Mu si ke Mwa Siya Balumeli ka Mina

BO Jarosław ni bakubona, bo Beata, * ba kandeka kuli: “Ka lilimo ze lishumi ne lu yauluzwi ki lipisinisi mi ne lu onyokile. Nihaike kuli ne lu huliselizwe mwa niti, ne se lu zwile hahulu ku Jehova mi ne lu ikutwile kuli ne lu si na maata a ku kutela ku yena.”

Muzwale yo muñwi ya bizwa Marek, u bulela kuli: “Bakeñisa ku cinca-cinca kwa mupilelo ni lipuso mwa naha ya Poland, ne ni latehelwanga ki mubeleko. Ne ni zwafile. Ne ni sabanga ku kalisa kampani ya ka kakuli ne ni si na buikoneli bwa ku eza pisinisi. Kono hasamulaho ne ni likile ku kalisa kampani, mi ne ni nahana kuli ne i ka ni tusa ku babalela hande lubasi lwa ka ni sa kuteli mwamulaho mwa tumelo. Nako ha ne i nze i ya na lemuha kuli ne ni ezize mafosisa.”

Bupilo bu tulile mwa lifasi le, mi palo ya batu ba ba si na mubeleko i sweli ya ekezeha. Kabakaleo, batu ba bañwi ba zwafanga mi ba ezanga liketo ze maswe. Mizwale ba bañata ba belekanga hape hasamulaho wa nako ya mubeleko, ba bañwi ba banga ni mibeleko ye mi beli, kamba mane ku kalisa lipisinisi niha ba sa zibi mwa ku li zamaiseza. Ba nga kuli mali e ba ka fumana mwa ku eza cwalo a ka tusa lubasi lwa bona ni kuli ha ba na ku fokola mwa bulikani bwa bona  ni Jehova. Nihakulicwalo, ku cinca kwa miinelo ni ku cinca-cinca kwa za mali ku kona lyanganisa milelo ye minde ya mutu. Mi kabakaleo ba bañwi ba wezi mwa katwa ka ku lata hahulu sifumu mi si ba palelisizwe ku sebeleza Jehova hande.—Muek. 9:11, 12.

Mizwale ni likaizeli ba bañwi ba ndongwami hahulu za lifasi kuli mane ba tuhezi ku ezanga tuto ya ka butu, ku fumanehanga kwa mikopano, kamba ku yanga mwa sebelezo ya mwa simu. Ku tuhela lika zeo ku tahisa kuli ba fokole mwa bulapeli bwa bona ni ku sinyehelwa ki bulikani bwa bona ni Jehova. Hape ba kona ku tuhela ku swalisana ni ‘banabahabo bona ba balumeli.’ (Magal. 6:10) Ba bañwi ba tuhelanga ku swalisana ni mizwale ba bona hanyinyani-hanyinyani. Mu nahanisise hahulu taba yeo.

Lu Swanela ku Tusa Balumeli ka Luna

Ka ku ba mizwale ni likaizeli lu na ni linzila ze ñata ze lu kona ku bonisana ka zona lilato. (Maro. 13:8) Mwendi mu lemuhile kuli mwa puteho ya mina ku na ni ‘babotana ba ba itilelela’ kuli ba tusiwe. (Jobo 29:12) Ba bañwi ha ba na lico. Muapositola Joani naa lu hupulisize ze lu swanela ku eza. “Mutu ha fumile tutu ya lifasi, mi a bona mwanahabo a tokwa se siñwi, mi a mu kwalela pilu ya hae, fo, lilato la Mulimu li inzi cwañi ku yena?”—1 Joa. 3:17.

Mwendi se mu tusize batu ba ba tokwile. Kono ku iyakatwa banabahabo luna mwa tumelo haki ku ba fa feela lituso za kwa mubili. Ba bañwi ba kona ku itilelela kuli ba tusiwe kabakala kuli ba ikutwa buinosi kamba ku zwafa. Mwendi ba ikutwa kuli ha ba swaneli ku sebeleza Jehova, ba katazwa ki mapongo, kamba ba shwezwi ki mutu ye ne ba lata hahulu. Ye ñwi ya linzila ze lu kona ku ba susueza ka zona ki ka ku ba teeleza ni ku ikambota ni bona, mi ha lu eza cwalo ba ka yoyelwa mi lu ka ba tusa ku tiisa bulikani bwa bona ni Jehova. (1 Mates. 5:14) Ku eza cwalo hañata ku lu tusanga ku latana hahulu ni mizwale ba luna.

Maeluda mwa puteho ki bona sihulu ba ba swanela ku teelezanga ba bañwi ka ku bonisa kutwelo-butuku, ku ba bonisa kuli ba utwisisa muinelo o ba li ku ona, ni ku ba fa kelezo ye tomile fa Mañolo ka mukwa o lilato. (Lik. 20:28) Ka ku eza cwalo baokameli bao ba likanyisa muapositola Paulusi ya naa ‘shemubile’ mizwale ni likaizeli ba hae.—1 Mates. 2:7, 8.

Kono haiba Mukreste a keluha mwa mutapi, kana u ka kona ku peta buikalabelo bwa na ni bona bwa ku tusa balumeli ka yena? Nihaiba bona baokameli ba kona ku kena mwa muliko wa ku ndongwama bufumu. Ki nto mañi ye kona ku ezahala haiba Mukreste a wela mwa muliko o cwalo?

Ku Imezwa ki Lipilaelo za Mwa Bupilo

Sina mo se lu bonezi, ku beleka ka taata hahulu kuli lu fumanele lubasi lwa luna ze lu tokwa hañata ku lu tisezanga lipilaelo mi ku kona ku  foufaza mubonelo wa luna wa likuka za Sikreste. (Mat. 13:22) Bo Marek ba ba bulezwi kwa makalelo a taba ye, ba talusa kuli: “Pisinisi ya ka ha ne i wile, ne ni iketezi ku bata mubeleko o fumanisa mali a mañata mwa naha i sili. Ne ni yo belekelanga kwateñi ka likweli ze talu inge ni kutelanga kwahae ka nakonyana feela. Taba yeo ne i utwisanga bumaswe musalaa ka ya naa si mulumeli.”

Bo ne si bona feela butata bo ne ba talimani ni bona. Bo Marek ba zwelapili, ba li: “Ne ni belekelanga mo ku cisa ka lihola ze ñata, mi ne ni sebelisananga ni batu ba mikwa ye maswe ili be ne ba likanga ku eza ba bañwi maswe. Ne ba ezanga inge likebenga. Ne ni ikutwanga ku swaba ni ku hatelelwa. Bakeñisa kuli ne ni si na nihaiba nako ya ku ipabalela na muñi, na kala ku kakanya ka za haiba ne ni kona ku sebeleza ba bañwi.”

Ze ne ezahalezi bo Marek bakeñisa keto ya bona li swanela ku lu susueza ku nahanisisanga lu si ka eza kale keto. Niha ku bonahala kuli ku yo belekela kwa naha i sili ku kona ku tatulula butata bwa za mali, kana ha ku na ku tahisa butata bo buñwi? Ka mutala, lubasi lwa luna lu kona ku ikutwa cwañi mi ki nto mañi ye kona ku ezahala kwa bulikani bwa bona ni Jehova? Kana ku eza cwalo ku ka lu tuhelisa ku swalisana ni puteho? Kana ha ku na ku lu palelwisa ku ba ni tohonolo ya ku sebeleza balumeli ka luna?—1 Tim. 3:2-5.

Kono sina ha mu ziba, haki ku belekela feela kwande a naha ko ku kona ku tahisa kuli mutu a patehiswe hahulu ki mubeleko. Ha mu nyakisise mutala wa bo Jarosław ni bo Beata. Bo Jarosław ba li: “Ne lu sa zibi kuli lu ka kena mwa butata. Lu mano nyalana lwa kwalula kantolo ka nama ya mufuta o muñwi mwa sibaka mo ne i zamaya hande pisinisi. Bakeñisa kuli kantolo kao ne ka lu fumanisa mali a mañata, lwa hulisa pisinisi ya luna. Kono ne lu na ni nako ye nyinyani, mi kamukwaocwalo ne lu sa yangi kwa mikopano ya Sikreste. Hamulaho wa nakonyana na tuhela ku ba mutangaa bukombwa ni ku sebeza sina paina. Bakeñisa kuli ne lu swala masheleñi, lwa kwalula sintolo se situna mi lwa swalisana ni mutu ya si mulumeli. Hamulaho feela wa nakonyana na kalisa ku yanga mwa linaha ze ñwi ku yo saina litumelelano za ku eza misebezi ye ne ocolisa pene. Ne ni fumanehanga fa ndu ka siwela, mi ne se lu sa utwani hande ni musalaa ka ni mwanaka wa musizana. Ne lu patehisizwe hahulu ki pisinisi ya luna mi lwa tuhela ku sebeleza Jehova. Bakeñisa kuli ne lu tuhezi ku kopana ne lu sa nahanangi ka za mizwale ni likaizeli ba luna.”

Lu kona ku itutañi kwa mutala wa batu bao? Mukreste u kona ku wela mwa muliko haiba a ba ni takazo ya ku pila bupilo bwa simbombo, mi u kona ku ba ni mukwa wa ku ezanga lika ka likesha, kamba mane u kona ku latehelwa ki “liapalo” za hae, ili lika ze mu zibahaza ku ba Mukreste. (Sin. 16:15) Ku eza cwalo ku kona ku lu kauhanya kwa mizwale be ne lu kona ku tusa.

Mu Itatube ka Pilu ye na ni Niti

Mu kana mwa li: ‘Nto yeo ha i koni ku ni ezahalela.’ Kono mañi ni mañi wa luna u swanela ku nyakisisa kuli ki lika mañi luli za tokwa ku ba ni zona mwa bupilo. Muapositola Paulusi naa ñozi kuli: “Ha lu si ka tisa se siñwi mwa lifasi, mi ha lu koni ku ya ni se siñwi ha lu li siya. Cwale ha lu na ni lico ni liapalo, lu kolwe ki zona.” (1 Tim. 6:7, 8) Kono mupilelo wa batu wa shutana mwa naha ni naha. Mupilelo o ngiwa ku ba wa sibotana mwa linaha ze onyokile u kona ku ngiwa ku ba wa simbombo mwa linaha ze ñwi ze ñata.

Ku si na taba ni mupilelo wa mwa sibaka se lu pila ku sona, ha lu nyakisiseñi manzwi a Paulusi, a li: “Ba ba lata ku fuma ba wela mwa miliko ni mwa malaba, ni mwa litakazo ze ñata ze sa utwahali, ze sinya, ze tibiseza batu mwa ku yo sinyeha ni ku latehelela.” (1 Tim. 6:9) Lilaba li teiwanga ka mukwa wa kuli mbuya i si ke ya li lemuha ilikuli i swasiwe ki lona. Lu kona ku eza cwañi kuli lu si ke lwa swasiwa ki ‘litakazo ze sinya’?

Ku ziba lika za butokwa kwa kona ku lu tusa ku ba ni nako ye ñata ya ku sebeleza Jehova, ni ku eza tuto ya ka butu. Ku banga ni tuto ye cwalo hamoho ni ku lapela ku kona ku tusa Mukreste kuli “a petahale mi a talifele luli” ku tusa ba bañwi.—2 Tim. 2:15; 3:17.

 Halaa lilimo li sikai, maeluda ba ba lilato ne ba ikatalize ku tiisa bo Jarosław ni ku ba susueza. Bo Jarosław ne ba susumelizwe ku eza licinceho ze tuna. Ba talusa kuli: “Ka nako ye ñwi maeluda ha ne ba tilo ikambota ni na, ne ba bulezi mutala wa mwa Mañolo wa mutangana ya naa fumile ili ya naa bata ku pila ku ya ku ile kono naa sa tabeli ku tuhela maluwo a hae. Mi ba ni buza ka maseme ka za haiba taba yeo ya ni ama. Nto yeo ne i ni tusize ku lemuha licinceho ze ne ni swanela ku eza.”—Liprov. 11:28; Mare. 10:17-22.

Bo Jarosław ne ba nyakisisize muinelo wa bona ka tokomelo mi ba tuhela ku eza lipisinisi ze tuna. Mwahalaa lilimo ze peli bo Jarosław ni lubasi lwa bona ba kalisa hape ku ba ni bulikani ni Jehova. Ka nako ya cwale se ba sebeleza mizwale ba bona sina maeluda. Bo Jarosław ba li: “Mizwale ha ba ikenya hahulu mwa lipisinisi kuli mane ba tuhela ku iseza pilu kwa bulapeli bwa bona ni Jehova, ni itusisanga ze ne ni ezahalezi kuli ni ba bonise kuli ki butoto ku lwala coko i liñwi ni ba ba sa lumeli. Haki nto ye bunolo ku hana miliko ni ku ambuka ku eza lika ka ku sa sepahala.”—2 Makor. 6:14.

Bo Marek ni bona ne ba itutile tuto hamulaho wa ku talimana ni butata. Nihaike kuli ku belekela kwande a naha ne ku ba fumanisa mali a mañata mi ne ba kona ku babalela hande lubasi lwa bona, bulikani bwa bona ni Mulimu ni mizwale ba bona ne bu kutezi mwamulaho. Hamulaho wa nako ba itekula. “Mwa lilimo ze ñata, ne ni li mwa muinelo o swana ni wa na bile ku ona Baruki wa kwaikale ya naa ‘ipatela linto ze tuna.’ Kwa mafelelezo, na bulelela Jehova ze kwa pilu ya ka kaufela, ili ku mu bulelela ka za lipilaelo za ka, mi ka nako ya cwale ni ikutwa kuli se ni eza hande mwa sebelezo ya ka ku yena.” (Jer. 45:1-5) Bo Marek cwale ba lika ka taata ku kwanisa ze tokwahala kuli ba eze “musebezi o munde” wa ku ba muokameli mwa puteho.—1 Tim. 3:1.

Bo Marek ba eleza batu ba ba singanyeka za ku yo bata mubeleko o ocolisa pene mwa naha i sili, ba li: “Ha mu li mwa naha i sili ku bunolo hahulu ku swasiwa mwa malaba a lifasi le, le li maswe. Ku sa ziba puo ye bulelwa kwa sibaka se mu ile ku sona ku kona ku mi palelwisa ku ikambota ni ba bañwi. Mu kona ku kutela kwahae mu nze mu na ni mali, kono hape inze mu fokozi hahulu kuli mane ku ka nga nako ye telele kuli mu tiye hape.”

Ku isa pilu kwa mubeleko wa luna ni ku bona teñi kuli lwa peta buikalabelo bwa luna bwa ku tusa mizwale ba luna, ku ka lu tusa ku tabisa Jehova. Mi lwa kona ku ezeza ba bañwi mutala o kona ku ba susumeza ku eza liketo ze nde. Ba ba imezwi ba tokwa ku tusiwa, ku ezwa ka mukekecima, ni ku tomelwa mutala o munde ki mizwale ni likaizeli ba bona. Maeluda mwa puteho ni ba bañwi ba ba hulile ba kona ku tusa balumeli ka bona kuli ba pete buikalabelo bwa bona ni ku tokomela kuli ba si ke ba komiwa ki lipilaelo za bupilo.—Maheb. 13:7.

Haike lu si ke lwa siya balumeli ka luna ka ku patehiswa hahulu ki mubeleko wa luna. (Mafil. 1:10) Kono lu ‘fumele ku Mulimu,’ ka ku tokomela pili za sebelezo ya luna ku Jehova.—Luka 12:21.

[Litaluso za kwatasi]

[Maswaniso a fa likepe 21]

Kana mubeleko wa mina wa mi palelwisa ku fumanehanga kwa mikopano?

[Maswaniso a fa likepe 23]

Kana mwa itebuha kolo ye mu na ni yona ya ku tusa mizwale ni likaizeli ba mina ba mwa puteho?