Jab Kõjekdo̦o̦n Ro Jeõm̦ im Jatõm̦

JAROSLAW im lio pãlen etan Beata, rej ba: “Ium̦win joñoul iiõ ko, kõmro ar reel im mad kõn peejnej ko an lal̦, im kõmro ar lukkuun m̦weiie. Meñe kõmro ar dik im rũttol̦o̦k ilo m̦ool eo ak kõmro ar jebwãbwe jãn Jeova, im kõmro ar l̦õmn̦ak bwe ejjel̦o̦k am maroñ ñan bar jepl̦aak.” *

Bar juon jeid im jatid m̦aan etan Marek, ear ba: “Kõn oktak ko rej wal̦o̦k ilo kien eo an Poland im an penl̦o̦k mour ilo aelõñ in, ekkã wõt aõ kar luuji jerbal ko aõ. Iar lukkuun inepata im jaje ta eo in kõm̦m̦ane. Iar kõn̦aan kajutak juon aõ peejnej ak iar mijak in kõm̦m̦ane kõnke ear ejjel̦o̦k aõ imminene. Bõtab, iar wõnm̦aanl̦o̦k wõt im kõm̦m̦ane men in kõnke iar l̦õmn̦ak bwe enaaj jipañ ñan kabwe aikuj ko an baam̦le eo aõ im ejjel̦o̦k aõ kar l̦õmn̦ak bwe men in enaaj jelõt kõtaan eo aõ ippãn Jeova. Ejjabto tokãlik, iar kile bwe ear bõd l̦õmn̦ak in aõ.”

Kõn an penl̦o̦k mour im elõñl̦o̦k armej ro rej luuji jerbal ko aer, jet rej inepata im jaje ta eo ren kõm̦m̦ane, im kõn men in rej kõm̦m̦ani pepe ko rejjab jim̦we. Elõñ ro jeid im jatid rej pepe ñan kalapl̦o̦k awa in aer jerbal, kalõñl̦o̦k jerbal ko aer, ak kõm̦m̦an aer peejnej meñe ejjel̦o̦k  aer imminene. Rej l̦õmn̦ak bwe aer kõm̦m̦ane wãween kein enaaj jipañ baam̦le eo aer im eban jelõt kõtaan eo aer ippãn Jeova. Bõtab kõn an penl̦o̦k mour im kõn an men ko wal̦o̦k ilo jidimkij pepe ko aer meñe rem̦m̦an remaroñ jab lo tõprak. Tokjãn men in, jet rar l̦orak kõn aer kũbbon̦ im rar kaarmejjeteik Jeova bwe ren kalõñl̦o̦k m̦weiuk ko ippãer.—Ekk. 9:11, 12.

Joñan an kar jet jeid im jatid lukkuun poub im mad ñan kalõñl̦o̦k m̦weiuk ko ippãer, ear ejjel̦o̦k aer iien ñan katak ippãer make, kwelo̦k, im kwal̦o̦k naan. Aer jerwaan in kõm̦m̦ane men kein ear jelõt jerbal eo aer ñan Jeova im kõtaan eo aer ippãn. Emaroñ bareinwõt kõm̦m̦an aer kõjekdo̦o̦n ro ‘nukuer ilo tõmak.’ (Gal. 6:10) Jiddik kõn jiddik, jet rar ilo̦k jãn doulul eo an Jeova. Jen etale juon men eaorõk.

Eddo eo Ad ñan Jipañ Ro Jeid im Jatid

Kõnke jej jimjãn jimjãtin, elõñ wãween ko jemaroñ kwal̦o̦k ad yokwe doon. (Rom 13:8) Bõlen ilo congregation eo am̦, kwõj lo an jet eñtaan im “eoor” kõn jipañ. (Job 29:12, UBS) Bõlen jet ejjab bwe aer aikuj. Rijjelõk Jon ear kakememej kõj kõn men in. Ear ba: “Jabdewõt eo, el̦aññe ewõr m̦weiuk ko an lal̦ ippãn, im ej lo an jein im jaten aikuj, im ej kili buruon jãn e, ekõjkan yokwe Anij en pãd ilo e?”—1 Jon 3:17.

Bõlen ewõr juon ear pãd ilo wãween in im kwaar jipañ e. Bõtab, ebar wõr wãween ko jet im jemaroñ jipañ er. Jet remaroñ aikuj jipañ kõnke rej ebbeer ak rej make iaaer. Remaroñ eñtaan kõn juon nañinmej elap, l̦õmn̦ak bwe ejej tokjeir, ak bũrom̦õj kõnke juon eo ejitõnbõro ippãer ear mej. Juon wãween jemaroñ rõjañ er ej ikijen ad kõnono ippãer im lukkuun roñjake ñe rej kõnnaan, ilo wãween in jej jipañ kaenõm̦m̦an er im kakajoor er. (1 Tes. 5:14) Ekkã an men in kakajoor kõtaan eo ad ippãn ro jeid im jatid.

El̦aptata elder ro ilo congregation eo rej lukkuun roñjake ro jeir im jatiir, kwal̦o̦k bwe rej mel̦el̦e kõn eñjake ko aer, im lel̦o̦k ñan er naan in kakapilõk ko jãn Baibõl̦. (Jerb. 20:28) Ilo an elder ro kõm̦m̦ane men in, rej l̦oor joñak eo an rijjelõk Paul, eo ear “yokwe” ro jein im jatin ilo tõmak.—1 Tes. 2:7, 8.

Bõtab, el̦aññe juon Kũrjin ear ilo̦k jãn congregation eo, innem enaaj ewi wãween an kajejjete eddo eo an ñan jipañ ro jein im jatin? Elder ro ilo congregation eo remaroñ bareinwõt l̦orak ilo aujiid eo kõn arõk m̦weiuk ko. Ak ta el̦aññe juon Kũrjin enaaj bo ilo aujiid in?

Inepata kõn Apañ ko an Mour

Ñe jej lukkuun poub im mad ilo jerbal ko ad kõn ad kõn̦aan kabwe aikuj ko an baam̦le eo ad, ekkã an kõm̦m̦an ad inepata im men in emaroñ kõm̦m̦an bwe jen jab lukkuun l̦õmn̦ak kõn men ko raorõk an Jeova. (Matu 13:22) Marek, eo kar kwal̦o̦k kake ilo jinoin katak in, ej ba: “Ke ear  kun peejnej eo aõ, iar pepe in etal ñan bar juon aelõñ im pukot juon jerbal elap on̦ãn. Iar jol̦o̦k jilu allõñ ilo jikin eo ij jerbal ie im jepl̦aak ñan ippãn baam̦le eo aõ. Bõtab iar pãd ippãer ium̦win jidik wõt iien. Im ekar ãindein aõ kõm̦m̦ane men in ilo aolepen iiõ ko m̦aanl̦o̦k. Lio ippa, eo ejjab pãd ilo m̦ool eo ear jab m̦õn̦õn̦õ kõn men in.”

Bõtab, jerbal eo an ear jab jelõt wõt baam̦le eo an. Marek ej wõnm̦aanl̦o̦k im ba: “Iar jab baj jerbal ium̦win elõñ awa ko im jerbal ium̦win det jilõñlõñ, ak iar bareinwõt pãd ibwiljin armej ro ejjel̦o̦k aer kautiej im enana aer kõm̦m̦an ñan ro jet. Kõn men in, iar lukkuun inepata im bũrom̦õj im ear ãinwõt ñe armej ro rar kejebwãbweik mour eo aõ. Im kõnke elap aõ poub, ejjel̦o̦k aõ iien ñan kõm̦m̦ani m̦akũtkũt ko rej kakajoorl̦o̦k kõtaan eo aõ ippãn Jeova. Kõn men in, iar jino ebbeer im l̦õmn̦ak bwe ijjab maroñ jipañ ro jet.”

Wãween ko rekabũrom̦õjm̦õj Marek ear iioni kõn pepe eo ear kõm̦m̦ane en kar kõm̦m̦akũt kõj ñan ad bõjrak im kõl̦mãnl̦o̦kjen̦. Meñe jerbal ilo bar juon aelõñ emaroñ jol̦o̦k apañ eo ad kõn jããn, ak emaroñ bar kõm̦m̦an bwe en wõr apañ ko jet. Ñan waanjoñak, ta eo enaaj wal̦o̦k ñan kõtaan eo an baam̦le eo ad ippãn Jeova? Ta eo enaaj wal̦o̦k ñan er ke jejako jãn er, renaaj ke bũrom̦õj? Men in enaaj ke ko̦kkure kõtaan eo ad ippãn ro jeid im jatid ilo congregation eo? Im enaaj ke kõm̦m̦an ad kõjekdo̦o̦n eddo eo ad ñan jipañ ro jeid im jatid?—1 Tim. 3:2-5.

Bõtab, juon armej emaroñ bar poub im m̦ad ilo jerbal eo an meñe ejjab etal im jerbal ilo bar juon aelõñ. L̦õmn̦ak m̦õk kõn Jarosław im Beata. Jarosław ear ba, “Ãlikin wõt amro kar m̦are, kõmro ar kepel̦l̦o̦k juon amro peejnej jiddikdik. Kõmro ar kõmat im wiakake hot dog ko. Im men in kõmro ar kõm̦m̦ane ear bwe ñan kabwe aikuj ko amro. Bõtab ke ear lõñl̦o̦k amro jããn, kõmro ar kõn̦aan kalapl̦o̦k peejnej eo amro. Kõn men in, ear dik amro iien im ear kõm̦m̦an amro jako jãn kwelo̦k ko. Ejjabto, iar make bõjrak jãn aõ regular pioneer im jerbal in ministerial servant. Joñan amro kar m̦õn̦õn̦õ kõn an lõñl̦o̦k amro jããn, kõmro ar kajutak juon m̦õn wia ekilep, im kõmro ar kõm̦m̦an bujen ippãn ro jet me rejjab pãd ilo m̦ool eo ñan jerbal ippãer. Tokãlik, iar itoitak ñan aelõñ ko jet im jaini jet peba in kon̦ me remaroñ kõm̦m̦an bwe en wõr aõ milien tal̦a. Ear jeja aõ pãd ippãn baam̦le eo aõ im kõn men in kõtaan eo aõ ippãn lio pãleõ im leddik eo nejũ ear jorrããn. Im kõn am lukkuun mad kõn peejnej eo am, kõmar m̦õjn̦o̦l̦o̦k im ear jorrããn kõtaan eo am ippãn Jeova. Kõnke ear jako am kobal̦o̦k ippãn congregation eo, kõmar jab l̦õmn̦ak kake ro jeim im jatim ñan jiddik.”

Ta eo jemaroñ katak jãn men in? Kõn̦aan eo ñan kõm̦m̦an bwe en em̦m̦an kõjeãed im lõñ men ko m̦weied emaroñ juon aujiid ñan juon Kũrjin. Kõnke emaroñ kõm̦m̦an an lõke e make im bõjrak jãn an kwal̦o̦k naan. (Rev. 16:15) Men in emaroñ kõm̦m̦an ad kõjekdo̦o̦n ro jeid im jatid, ro im jemaroñ kar jipañ er.

Kwõn Lukkuun Etale Yuk Make

Bõlen jemaroñ l̦õmn̦ak ippãd make, ‘Men in eban wal̦o̦k ñan eõ.’ Bõtab, kõj kajjojo jej aikuj l̦õmn̦ak kõn ewi joñan men ko jej aikuji ilo mour ko ad. Paul ear je, “Bwe jaar jab bõktok jabdewõt ñan lal̦ in, im barãinwõt je ban bõk l̦o̦k jabdewõt jãn e. A el̦aññe ewor m̦õñã im nuknuk ko ipped, jãn jokwane kaki.” (1 Tim. 6:7, 8) Em̦ool bwe eoktak wãween mour ilo kajjojo aelõñ. Bõlen ewõr jet men im jet armej ilo juon aelõñ em̦weiie remaroñ l̦õmn̦ak bwe ejjel̦o̦k tokjãn. Bõtab, ippãn jet ilo aelõñ ko jet, remaroñ l̦õmn̦ak bwe elukkuun lap tokjãn men kein ñan er.

Jekdo̦o̦n ñe eoktak wãween mour ilo jikin ko jej jokwe ie, jen l̦õmn̦ak kõn naan kein an Paul ke ear ba: “A ro re kanooj kõn̦aan bwe ren ri m̦weiie, re buñ ilo kapo im aujiid im elõñ m̦õm̦ ko re bwebwe im nana, rej kamal̦oñ armej ilo ko̦kkure im jorrããn.” (1 Tim. 6:9) Epen lo aujiid ko. Im ekkã aer wal̦o̦k ilo wãween eo jejjab kõtmãne kake. Ewi wãween jemaroñ kõjparok kõj jãn aujiid ko an kõn̦aan ko rebõd?

El̦aññe jenaaj likũt men ko an Anij m̦oktata, enaaj wõr ad iien ñan jerbal ñan Jeova, ekoba ad  katak Baibõl̦ ippãd make im jar. Men in enaaj jipañ kõj ñan ‘bolõmen im kõmmõni aoleb kain jerbal ko remmõn’ ñan jipañ ro jet.—2 Tim. 2:15; 3:17, UBS.

Ium̦win jet iiõ ko, elder ro rar kate er ñan rõjañ Jarosław im ear kõm̦m̦an oktak ko. Ear ba: “Juon iien ke rar kõnono ippa, elder ro rar kwal̦o̦k juon waanjoñak jãn Baibõl̦ kõn juon emaan im ear m̦weiie im ear kõn̦aan mour ñan indeeo. Bõtab, ear jab kõn̦aan kaarmejjeteik m̦weiuk ko an. Innem rar kareilok eõ kõn men in ilo juon wãween ejouj. Men in ear lukkuun tõpar bũruõ im ear kõm̦m̦an aõ kile ta eo ij aikuj jerbale ippa make.”—Ken. 11:28; Mark 10:17-22.

Jarosław ear kõm̦m̦an etale ko ilo mour eo an im ear bõjrak jãn an mad kõn peejnej eo an. Iloan wõt ruo iiõ, e im baam̦le eo an rar bar epaakel̦o̦k Jeova im kiiõ ej juon elder. Jarosław ej ba: “Ñe ro jeiũ im jatũ rej jol̦o̦k elap iien ko aer ilo peejnej ñan joñan eo me kõtaan eo aer ippãn Jeova epãd ilo kauwõtata, ij kajerbal waanjoñak eo aõ ñan kalikkar ñan er bwe ejjab menin mãlõtlõt ñan jerbal ippãn ro rejjab pãd ilo m̦ool eo. Ejjab juon men epidodo ñan ba jaab ñe jet armej im rejjab pãd ilo m̦ool eo rej kareel kõj ñan jerbal ippãn doon im kõm̦m̦an peejnej, im ñan ilo̦k jãn jerbal ko rejjab m̦ool.”—2 Kor. 6:14.

Marek ear bareinwõt katak jãn pepe eo an ear jab jim̦we. Meñe jerbal eo an elap on̦ãn ilo bar juon aelõñ ear jipañ baam̦le eo an, ak kõtaan eo an ippãn Anij im ro jein im jatin ilo tõmak ear jorrããn. Ejjabto, ear bar likũt men ko an Anij m̦oktata ilo mour eo an. Ear ba: “Elõñ iiõ ko remootl̦o̦k wãween eo iar iione ear ãinwõt bwebwenato eo an Baruch ilo Baibõl̦ eo kõnke ear ‘pukot men ko rel̦ap ñan e make.’ Im ãliktata iar akwel̦ap ñan Jeova ilo jar im kwal̦o̦k inepata ko aõ ñan e im kiiõ kõtaan eo aõ ippãn ebar em̦m̦an ãinwõt kar m̦okta.” (Jerm. 45:1-5) Marek ej kiiõ jibadek ‘jerbal eo em̦m̦an’ bwe en juon elder ilo congregation eo.—1 Tim. 3:1.

Marek ej letok naan in kakkõl in ñan ro im rej l̦õmn̦ak in kappok jerbal ko elap on̦ãer ilo bar jet aelõñ, ej ba: “Ñe jej etal ñan bar juon aelõñ, epidodo ad l̦orak ilo menin kapo ko an lal̦. Kõn ad jab jel̦ã kajin eo ie, jejjab maroñ kõnono ippãn ro jet. Em̦ool enaaj lõñ am̦ jããn ñe kwonaaj bar jepl̦aak ñan aelõñ eo am̦. Bõtab kõtaan eo am̦ ippãn Jeova enaaj jorrããn im emaroñ bõk iien ñan am̦ bar ruwaakl̦o̦k ñan e.”

Jenaaj kam̦õn̦õn̦õik Jeova el̦aññe jej bõk juon jerbal em̦m̦an im ebwe ñan ad kabwe aikuj ko ad, im jipañ ro jeid im jatid. Men in enaaj juon joñak ñan ro jet bwe ren l̦oore im kõm̦m̦ani pepe ko rejim̦we. Ro im rej ebbeer rej aikuj jipañ. Jej aikuji kwal̦o̦k jouj im tũriam̦o ñan er. Bareinwõt rej aikuj lo joñak ko rem̦m̦an an ro jeir im jatier. Elder ro ilo congregation im ro jet, remaroñ jipañ ro jeir im jatiir ilo aer jab poub im mad kõn m̦weiuk ko an lal̦.—Hib. 13:7.

Aet, jen jab kõjekdo̦o̦n ro jeid im jatid ilo ad kõtl̦o̦k bwe jen poub im mad kõn jerbal ko ad. (Pil. 1:10) Bõtab jen likũt men ko an Anij m̦oktata ilo mour ko ad bwe jen ‘m̦weiie ippãn.’—Luk 12:21.

[Kamelele eo itulal]

[Pija ilo peij 21]

Jerbal eo am̦ ej ke kõm̦m̦an bwe kwõn jako jãn kweilo̦k ko?

[Pija ilo peij 23]

Kwõj ke kortokjãn jabdewõt iien ñan jipañ ro jeõm̦ im jatõm̦?