Kulekedi bena Kristo nebe nansha kakese

JAROSŁAW ne mukajende Beata * badi bamba ne: “Munkatshi mua bidimu dikumi, tuvua baditue anu mu dikeba dia bubanji ne katuvua tukengela tshintu. Nansha mutuvua bakolesha mu bulelela, tuakasemena kule ne Yehowa ne tuvua tudimona bu ne: katuvua kabidi ne bukole bua kupingana kudiye to.”

Muanetu mukuabu diende Marek udi uvuluka ne: “Bu muvua malu a mu nsombelu ne a tshididi mashintuluke mu Pologne, midimu yanyi ivua anu inyanguka. Bivua binyingalaja bikole. Bivua bingenza buôwa bua meme kudikanguila wanyi kumpanyi bualu tshivua ne tshipedi tshia kuenda mushinga to. Kadi, ngakatuadija anu kudienzela mudimu ngela meji ne: bivua mua kungambuluisha bua kukumbajila ba mu dîku dianyi majinga abu a ku mubidi tshiyi nyanga malanda anyi ne Yehowa to. Pakapita matuku, ngakalua kumona ne: mvua mudishime.”

Mu bulongolodi emu mudi bintu bienda anu bibanda mishinga ne bulofua buenda buvula, bantu ba bungi lelu mbapange tshia kuenza ne batu bafika ku diangata mapangadika mabi. Bena Kristo ba bungi mbangate dipangadika dia kuenza mêba a pa mutu ku mudimu, kusakidila mudimu mukuabu ku utubu benza pa tshibidilu anyi kutuadija kudienzela yabu midimu nansha bobu kabayi bapiluke mu diyenza. Badi bela meji ne:  midimu ya pa mutu eyi neyibambuluishe bua kukumbaja majinga a bena mu mêku abu ne kayakunyanga malanda abu ne Yehowa to. Muntu udi mua kuikala musue kulama malanda ende ne Yehowa nansha padiye wenza midimu ya nunku, kadi dinyanguka dia malu a mpetu didi mua kumunyangilawu. Bamue mbafike ku dinyanga mudimu udibu benzela Yehowa bualu mbaditue mu dikeba dia biuma.​—Muam. 9:11, 12.

Bamue bena Kristo mbadine ne kasuki mu dikeba bintu bia ku mubidi bapangila too ne dîba dia kudilongela Bible, kubuela mu bisangilu nansha kuenza mudimu wa buambi. Bushuwa, kulengulula malu aa kudi kubapangisha bua kuenzela Yehowa mudimu ne kudi kunyanga malanda abu nende. Badi kabidi mua kunyanga malanda abu ne ‘bena dîku dia bena kuitabuja.’ (Gal. 6:10) Ku kakese ku kakese, bakuabu badi mua kumbuka mu bulongolodi. Tukonkononayi bimpe bualu ebu.

Malu atudi ne bua kuenzela bena Kristo netu

Bu mutudi bena Kristo, tudi ne bua kunangangana umue ne mukuabu. (Lomo 13:8) Mu tshisumbu tshienu mudi mua kuikala ‘bapele badi bakeba dikuatshisha.’ (Yobo 29:12) Bamue badi mua kuikala bapangile bintu bia ku mubidi bidi mua kubambuluisha. Mupostolo Yone wakatuvuluija mushinga wa kuambuluisha bakuabu wamba ne: ‘Bikala muntu ne bintu bia pa buloba, ne yeye udi utangila muanabu ubikengela, ne yeye udi ukanda luse luende kudiye, mmunyi mudi dinanga dia Nzambi mua kuikala munda muende?’​—1 Yone 3:17.

Imue misangu ukadi muambuluishe bantu badi bakengela bintu. Bushuwa katuena anu ne dijinga dia kuambuluisha bantu ne bintu bia ku mubidi mu bulongolodi bua Yehowa to. Bamue badi mua kuikala bakeba diambuluisha bualu badi nkayabu anyi mbatekeshibue mu maboko. Badi mua kudimona kabayi bakumbane bua kuenzela Yehowa mudimu peshi badi mua kuikala ne disama dikole anyi mbafuishe muntu uvuabu banange. Mushindu muimpe utudi mua kubakankamija mpatudi tubateleja ne tuyukila nabu, tuetu tuenza nunku tudi tubambuluisha bua kulama malanda abu ne Yehowa. (1 Tes. 5:14) Kuenza nunku kudi kukolesha dinanga ditudi banange bena Kristo netu.

Bakulu badi nangananga ne bua kuikala bateleja bakuabu ne luse, baditeka pa muaba wabu ne bafila mibelu milenga ya mu Bible. (Bien. 20:28) Bobu benza nunku nebaleje mudibu bidikija mupostolo Paulo uvua ‘mutambe kunanga’ bena Kristo nende.​—1 Tes. 2:7, 8.

Kadi muena Kristo yeye mupatuke mu tshisumbu, mmunyi mudiye mua kukumbajila bena Kristo nende malu atudi tufuma ku ditela aa? Nansha bakulu pabu badi mua kukuluka mu buteyi bua dikeba dia bintu bia ku mubidi. Tshidi mua kuenzekela muena Kristo udi mukuluke mu buteyi bua nunku ntshinyi?

Tunyinganyinga tua mu nsombelu tudi mua kututekesha

Anu mutukavua bamone, kutamba kuditatshisha bua kukumbajila bena mu mêku majinga  abu a ku mubidi kudi mua kutukebela tunyinganyinga ne kutupangisha mua kuenzela Nzambi mudimu bimpe. (Mat. 13:22) Marek utukadi batele kulu eku udi wamba ne: “Pavua midimu yanyi ya bianza kayitshiyi yenda bimpe, ngakangata dipangadika dia kuya kukeba mudimu wa makuta a bungi mu matunga a ku babende. Mvua muye bua kuenza anu ngondo isatu, kadi pangakafika ngakasakidila mikuabu isatu ne mvua mpingana kumbelu mu mpukapuka. Bivua bitatshisha mukajanyi uvua kayi ntemu bikole.”

Ki nganu nsombelu wa mu dîku diende uvua munyanguke to. Marek udi wamba kabidi ne: “Mvua ngenza mudimu mêba a bungi muaba mubi uvua bantu bavua bapange bukalanga benzeja bakuabu midimu ku bukole. Bavua benza malu bu bena tshikisu. Ngakadimona mutekeshibue tshiyi ne tshikuabu tshia kuenza. Tshivua nansha ne dîba dia kuenza malu a mushinga avua mua kungambuluisha to, meme kutuadija kudimona bu ne: tshivua mukumbane bua kuambuluisha bakuabu to.”

Malu mabi avua mafikile Marek bua dipangadika divuaye muangate adi ne bua kutuelesha petu meji. Nansha mudibi bimueneka ne: kuya ku matunga a ku babende kudi mua kuambuluisha muntu bua kupeta makuta, kadi kabienaku mua kumukebela mikuabu ntatu anyi? Tshilejilu, ntshinyi tshidi mua kufikila nsombelu wa bena mu dîku dietu ne malanda abu ne Yehowa? Diumuka dietu edi kadiakutukosolola ne tshisumbu anyi? Kadiakutupangishaku diakalenga dietu dia kuambuluisha bena Kristo netu anyi?​—1 Tim. 3:2-5.

Nunku anu bu muudi mua kuikala mumanye, bua kuditua ne kasuki mu midimu ya bianza kabiena bikengala anu ne: muntu aye ku matunga a ku babende to. Tuangate tshilejilu tshia Jarosław ne Beata. Jarosław udi wamba ne: “Patutshivua tubuelelaku mu dibaka, tuvua tupangisha mampa muaba uvuabu basumba bikole. Bivua bimueneka bu ne: kakuvua bualu to. Bu mutuvua tupeta makuta a bungi, tuakangata dipangadika dia kuvudija bintu bituvua tupana. Kadi tuvua anu ne dîba dikese, katuvua kabidi tubuela mu bisangilu to. Matuku makese pashishe, ngakalekela bumpanda-njila ne mudimu wa busadidi. Mutuvua ne disanka dia bungi dia muvua bintu bienda anu bivula, tuakakangula magazen manene ne tuetu kutuadija kueleshangana diboko ne muntu uvua kayi ntemu. Meme kutuadija kuenza ngendu ya malu a mishinga ku matunga menyi ivua impetesha makuta a bungi. Tshivua ntamba kusomba kabidi kumbelu to, ne malanda anyi ne mukajanyi ne muananyi wa bakaji kaatshivua kabidi makole to. Ndekelu wa bionso bu mutuvua anu baditue mu malu a mishinga, tuakatuadija kulekela kuenzela Yehowa mudimu. Bu mutukavua balekele kubuela mu bisangilu, katutshivua kabidi tuditatshisha bua bena Kristo netu to.”

Tshilejilu etshi tshidi mua kutulongesha tshinyi? Dijinga dia kuikala ne bintu bia bungi ne nsombelu muimpe didi mua kukuata muena Kristo mu buteyi ne kumufikisha ku dijimija ‘bivualu biende’ anyi buena Kristo buende. (Buak. 16:15) Tudi mua kufika ku dikosa malanda ne bena Kristo batuvua tuambuluisha kumpala.

Konkonona nsombelu webe ne muoyo mujima

Tudi mua kuela meji ne: ‘Bualu bua mushindu eu kabuakumfikila to.’ Bushuwa, yonso wa kutudi udi ne bua kukonkonona ne muoyo mujima bintu bidiye nabi dijinga menemene mu nsombelu. Paulo wakafunda ne: ‘Katuakalua ne tshintu pa buloba ebu, ne katuena bamanye mua kumukapu ne tshintu, kadi patuikala ne biakudia ne bia kuluata, netuikale ne disanka bua bintu ebi.’ (1 Tim. 6:7, 8) Bushuwa, nsombelu wa bantu kena mushindu umue mu matunga onso to. Bintu bidibu kabayi bamona ne mushinga mu matunga a bena kantu ku bianza, badi mua kubimona ne mushinga wa bungi mu matunga makuabu.

Nansha muaba utudi basombele muikale nsombelu kayi, tutumikile mubelu wa Paulo eu: ‘Bobu badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyi mene idi inyisha bantu mu dibashipesha ne mu dibutuka.’ (1 Tim. 6:9) Pa tshibidilu batu basokoka buteyi, bua nyama kabumonu to. Batu benza nunku bua kukuata nyama kayi mumanye. Ntshinyi tshitudi mua kuenza bua kubenga kukuluka mu buteyi bua ‘nkuka mibi?’

 Kudifundila malu a mushinga kudi mua kutusaka bua kukeba dîba dia bungi dia kuenzela Yehowa mudimu ne kudilongela. Muntu yeye udibadila ne usambila, bidi bimuambuluisha bua kuikala ‘mukumbajibue, mulongolola tshishiki’ bua kuambuluisha bakuabu.​—2 Tim. 2:15; 3:17.

Pakapita bidimu ndambu, bakulu bakadienzeja ne dinanga bua kuambuluisha Jarosław ne kumukankamija. Biakamusaka bua kushintulula amue malu. Udi wamba ne: “Patuvua tuyukila nabu umue musangu, bakantelela tshilejilu tshia mu Bible tshia nsongalume mubanji uvua musue kupeta muoyo wa tshiendelele kadi kayi musue kulekela bubanji buvuaye nabu. Pashishe bakandeja ne budimu buonso muvua tshilejilu etshi tshipetangana ne nsombelu wanyi. Biakangambuluisha bua meme kumanya tshia kuenza.”​—Nsu. 11:28; Mâko 10:17-22.

Jarosław wakakonkonona bimpe nsombelu wende ne kuangata dipangadika dia kukepesha malu ende a bungenda mushinga. Mu bidimu bibidi, yeye ne dîku diende bakakolesha tshiakabidi malanda abu ne Yehowa. Udi mpindieu mukulu ne wambuluisha bena Kristo nende. Udi wamba ne: “Pandi mmona bena Kristo baditua mu malu a mishinga bafika too ne ku dilengulula malanda abu ne Yehowa, ntu mbapesha tshilejilu tshianyi bua kubaleja mudibi bibi bua kubuelakana ne bantu badi kabayi bena Kristo. Ki mbipepele bua kubenga midimu idi ipetesha makuta a bungi ne kuepuka bikadilu bibi to.”​—2 Kol. 6:14.

Marek pende wakapeta dilongesha bua tshivuaye muenze. Nansha muvua mudimu uvuaye wenza ku matunga a ku babende mupeteshe dîku diende makuta a bungi, kadi malanda ende ne Nzambi ne bena Kristo nende akanyanguka. Wakakonkonona tshiakabidi midimu yende. Udi wamba ne: “Munkatshi mua bidimu, nsombelu wanyi wakafuanangana ne wa Baluka uvua ‘udikebela malu manene.’ Ndekelu wa bionso, ngakambila Yehowa malu onso amvua nawu mu mutshima wanyi, mpindieu ndi mumone ne: ndi mupetulule malanda anyi nende.” (Yel. 45:1-5) Marek udi mpindieu mukulu ne udi wenza “mudimu muimpe” mu tshisumbu.​—1 Tim. 3:1.

Marek udi ubela bantu bonso badi basue kuenza ngendu ku matunga a kule bua kukeba mudimu wa makuta a bungi wamba ne: “Padi muntu ku matunga a kule, mbipepele bua yeye kukuluka mu mateyi a mu bulongolodi ebu. Muntu yeye kayi mumanye muakulu wa muaba udiye uya, bidi mua kumupangisha bua kuyukila ne bakuabu. Udi mua kufuma ku luendu ne makuta, kadi muikale kabidi ne ntatu ya mu nyuma idi ikengela diambuluisha mu matuku a bungi.”

Tuetu bikale ne lungenyi luimpe bua mudimu wa bianza ne mudimu wa kutabalela bena Kristo netu, nebituambuluishe bua kusankisha Yehowa. Tudi mua kufila tshilejilu tshimpe tshidi mua kusaka bakuabu bua kuangata mapangadika mimpe. Bantu badi batekete badi dijinga ne dikuatshisha, dibenzela malu ne luse ne kubapesha bilejilu bimpe bia bena Kristo nabu. Bakulu ne bena Kristo badi bashindame mu ditabuja badi mua kuambuluisha bena Kristo nabu bua kuikala ne lungenyi luimpe ne kuepuka tunyinganyinga tua mu nsombelu.​—Eb. 13:7.

Nunku, katudinyi ne kasuki mu midimu yetu ya bianza, itufikisha ku dilekela bena Kristo netu to. (Filip. 1:10) Kadi tuteke Bukalenge bua Nzambi pa muaba wa kumpala mu nsombelu wetu bua tuikale ‘babanji ku mêsu kua Nzambi.’​—Luka 12:21.

[Mêyi adi kuinshi]

[Bimfuanyi mu dibeji 21]

Mudimu webe wa bianza udiku ukupangisha bua kubuela mu bisangilu anyi?

[Bimfuanyi mu dibeji 23]

Utuku wangata diambuluisha bena Kristo nebe ne mushinga anyi?