Agbalot Ikakaindan Iray Kapananisiaan

“DIAD loob na samploy taon, asagyat kami ed saray negosyon iyoopresi na mundo, tan yinmaman kami. Anggaman binmaleg kami’d katuaan, nisian kami tan anggapoy espiritual a biskeg mi pian makapawil,” so inkuan nen Jarosław tan say asawa ton si Beata. *

Nanonotan ni na sakey ya agi a si Marek: “Lapud pananguman ed sosyedad tan politika diad Poland, aminpiga ak ya nakal ed trabaho. Adismaya ak. Natatakot ak ya mangipaalagey na sarilik a kompanya lapud anggapoy amtak ed negosyo. Diad saginonor, naingganyo ak lanlamang ya mannegosyo, ya iisipen kon mas nitaryak so materyal ya pankaukolan na pamilyak ya agnaapektaay espiritualidad ko. Balet ta alingo-lingo ak.”

Diad mundon ombibili lan ombibili iray sasaliwen tan ondarakel so anggapoy trabaho, walaray magmamaliw a desperado, kanian makakapandesisyon iray aliwa. Walaray agagin inmabuloy ya man-overtime ed trabaho, nandoble na trabaho, odino angipaalagey na sarili dan negosyo anta anggapoy amta ra ed satan. Iisipen dan say kaaruman ya naalmo ra et ontulong ed pamilya ra tan agmakaapekta’d espiritualidad da. Balet, saray ag-iilaloan a nagawa  tan manguman-uman ya ekonomya et nayarin maneral ed saray maabig a plano. Bilang resulta, arum so apatitan na inkamaagum tan insakripisyo day espiritual iran pankaabigan kasalat na materyal.​—Ecl. 9:11, 12.

Walaray agagin nigagalet ed saray opresi na mundo kanian anggapo lay panaon dan manpersonal study, miaral, odino manpulong. No paulyanan iratan, seguradon naapektaay espiritualidad tan relasyon da ed si Jehova. Nayarin napaulyanan da met so sakey nin importantin relasyon​—say malet ya siglaotan da ed saray “kapananisiaan” da. (Gal. 6:10) Say arum et kalkalnan inmarawi ed Kristianon impanaagi. Isipen pan maong iyan pamaakaran.

Say Obligasyon Tayo ed Saray Kapananisiaan

Bilang sanaagi, dakel so pankanawnawa tayon ipanengneng so aro ed sakey tan sakey. (Roma 13:8) Diad kongregasyon yo, nayarin naimanom ‘iray duka a maningel.’ (Job 29:12) Say arum et aliwan magenap iray manunan nakaukolan da. Impanonot ed sikatayo nen apostol Juan no anton pankanawnawa so iiter na saya. “Siopaman a walaan na magenap a pambilay tan nanenengneng to a mankakkaukolan so agi to ingen ta agto labay a kasian, panon a nibaga ya aaroen toy Dios?”​—1 Juan 3:17.

Nayarin akatulong ka la ed saraman ya agagi tan akapangiter na mabulos ya tulong ed arum. Balet ta nipatnag so aro ed agagi, aliwa labat a diad materyal a tulong. Walaray onkerew na tulong lapud naeermenan odino nadidismaya ira. Nayarin liknaen dan ag-ira makana, walay graben sakit da, odino inateyan ira na inaro’d bilay. Sakey a paraan pian napaseseg tayo ra et diad idengel tan pitongtong ed sikara, diad ontan et natulongan tayo ra’d emosyonal tan espiritual a pankaukolan da. (1 Tes. 5:14) Mabetbet et saya so lalon mamapaelet na aroan tayo bilang sanaagi.

Saray espiritual ya pastol so nagkalalon kaukolan ya ondengel tekep na empatya tan ipalikna dan natatalosan da ra. Sakey ni, mangiter iray maaron Makasulatan ya simbawa. (Gawa 20:28) Diad ontan et naalig na saray manangasikaso si apostol Pablo, a walay “panamabli” to’d saray kaagian to.​—1 Tes. 2:7, 8.

Balet no onsian ed pulok so sakey a Kristiano, panon to lay obligasyon to ed saray kapananisiaan to? Anggan saray manangasikaso et ag-ira nipuera ed tukson magmaliw a materyalistiko. Panon to no manpadaeg so sakey a Kristiano ed ontan a tukso?

Nabebelatan ed Saray Kapagaan ed Bilay

Singa nipaimano la, say panggunaet ya nitarya iray manunan pankaukolan na pamilya parad pambilay et mabetbet a mangiiter na  saray kapagaan tan mamakapuy ed panmoria tayo ed saray espiritual a bengatla. (Mat. 13:22) Onia so isasalaysay nen Marek, ya abitla ed akadkauna: “Sanen alugi so negosyok, nandesisyon ak a mantrabaho ed abroad a say sueldo et atagey. Sinalik a taloy bulan, insan taloy bulan lamet, tan onman la onman, ya no onsempet ak et magano labat. Lapud satan et naapektaan so emosyon na agmananisian asawak.”

Aliwa labat a say bilay na pamilya so naapektoan. Intuloy nen Marek: “Likud ed andukey ya oras a pantrabaho tan mansasnit so petang, wadtan niray makapuy ya ugalin totoo a mangaanamot ed arum. Say kagagawa ra et singa ra membro na gang. A-depress ak tan liknaen kon sarasarag da ak. Lapud agko la naasikasoy inkasiak, inisip kon agko sarag so manserbi ed arum.”

Saray makapaermen ya resulta na desisyon nen Marek so nepeg ya mamakiwas ed sikatayo a mannonot nin unona. Anggaman singano ompatnag ya say pan-abroad et solusyon ed saray problema ed pinansyal, agkasi itan mangiter na arum a problema? Singa bilang, antoy nagawa ed espiritual tan emosyonal a pankaukolan na pamilya tayo? Kasin say iyalis et mamultot ed siglaotan tayo’d kongregasyon? Agkasi mangekal itan ed pribilehyo tayon panserbi ed saray kapananisiaan?​—1 Tim. 3:2-5.

Balet, nayarin naimano yo ya anggano agman-abroad so sakey et nayari met a nigalet ed sekular a trabaho. Nonoten pay agawa’d si Jarosław tan si Beata. “Nen gapo agmi inisip no antoy nayarin nagawa,” so kuan to. “Nen kapankasal mi, angigapo kami na melag ya hot-dog stand diad lugar a masaliw itan. Asagyat kamin pabalegen so negosyo lapud baleg so natutubo mi. Balet lapud kulang so panaon mi, agkami makakapiaral. Ag-abayag, intundak so pampapayunir ko tan inmekal ak bilang ministerial servant. Manlikliket kami ed baleg ya naaalmo mi, kanian angilukas kami baleg ya puesto tan akisosyo ed aliwan kaagian. Ag-abayag et oonla ak la’d arum a bansa pian mipirmaan na saray kontrata a mankantidad na minilyon a dolyar. Mataltalag ak ya onsempet, tan ngalngali agko la napidenengan so asawak tan say anak mi. Asabi panaon, say maaligwas a negosyo mi et sengeg na kalkalnan intunda min manserbi ed si Jehova. Lapud agkami la mililimog ed kongregasyon, agmi la anggan nanonotan iray agagi.”

Antoy naaralan tayo ed saya? Say pananap na kaligenan ed pinansyal et mamatit ed sakey a Kristiano, a manresulta ed inkakampante tan pakabalang ni ingen na “latop a kawes to,” salanti, say pakabidbiran to bilang Kristiano. (Apo. 16:15) Satan so mangiyarawi’d sikatayo ed saray agagi a datin natutulongan tayo.

Matuan Panangusisa

‘Agnagawa ed siak itan,’ so nayarin isipen tayo. Balet, nepeg tayon seryoson nonoten no anton talaga so kaukolan ed bilay. “Anggapon balot so inawit tayo diad mundo, tan anggapon balot met so naawit tayon manlapu dia,” so insulat nen Pablo. “Kanian, no walay naakan tan ikawes tayo, mankontento tayo la ed saratan.” (1 Tim. 6:7, 8) Tua, nanduruma so estandarte na panagbilay ed kada bansa. Say ipapasen a kabkaabigan ed maaligwas a bansa et nayarin luho la ed dakel ya bansa.

Antokaman so estandarte ed lugar tayo, nonoten so ontumbok iran salita nen Pablo: “Saramay manpipirawat ya onyaman et napelag ed tukso tan patit tan dakel ya andi-kabaliksan tan makapasakit a pilpilalek, a mangilelereg ed totoo diad kadederal tan kabagbag.” (1 Tim. 6:9) Say patit et akaamot ed papatitan. Adesinyo itan pian patitan so biktima ya agto naliklikas. Panon itayon agnapatitan na “makapasakit a pilpilalek”?

Say pangiletneg na saray prayuridad et mamakiwas ed sikatayon mangigana na malaglaem a panaon parad intereses na Panarian, pati personal study. Say ontan a masimoon a panagaral so ontulong ed sakey a Kristiano a magmaliw a “sigpot a makayari tan akaparaan  a maong” ya ontulong ed arum.​—2 Tim. 2:15; 3:17.

Diad loob na pigaran taon, nanseetan na saray maaron elder a pabiskegen tan pasesegen si Jarosław. Sikatoy apakiwas a manggawa na baleg a pananguman. Inkuan to: “Diad aminsan ya importantin tongtongan, inaon na saray elder so Makasulatan ya ehemplo nipaakar ed sakey a kalangweran a mayaman a labay toy manbilay ya andi-anggaan balet agto nataynanan iray materyal a kayamanan to. Insan da mataktikan inyadapta itan ed siak. Talagan aliwawaan ak ed satan!”​—Uli. 11:28; Mar. 10:17-22.

Matuan inusisa nen Jarosław so kipapasen to tan nandesisyon ya pultoten toy koneksion to ed baleg a negosyo. Diad loob na duay taon, apapawil to tan na pamilya to so mabiskeg ya espiritualidad da. Sikato natan so manlilingkor ed saray agagi to bilang sakey ya elder. Inkuan nen Jarosław: “No walaray agagin nigagalet ed negosyo ya napapaulyanan da lay espiritualidad da, uusaren koy eksperiensyak pian iyilustra ya aliwan makabat so pikasakey ed saray agmananisia. Aliwan mainomay a resistian iray makapatukson opresi tan paliisan iray agmatuan kagagawa.”​—2 Cor. 6:14.

Si Marek so akaaral met na leksion. Anggaman say atagey ya sueldo ed abroad et akatulong ed pinansyal na pamilya to, naapektaan balet so relasyon to ed Dios tan ed saray agagi to. Sinmabi panaon, inusisa to lamet iray prayuridad to. “Diad loob na pigaran taon, say situasyon ko et mipara ed si Baruc nensaman ya ‘inanap to iray baleg a bengatla a nipaakar ed sikato.’ Anggad imbesngaw koy liknaan ko ed si Jehova ya ibabagak ed sikato iray kapagaan ko, tan natan et apapawil ko lay espiritual ya inkasimbang ko.” (Jer. 45:1-5) Dadampoten la natan nen Marek so “maabig a kimey” na manangasikaso ed kongregasyon.​—1 Tim. 3:1.

Onia so ipapasakbay nen Marek ed saramay mannononot ya man-abroad pian makaanap na trabahon atagey so sueldo: “No wala ka’d abroad, magmainomay so napatitan na sayan mauges ya mundo. Mairap so mitalosan ed arum no agmo kabisado’y lenguahe da. Nayarin onsempet kan napnoy bulsam, balet walay sugat ed espiritual ya mabayag ya onabig.”

Say pamasiansia ed inkasimbang ed sekular a trabaho tan say obligasyon tayo ed saray agagi so ontulong ed sikatayo pian napaliket si Jehova. Magmaliw itayon ehemplo ya mamakiwas ed arum pian manggawa na makabat a desisyon. Saramay nabebelatan et kaukolan day suporta, panangasi, tan maong ya ehemplo na saray agagi da. Saray elder ed kongregasyon tan agagin matatken ed espiritual so makatulong ed saray kapananisiaan pian napansiansia day inkabalanse da tan ag-ira nadaeg na kapagaan ed bilay.​—Heb. 13:7.

On, agtayo komon ikakaindan iray kapananisiaan diad pangiyabuloy tayon nigalet itayo ed sekular a trabaho. (Fil. 1:10) Imbes, magmaliw tayo komon ya “mayaman ed pakanengneng na Dios” diad pangiyuna tayo na intereses na Panarian ed bilay tayo.​—Luc. 12:21.

[Paimano ed Leksab]

[Saray litrato ed pahina 21]

Kasin agka makakapiaral lapud trabahom?

[Saray litrato ed pahina 23]

Papablien mo kasi iray pankanawnawam ya ontulong ed saray agagim ed espiritual?