesha, naebele Yehova ifyali ku mutima, kabili ino nshita mona ukuti nalishikatala mu kupepa Lesa.” (Yer. 45:1-5) Ba Marek nomba bafwaya ukubomba “umulimo uusuma” uwa kuba kangalila mu cilonganino.—1 Tim. 3:1.

Ba Marek basoka bonse abengafwaya ukuya ku calo cimbi mu kufwaya incito iyo bengalafola indalama ishingi abati: “Ilyo uli ku calo cimbi, calyanguka sana ukwikatwa mu citeyo ca ici calo cabipa. Ukukanaishiba bwino ululimi balanda muli ico calo kuti kwalenga mulefilwa ukulanshanya bwino na bambi. Kuti mwabwelela ku calo cenu ne ndalama, lelo pa kuti mukabe abakosa na kabili mu fya kwa Lesa kuti papita inshita.”

Tukalatemuna Yehova nga tulebomba incito e lyo no kubomba bwino umulimo twapeelwa uwa kwafwa bamunyinefwe. Kabili bambi bakalatupashanya ilyo balefwaya ukusala bwino ifya kucita. Bonse ababa na masakamika balakabila ukubafwa, ukubalanga inkumbu, kabili balakabila bamunyinabo na bankashi abo bengapashanya. Baeluda na bamunyina bambi abakosoka kuti ba-afwa Abena Kristu banabo ukutwalilila ukuba abashikatala no kukanasakamikwa sana.—Heb. 13:7.

E ico, twikatala atusha Abena Kristu banensu pa mulandu wa kubika sana amano ku ncito. (Fil. 1:10) Lelo natutwalilile ukubika amano ku fya Bufumu pa kuti tukabe ‘abacindama kuli Lesa.’—Luka 12:21.

[Futunoti]

[Ifikope pe bula 21]

Bushe incito ilalenga mulepuswa mu kulongana?

[Ifikope pe bula 23]

Bushe mulaitemenwa ukwafwa bamunyinenwe na bankashi?