Diyo Pulos Baybay-an Dagiti Kapammatianyo

“ITI uneg ti sangapulo a tawen, naallukoykami nga agnegosio isu a bimmaknangkami. Nupay napadakkelkami iti kinapudno, naisiasikami ket mabainkamin nga agsubli iti kongregasion,” kuna ni Jarosław ken ti baketna a ni Beata. a

Malagip ti sabali pay a kabsat nga agnagan iti Marek: “Naupayak ta kanayon a maikkatak iti pagtrabahuak gapu iti panagbalbaliw ti kagimongan ken politika iti Poland. Maamakak nga agnegosio gapu ta awan kapadasak iti dayta. Ngem naallukoyak met laeng ta impagarupko nga ad-adda a maipaayak iti material a kasapulan ti pamiliak nga awan ti aniaman a dakes nga epektona iti espiritualidadko. Idi agangay, natakuatak a di umiso ti inaramidko.”

Iti daytoy lubong nga agtultuloy a nguminngina ti gagatangen ken umad-adu ti awan trabahona, dadduma ti nagbalin a desperado isu a nakaaramidda kadagiti di umiso a desision. Adu a kakabsat ti nangikeddeng nga agobertaym iti trabaho, umawat iti kanayonan a trabaho, wenno agnegosio uray awan ti kapadasanda. Impagarupda a ti kanayonan a birokda ket makatulong iti pamiliada ken awan ti dakes nga epektona iti espiritualidadda. Kaskasdi, mabalin  a saan nga agballigi uray ti kasayaatan a plano gapu kadagiti di mapakpakadaan a pasamak ken ti di natalged nga ekonomia. Kas resultana, adda dagiti nagbalin a naagum ken nangisakripisio iti panagserbida ken Jehova gapu iti material a bambanag.​—Ecl. 9:11, 12.

Dadduma a kakabsat ti naigamer kadagiti aramid ti lubong isu nga awan panawendan para iti personal a panagadal, pannakigimong, wenno panangasaba. Nalawag a naapektaran ti espiritualidad ken relasionda ken ni Jehova gapu iti kasta a kinaliway. Mabalin a mabaybay-anda ti sabali pay a napateg a relasion​—ti nasinged a pannakikaduada kadagiti ‘nainaig kadakuada iti pammati.’ (Gal. 6:10) Dadduma ti in-inut nga immadayo iti Nakristianuan a panagkakabsat. Usigentayo a naimbag daytoy a banag.

Ti Obligasiontayo Kadagiti Kapammatiantayo

Kas agkakabsat, adu dagiti gundaway a maipakitatayo ti ayattayo iti maysa ken maysa. (Roma 13:8) Mabalin nga adda kakongregasionyo a ‘marigrigatan ken agkasapulan iti tulong.’ (Job 29:12) Dadduma ti nalabit awanan iti kangrunaan a material a kasapulan. Palagipannatayo ni apostol Juan no ania ti maaramidantayo kadagiti kasta a kasasaad. “Siasinoman nga addaan kadagiti sanikua daytoy a lubong a pangtaginayon iti biag ket makitana ti kabsatna nga agkasapulan ket kaskasdi a punitanna ti ruangan dagiti nadungngo a panangngaasi kenkuana, iti ania a pamay-an nga agtalinaed kenkuana ti ayat ti Dios?”​—1 Juan 3:17.

Nalabit sipaparabur a tinulongam dagiti agkasapulan. Ngem saantayo laeng a maipakita ti pannakaseknantayo kadagiti kakabsat babaen ti panangipaaytayo kadagiti material a tulong. Dadduma ti agpatulong gapu ta maladingitan wenno maup-upayda. Mabalin a mariknada a saanda a maikari, agsagsagabada iti nakaro a sakit, wenno natayanda iti ipatpateg iti biag. Ti maysa a pamay-an a maparegtatayo ida ket ti panangimdeng ken pannakisarita kadakuada, iti kasta, maipaayantayo ida iti emosional ken naespirituan a tulong. (1 Tes. 5:14) Dayta ti ad-adda a mangpauneg iti panagayattayo kadagiti kakabsattayo.

Dagiti panglakayen iti kongregasion ti nangnangruna nga addaan iti responsabilidad nga umimdeng buyogen ti empatia, mangipakita iti pannakipagrikna, ken mangipaay iti naayat a Nainkasuratan a balakad. (Ara. 20:28) Iti kasta a pamay-an a dagiti manangaywan matuladda ni apostol Pablo, nga addaan iti ‘kinalailo’ kadagiti naespirituan a kakabsatna.​—1 Tes. 2:7, 8.

Ngem no umadayo iti arban ti maysa a Kristiano, kasanona a maaramid ti obligasionna kadagiti kapammatianna? Uray dagiti manangaywan, masulisogda met a manggun-od kadagiti materialistiko a kalat. Kasanon no tumulok ti maysa a Kristiano iti kasta a sulisog?

 Mapadagsenan Kadagiti Pakaringgoran iti Biag

Kas nadakamaten, ti panagregget a mangipaay kadagiti kangrunaan a material a kasapulan ti pamilia ket masansan a mangyeg iti pakaringgoran ken pakapuyenna ti panangsalimetmet kadagiti Nakristianuan a prinsipio. (Mat. 13:22) Ni Marek, a nadakamat itay, kinunana: “Idi nalugi ti negosiok, inkeddengko ti agsapul iti nangato ti sueldona a trabaho iti sabali a pagilian. Idi damo, tallo laeng a bulan ti kontratak sa kalpasanna, tallo manen a bulan. Naulit-ulit dayta ket sumagmamano laengen nga aldaw ti panagtalinaedko iti balaymi. Gapu iti dayta, naapektaran ti emosion ti di manamati nga asawak.”

Saan laeng a ti pamiliak ti naapektaran. “Malaksid iti adu nga oras a panagtrabahok uray nakaro ti pudot,” intuloy ni Marek, “nakalangenko pay dagiti awan modona a tattao a mangikagkagumaan a manggundaway iti sabsabali. Kasda la kriminal. Naupayak ken panagriknak kaslaak la paspasurotda. Awan pay panawenkon a mangasikaso iti espiritualidadko isu a pagduaduaak no kabaelak pay a pagserbian dagiti kakabsat.”

Ti nakalkaldaang nga imbunga ti desision ni Marek ti rumbeng a mamagpanunot kadatayo. Uray no ti panagabrod ti kasla solusion ti pinansial a parikut, saanto ngata a mangpataud dayta iti sabali pay a problema? Kas pagarigan, ania ngata ti mapasamak iti naespirituan ken emosional a kasapulan ti pamiliatayo? Saanto ngata a dayta ti mangwaswas iti singgaluttayo iti kongregasion? Saan ngata a dayta ti mangpukaw iti pribilehiotayo nga agserbi kadagiti kapammatiantayo?​—1 Tim. 3:2-5.

Ngem nalabit a pagaammoyo a saan laeng a dagiti agab-abrod ti mabalin a maigamer iti sekular a trabaho. Usigentayo ti kapadasan da Jarosław ken ni Beata. “Nasayaat ti panggepmi idi damo,” kuna ni Jarosław. “Gapu ta kakaskasarmi, nanglukatkami iti bassit a paglakuan iti hotdog iti nasayaat a lugar. Ti dakkel a ganansia ti nangguyugoy kadakami a mangpadakkel iti negosiomi. Ngem gapu ta okupadokami iti dayta, malangananmin dagiti Nakristianuan a gimong. Di nagbayag, nagikkatak a payunir ken ministerial nga adipen. Gapu ta maragsakankami iti adu a magangganansiami, pinadakkelmi ti negosiomi ken nakisosiokami iti maysa a di manamati. Idi agangay, mapmapanakon iti sabali a pagilian tapno agpirma kadagiti kontrata nga aggatad iti minilion a doliar. Manmanoakon nga adda iti balaymi, ken naapektaran ti relasionko ken ni baketko ken iti anakmi. Kamaudiananna, ti narang-ay a negosiomi ti nangpaturog kadakami iti naespirituan. Gapu ta saankamin a makitimtimpuyog iti kongregasion, nalipatanmin dagiti kakabsat.”

Ania ti maadaltayo iti dayta? Mabalin a masiluan ti maysa a Kristiano gapu iti tarigagayna a mangpataud iti bukodna a “paraiso,” nga agresulta iti kinaaleng-aleng ken pannakapukaw pay ketdi ti “makinruar a kawesna,” ti pakabigbiganna kas Kristiano. (Apoc. 16:15) Dayta ti mangisina kadatayo kadagiti kakabsattayo a dati a tultulongantayo.

Napudno a Panangsukimat iti Bagi

‘Saan a mapasamak kaniak dayta,’ mabalin nga irasontayo. Ngem nasayaat nga usigentayo a naimbag no ania a talaga ti kasapulantayo iti biag. “Awan ti inyegtayo iti lubong, ket saantay met a mabalin ti mangitugot iti aniaman a banag,” insurat ni Pablo. “Gapuna, no adda pagtaraon ken pagkawestayo, mapnektayon kadagitoy a banag.” (1 Tim. 6:7, 8) Agpayso a nagduduma ti kasasaad ti panagbiag iti tunggal pagilian. Ti maibilang a nanumo a panagbiag iti narang-ay a pagilian ket mabalin a maibilang a kinaluho iti dadduma pay a pagilian.

Aniaman ti kasasaad ti panagbiag iti lugartayo, usigentayo ti sumaganad a sasao ni Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.” (1 Tim. 6:9) Nakalemmeng ti silo iti lugar a di makita ti posible a biktima. Nadisenio dayta tapno masiluan ti biktima a dina madmadlaw. Kasano a maliklikantayo ti masiluan kadagiti ‘makapasakit a tarigagay’?

No ipasdektayo dagiti prioridadtayo, maaddaantayo iti ad-adu a tiempo nga agserbi ken Jehova, a pakairamanan ti personal a panagadal.  Ti kasta a panagadal a nabuyogan iti kararag tulonganna ti maysa a Kristiano nga agbalin a ‘naan-anay a makabael, naan-anay a nakabalan’ a tumulong iti sabsabali.​—2 Tim. 2:15; 3:17.

Iti uneg ti sumagmamano a tawen, dagiti naayat a panglakayen inkagumaanda a pinaregta ni Jarosław. Natignay a mangaramid iti dakkel a panagbalbaliw. Kinunana: “Bayat ti maysa a serioso a pannakisarita kaniak dagiti panglakayen, inadawda ti maysa a pagarigan iti Biblia maipapan iti nabaknang nga agtutubo a mayat nga agbiag nga agnanayon ngem dina kayat nga isakripisio dagiti material a sanikuana. Kalpasanna, sitataktika a dinamagda no agaplikar kaniak dayta a pagarigan. Dayta ti nangtulong kaniak a mangtarus no ania ti masapul a balbaliwak!”​—Prov. 11:28; Mar. 10:17-22.

Sipupudno a sinukimat ni Jarosław ti kasasaadna ken inkeddengna nga isardeng ti pannakiramanna iti dakkel a negosio. Iti uneg ti dua a tawen, napasublida a sangapamiliaan ti nasayaat a kasasaadda iti naespirituan. Agserserbi itan kadagiti kapammatianna kas maysa a panglakayen. Kuna ni Jarosław: “No maigamer dagiti kakabsat iti negosio nga uray la mabaybay-andan ti espiritualidadda, usarek ti kapadasak a mangipakita a kinamaag ti makisosio kadagiti di manamati. Narigat a pagkedkedan dagiti makaallukoy a tukon ken liklikan ti panagkusit.”​—2 Cor. 6:14.

Nakasursuro met ni Marek manipud iti nasaem a kapadasanna. Ti nasayaat a trabahona iti sabali a pagilian ket nakatulong iti pinansial a kasapulan ti pamiliana ngem naapektaran ti relasionna iti Dios ken iti pamiliana. Idi agangay, binalbaliwanna dagiti prioridadna. “Iti naglabas a tawtawen, umasping ti kasasaadko ken Baruc a ‘nagsapul kadagiti naindaklan a bambanag.’ Kamaudiananna, impeksak ti riknak ken Jehova nga imbagak dagiti pakadanagak, ket ita, mariknak a nagsublin ti dati a regtak iti naespirituan.” (Jer. 45:1-5) Ikagkagumaan itan ni Marek a ragpaten dagiti “nasayaat nga aramid” a kualipikasion ti maysa a manangaywan iti kongregasion.​—1 Tim. 3:1.

Kastoy ti pakdaar ni Marek kadagiti agplamplano nga agabrod tapno maaddaan iti nasayaat a trabaho: “No addaka iti sabali a pagilian, naglakaka laeng a matnag iti silo daytoy dakes a lubong. Gapu ta dimo kabesado ti lenguahe sadiay, marigatanka a makisarita. Agpayso nga adda kuartam nga agawid, ngem madangran met ti espiritualidadmo ket mabalin a mabayag a mapasayaatmo dayta.”

No agbalintayo a balanse iti sekular a trabaho ken iti obligasiontayo kadagiti kakabsattayo, maay-ayotayo ni Jehova. Ken makaipaaytayo iti ulidan a mabalin a mangtignay iti sabsabali a mangaramid iti nainsiriban a desision. Dagidiay madagdagsenan kasapulanda ti tulong, pannakipagrikna, ken ti nasayaat nga ulidan dagiti kakabsatda. Dagiti panglakayen iti kongregasion ken dadduma pay a nataengan iti naespirituan matulonganda dagiti kapammatianda nga agtalinaed a natimbeng tapno saanda a malapunos kadagiti pakaringgoran iti biag.​—Heb. 13:7.

Wen, ditay koma pulos baybay-an dagiti kapammatiantayo babaen ti pannakaigamertayo iti sekular a trabaho. (Fil. 1:10) Imbes ketdi, agbalintayo koma a “nabaknang iti Dios” babaen ti panangyun-unatayo kadagiti interes ti Pagarian.​—Luc. 12:21.

[Footnote]

[Dagiti Ladawan iti panid 21]

Ti kadi sekular a trabahom ti manglapped kenka a makigimong?

[Dagiti Ladawan iti panid 23]

Ipatpategmo kadi dagiti gundawaymo a mangtulong kadagiti kapammatiam?