Ayawg Talikdi ang Inyong Isigkamagtutuo

“SULOD sa napulo ka tuig, kami nalinga sa mga tanyag sa kalibotan sa negosyo, ug kami nadato gayod. Bisag nagdako mi sa kamatuoran, kami nahilayo kang Jehova ug naglisod sa pagbalik,” miasoy si Jarosław ug iyang asawa nga si Beata. *

Ang laing brader nga si Marek nahinumdom: “Tungod sa sosyal ug politikal nga kausaban sa Poland, pirme kong mawad-ag trabaho ug ako nadesperado. Nahadlok kong magnegosyo kay dili ko kana linya. Sa ulahi, natental ko sa pagnegosyo sa pagtuo nga mas matagan-an sa materyal ang akong pamilya nga dili ra maapektohan ang akong espirituwalidad. Sa ngadtongadto, akong naamgohan nga nasayop ko.”

Tungod sa nagkamahal nga palaliton ug nagkadaghan ang walay trabaho, ang pipila madesperado ug makahimog dili maalamong mga desisyon. Daghang igsoon ang mag-obertaym, magbaton ug duha ka trabaho, o magnegosyo bisag walay kasinatian. Nagtuo sila nga ang ekstrang kita makatabang sa pamilya ug dili ra makadaot sa ilang espirituwalidad. Apan, ang wala-damhang mga hitabo ug di-kasaligang ekonomiya makababag bisan sa  maayong mga plano. Ingong resulta, daghan ang nabitik sa kahakog ug naapektohan ang ilang pag-alagad tungod sa materyal nga pangagpas.—Eccl. 9:11, 12.

Kay puliki na kaayo sa kalibotanong pangagpas, ang pipila ka igsoon wala nay panahon sa pagtuon, pagtambong, o pagsangyaw. Dayag nga ang ilang pagpabaya nakadaot sa ilang pag-alagad ug relasyon kang Jehova. Mabiyaan usab nila ang laing importanteng relasyon—ang pagpakig-uban sa ‘kabanay nila sa pagtuo.’ (Gal. 6:10) Ang uban anam-anam nga magpalayo sa mga igsoon. Tagda kini.

Atong Obligasyon sa Isigkamagtutuo

Ingong managsoon sa pagtuo, daghan kitag kahigayonan sa pagpakitag gugma sa usag usa. (Roma 13:8) Lagmit nakakita ka diha sa inyong kongregasyon ug “mga sinakit nga nagtuaw alang sa tabang.” (Job 29:12) Ang pipila tingali kabos. Si apostol Juan nagpahinumdom kanato kon unsay atong mahimo bahin niini. “Si bisan kinsa nga adunay mga kahinguhaan sa kinabuhi niining kalibotana ug makita ang iyang igsoon nga nanginahanglan ug bisan pa niana magsira sa pultahan sa iyang malumong pagkamabination nganha kaniya, unsaon man sa gugma sa Diyos sa pagpabilin diha kaniya?”—1 Juan 3:17.

Tingali nakahatag ka nag daghang materyal nga tabang sa uban. Apan, dili lamang materyal ang atong ikatabang sa mga igsoon. Ang uban tingali nagtuaw alang sa tabang tungod sa kamingaw o kahigawad. Sila tingali mobati nga dili takos sa ilang pag-alagad, nag-antos sa grabeng sakit, o namatyag minahal. Kita makadasig kanila pinaagi sa pagpaminaw ug pagpakig-estorya kanila, sa ingon makatabang kanila sa emosyonal ug espirituwal nga paagi. (1 Tes. 5:14) Kini sagad makapalig-on sa atong gugma sa mga igsoon.

Ang mga ansiyano ilabina ang makapaminaw nga may empatiya, magmasinabtanon, ug makahatag ug mahigugmaong tambag gikan sa Kasulatan. (Buh. 20:28) Sa ingon niana, sila nagsundog kang apostol Pablo, nga may “malumong pagmahal” sa iyang mga igsoon sa pagtuo.—1 Tes. 2:7, 8.

Apan, kon ang usa nahilayo na sa kongregasyon, unsaon niya pagtuman ang iyang obligasyon sa mga igsoon? Bisan ang mga ansiyano mahimong matental sa materyal nga mga pangagpas. Komosta kon ang usa mahulog sa maong tentasyon?

Nabug-atan sa mga Kabalaka sa Kinabuhi

Sa nahisgotan na, ang sobrang paghago aron matagan-an ang panginahanglan sa pamilya sagad magpatunghag mga kabalaka ug mahimong makapahuyang sa atong espirituwalidad. (Mat. 13:22) Si Marek nga gihisgotan  ganina, miingon: “Sa nabangkrap ang akong negosyo, nanarbaho ko sa laing nasod. Tagtulo ka bulan ang akong trabaho, nga makabakasyon lag kadiyot sa akong pamilya. Tungod niana ang akong di-magtutuong asawa nag-antos sa emosyonal nga paagi.”

Dili lang akong pamilya ang nag-antos. “Gawas sa daghang oras nga pagtrabaho sa naglagiting nga kainit,” si Marek mipadayon, “katrabaho pa gyod nako ang bugoy nga mga tawo nga mamentaha sa uban. Sama silag mga kriminal. Mibati kog depresyon ug samag dinaogdaog. Kay dili na makaatiman sa akong kaugalingon, unsa pa kaha ang pag-alagad sa uban.”

Angay natong tagdon ang makapasubong resulta sa desisyon ni Marek. Bisan pag ang pagtrabaho sa gawas sa nasod morag makasulbad sa problema sa pinansiyal, dili ba makapatungha kinig laing mga problema? Pananglitan, unsay mahitabo sa espirituwal ug emosyonal nga kahimtang sa atong pamilya? Dili ba kana makapabulag nato gikan sa kongregasyon? Dili ba kana maghikaw nato sa pribilehiyo sa pag-alagad sa isigkamagtutuo?—1 Tim. 3:2-5.

Apan ang usa mahimong malinga sa sekular nga trabaho bisag dili manarbaho sa gawas. Tagda si Jarosław ug si Beata. “Maayo ra man sa sinugdan,” si Jarosław miingon. “Ingong bag-ong minyo, nagbukas mig gamayng tindahan sa hotdog. Kay maayo ang kita, gipadak-an namo ang among negosyo. Tungod sa kapuliki, dili na mi regular sa pagtambong sa tigom. Wala madugay, miundang ko sa pagpayunir ug pagkaministeryal nga alagad. Kay nalipay sa among dakong kita, nagbukas mig dakong tindahan ug nakigsosyo sa dili Saksi. Wala madugay, tigbiyahe na ko sa gawas sa nasod alang sa mga kontrata nga mibalor ug minilyong dolyares. Pirme kong wala sa balay, ug naapektohan ang relasyon sa among pamilya. Ngadtongadto, nakahunong mi sa pag-alagad tungod sa among mauswagong negosyo. Kay nahilayo na sa kongregasyon, ang mga igsoon wala na sa among hunahuna.”

Unsang leksiyon ang atong makat-onan niini? Ang tinguha sa paghimog kaugalingong “paraiso” makabitik sa usa ka Kristohanon kay kana moresulta sa pagkatagbaw na sa kaugalingon—nga mawala pa gani ang “iyang panggawas nga mga besti,” ang iyang ilhanan sa pagka-Kristohanon. (Pin. 16:15) Kana magpahilayo kanato gikan sa mga igsoon nga nagkinahanglan sa atong tabang.

Matinud-anong Susiha ang Kaugalingon

Lagmit maghunahuna kita, ‘Dili kana mahitabo nako.’ Apan angay natong palandongon kon unsa lamang ang atong gikinahanglan sa kinabuhi. “Kita walay gidalang bisan unsa nganhi sa kalibotan, ug kita walay madala nga bisan unsa sa atong paggawas niini,” misulat si Pablo. “Busa, kon kita adunay makaon ug ikabesti, kita magmakontento na niining mga butanga.” (1 Tim. 6:7, 8) Tinuod, dili pareho ang sukdanan sa pagkinabuhi sa lainlaing nasod. Tingali ang simpleng pagkinabuhi sa dato nga nasod mahimong luho na sa pobreng mga nasod.

Bisag unsa ang sukdanan sa pagkinabuhi diha sa atong dapit, tagda ang giingon ni Pablo: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” (1 Tim. 6:9) Ang usa ka lit-ag dili makita sa tukbonon. Gidisenyo kini aron kalit nga masikop ang biktima. Unsay atong buhaton aron dili kita malit-agan sa “makadaot nga mga tinguha”?

Ang pagtakdag mga prioridad magtukmod kanato sa paggahin ug mas daghang panahon alang sa intereses sa Gingharian, lakip sa personal nga pagtuon. Ang maong pagtuon uban ang pag-ampo makatabang sa usa ka Kristohanon nga mahimong “takos gayod, bug-os nga masinangkapan” sa pagtabang sa uban.—2 Tim. 2:15; 3:17.

Latas sa pipila ka tuig, ang mahigugmaong mga ansiyano nagpalig-on ug nagdasig kang Jarosław. Siya natukmod sa paghimog dagkong  kausaban. Siya miingon: “Sa usa ka seryosong panag-estoryahay, gihisgotan sa mga ansiyano ang asoy sa Kasulatan bahin sa usa ka dato nga batan-ong lalaki nga gustong makabatog kinabuhing walay kataposan apan dili gustong mobiya sa iyang kabtangan. Unya mataktikanhon silang nangutana kon kadto ba mapadapat kanako. Kadto nakapahigmata kanako!”—Prov. 11:28; Mar. 10:17-22.

Matinud-anong gisusi ni Jarosław ang iyang kahimtang ug midesisyon nga mohunong na sa dagkong negosyo. Paglabay sa duha ka tuig, siya ug ang iyang pamilya naaktibo na usab sa pag-alagad. Siya karon usa ka ansiyano. Si Jarosław miingon: “Kon may mga igsoon nga mapuliki pag-ayo sa negosyo nga mapasagdan ang ilang espirituwalidad, iasoy nako ang akong kasinatian aron ipakita nga dili maalamon ang pagpakigsosyo sa dili-magtutuo. Dili sayon ang pagbalibad sa makapadaning mga tanyag ug ang paglikay sa malimbongong mga buhat.”—2 Cor. 6:14.

Si Marek usab nakakat-on ug leksiyon human sa pait nga kasinatian. Bisag ang dakog-suweldo nga trabaho sa laing nasod nakatabang sa iyang pamilya sa pinansiyal, nahuyang ang iyang relasyon sa Diyos ug sa mga igsoon. Ngadtongadto, iyang gisusi pag-usab ang iyang mga prioridad. “Sa daghang katuigan, ang akong kahimtang nahisama sa iya ni Baruk sa karaang panahon nga ‘nagpadayon sa pagtinguha ug dagkong mga butang alang sa iyang kaugalingon.’ Sa kataposan, akong gipahayag kang Jehova ang akong mga kabalaka, ug karon akong nabatonan pag-usab ang espirituwal nga katimbang.” (Jer. 45:1-5) Si Marek karon nagapangab-ot sa “maayong buhat,” ang pagkaansiyano sa kongregasyon.—1 Tim. 3:1.

Si Marek nagpasidaan niadtong nagplanong manarbaho sa gawas sa nasod aron makabatog dakong suweldo: “Kon tua ka sa gawas, dali kaayo kang mahulog sa mga lit-ag niining daotang kalibotan. Kay dili ka kaayo antigo sa ilang pinulongan, lisod ang pagpakig-estorya. Mouli ka tingali nga daghag kuwarta, apan ang imong espirituwalidad nahuyang ug kana mahimong dugayng maulian.”

Ang paghupot ug timbang nga panghunahuna sa sekular nga trabaho ug sa atong obligasyon sa mga igsoon makapahimuot kang Jehova. Ug kita mahimong panig-ingnan sa uban bahin sa paghimog maalamong desisyon. Kadtong nabug-atan nagkinahanglan sa tabang, kahingawa, ug sa maayong panig-ingnan sa ilang mga igsoon. Ang mga ansiyano ug ubang hamtong nga igsoon sa kongregasyon makatabang sa isigkamagtutuo sa paghupot ug timbang nga panghunahuna ug sa paglikay nga mabug-atan sa mga kabalaka sa kinabuhi.—Heb. 13:7.

Hinaot dili nato talikdan ang atong isigkamagtutuo tungod sa pagkapuliki sa sekular nga trabaho. (Filip. 1:10) Hinunoa, ‘magmadato kita ngadto sa Diyos’ samtang giuna nato ang intereses sa Gingharian diha sa atong kinabuhi.—Luc. 12:21.

[Footnote]

[Mga hulagway sa panid 21]

Dili ka ba makatambong sa tigom tungod sa imong trabaho?

[Mga hulagway sa panid 23]

Gipabilhan mo ba ang imong kahigayonan nga makatabang sa mga igsoon?