Amayá karunchakusunchu iñiqmasinchikkunamantaqa

“CHUNKA watapuni negocioyku allinllaña kasqanraykum apu runakuna karqaniku. Iskayniyku taksachaykumantapacha cheqapmanta yachaptiykupas, karunchasqam kachkarqaniku hinaspam sasachakurqaniku kutimuyta”, nispam Julio hinaspa señoran Bertha ninku. *

Dario cristianopas ninmi: “Polonia nacionpi llumpay sasachakuykuna kasqanraykum, sapa kuti mana llamkayniyoq karqani. Hukmanyasqam tarikurqani hinaspa kikiypa negocioyta ruranaypaqpas iskayrayarqanim mana chaypaq kasqayrayku. Chaywanpas negocio ruraytam qallaykurqani, piensarqanim Diosmanta mana karunchakuspallay chaywan familiayta allinta mantienenaypaq. Ichaqa ¡manamá chaynachu karqa!”, nispa.

Enteron pachapi tukuy imapa precion wicharisqanrayku hinaspa llamkay mana kasqanraykum, wakin iñiqmasinchikkuna llumpayta preocupakuspanku mana allinta tanteanku. Wakinkunañataq llamkayman qokunku, iskay llamkayniyoq kanku otaq kikinku hatun negociota rurayta qallarinku mana experienciayoq kaspankupas. Piensankum astawan ganaspanku Diosmanta mana karunchakuspalla familiankuta yanapaytapas.  Ichaqa, tanteasqanku allinpi tukunanta hinaspa allinninkupaq kasqanta piensaptinkupas, wakinpiqa manam chaynachu kanman qonqaymanta imapas pasakusqanrayku otaq ima sasachakuypas kaptin. Chaymi wakinkuqa qollqella maskayman qokurunku hinaspa Diosmantapas karunchakurunku (Ecl. 9:11, 12).

Wakin iñiqmasinchikkunaqa llamkayman qokusqankuraykum, Bibliata estudianankupaq, huñunakuykunapaq nitaq predicanankupaqpas tiemponkuqa kanñachu. Chaynata ruraspankum Jehová Dioswan amistadninta yanqachanku. Manam chayllachu, congregacionpi ‘iñiqmasinkunapa’ amistadninkumantapas karunchakuytam qallaykunku (Gal. 6:10). Chaymi allinpuni kanman kaymanta qatiqninpi yachayninchikqa.

Iñiqmasinchiktam yanapananchik

Warmi otaq qari kaspapas, atichwanmi iñiqmasinchikkuna kuyasqanchikta qawachiytaqa (Rom. 13:8). Yaqachá congregacionpi pitapas yanapakuy necesitaqta qawarqanchik (Job 29:12). Ichapas wakinkupaqqa mana kanchu mikuyninku otaq pachankupas. Apostol Juanmi kaynata niwanchik: “Pipas kapuqniyoq kachkaspan runamasinta qawakunman imamantapas muchuqta hinaspa mana llakipayarispanqa ¿yaqachum Diosta kuyanman?”, nispa (1 Juan 3:17).

Wakinpiqa yaqapaschá chay necesitasqankupi yanaparqanchik. Ichaqa manamá chayna yanapakuy qoyllapichu piensana. Wakinkuqa sapallanku hinaspa llumpay llakisqa tarikuspankum yanapakuyta necesitanku. Ichapas onqosqa tarikunku, pi ayllunpas wañukurqa otaq piensanku servisqankuta Dios mana chaskisqanta. Paykunawan rimaspaqa chaynataq atencionwan uyarispaqa yachasunmi imayna yanapayta (1 Tes. 5:14). Chaynata ruraspaqa astawanmi iñiqmasinchikkunawan kuyanakusun.

Congregacionpi ancianokunam astawanqa atencionwan uyarinanku, llakipayarinanku hinaspam kuyakuywan Bibliata servichikuspanku consejananku (Hech. 20:28, NM). Chaynata ruraspankum apostol Pablopa ejemplonta qatipakuchkanku, payqa iñiqmasinkunata ‘llumpay kuyasqanpim’ reqsichikurqa (1 Tes. 2:7, 8).

Ichaqa, ¿imataq pasanman huk cristiano qollqerayku congregacionmanta karunchakuruptin? Iñiqmasinkuna yanapaytam qonqarunman. Llapallanchikmi chay toqllamanqa wichiykuchwan. ¿Imaynata?

Llumpayta afanakuyqa hukmanyachiwanchikmanmi

Qawasqanchikman hinaqa, familianchikta mantienenanchikpaq preocupakuyqa  hukmanyachiwanchikmanmi hinaspa cristiano kasqanchiktapas yanqacharunmanmi (Mat. 13:22). Dariom ima pasasqanmanta willawanchik: “Negocioypim fracasarurqani, chaymi huk law nacionman ripukuspay allin llamkayta maskarurqani. Kimsa killallapaqmi rirqani, ichaqa unaytam qeparurqani. Wakillanpim wasiypiqa familiaywan karqani. Chaymi señorayqa hukmanyasqallaña tarikurqa, payqa manam Jehová Diospa testigonchu”, nispa.

Manam familiallanpichu sasachakuypiqa karqa, payqa niwanchiktaqmi: “Mana munaspaypas llumpay rupaypim llamkarqani hinaspapas mana allinkuna rimaqkunawan hinaspa mana allin runakunawanmi llamkarqani. Llumpayta llamkachiwaptinkum, sinchi llakikuy hapiruwarqa. Kikiytapas cuidakuyta mana atispaymi, piensarqani hukkuna cuidaytaqa aswan mana atisqayta”, nispa.

Dario hina llumpay sasachakuypi mana tarikuyta munaspaqa, allintam piensananchik huk law nacionman rinapaqqa. Ichapas qollqemanta sasachakusqanchikta allicharuchwan, ichaqa aswan llakipiraqmi tarikuchwan. Chaymi tapukunanchik: “¿Imaynataq familiay tarikunqa hinaspa Dioswan amistadninkupas? ¿Yaqachu Diospa llaqtanmanta karunchakurusaq? ¿Harkawanqachu iñiqmasiykunata yanapanaypaq?”, nispa (1 Tim. 3:2-5).

Ichaqa manam huk law nacionman rispallachu llamkaywanqa sasachakuruchwan. Qawasun imam pasarqa Juliotawan señoranta, paymi nin: “Chayllaraq casarakuspaykum, achka runakunapa kasqanpi mikuyta rantikurqaniku. Allinta rantikusqaykuraykum astawan negocioykuta hatunyachirqaniku. Tiempoyku mana haypawasqankuraykum, huñunakuykunaman riyta saqerurqaniku. Precursor hinaspa siervo ministerial kasqaytapas saqerurqanim. Kusisqam tarikurqaniku allinta ganasqaykuwan chaymi aswan hatuntaña negocioykuta mana iñiq runawan rurarurqaniku. Huk law nacionkunaman riytapas qallaykurqanim achkallaña qollqepaq contratokuna ruranaypaq. Manam wasiypiqa tarikurqanichu hinaspa señoraywan, warmi churiywanpas aswan sasachakuypim karqani. Huk rimaypiqa negocioykum Diosmanta karuncharuwarqaku. Congregacionmantapas karunchakuruspaykum iñiqmasiykupiqa manaña piensarqanikuñachu”, nispa.

¿Imatam paykunamanta yachachwan? Tukuy imayoq kay munayqa mana allinkunamanmi aparuwachwan hinaspa ‘pachanchikta’ otaq cristiano kasqanchiktapas chinkarachinmanmi (Apo. 16:15). Chaymi iñiqmasinchikkunamanta karunchakuruchwan hinaspa yanapaytapas saqeruchwan.

Imayna kasqanchikta qawakusun

Ichapas nichwan: “Chayqa manam ñoqataqa pasawanqachu”, nispa. Ichaqa llapallanchikmi tapukunanchik imakunatam cheqaptapuni necesitanchik. Yuyarisun Pablopa kayna nisqanta: “Nacespanchikqa kay pachamanqa manam imatapas apamurqanchikchu, chaynataqmi wañukuspanchikpas imatapas mana apasunchu. Pachanchikpas mikunanchikpas kaptinqa, chaywanyá contentakusun” (1 Tim. 6:7, 8). Arí, huk law nacionpi runakunapa imakuna necesitasqankuqa manamá chaynallachu huk law nacionpiqa.

Wakcha otaq apu nacionpi kawsaspapas apostol Pablopa kayna nisqantam yuyarinanchik: “Apuyaylla munaqkunaqa tentachikuspam pantayllaman hinaspa mana valeq kaqkunallaman [“toqllaman”, NM] wichiykunku, chaykunaqa apakun llakillamanmi hinaspa wañuyllamanmi” (1 Tim. 6:9). Toqllataqa churankum animalkunata qonqayllamanta hapinankupaq. ¿Imatam rurachwan ‘mana valeq kaqkunawan’ mana toqllachikunapaq?

Imakuna cheqaptapuni necesitasqanchikta yachaymi, yanapawasun Dios serviypi rurayninchikkunapaq astawan tiempochakunapaq. Ejemplopaq, Biblia estudiayqa hinaspa orakuyqa yanapawanchikmi “yachayniyoq  kaspa tukuy allinkunata rurananchikpaq” (2 Tim. 2:15; 3:17).

Watakuna pasasqanman hinam ancianokunaqa kuyakuywan Juliota iñiyninpi allin kananpaq yanaparqaku, chaymi cambiarurqa. Paymi nin: “Allinta tanteanaypaqmi ancianokuna Bibliapi huk ejemplota qawachiwarqa, chaypim huk mozo wiñay kawsayta munaspanpas apu kasqanta mana saqeyta munarqachu. Sumaqllatam tapuwarqaku sichu chay ejemplo ñoqapa rurasqaywan tupasqanta. Kaymi yanapawarqa cambianaypaq”, nispa (Pro. 11:28; Mar. 10:17-22).

Imayna tarikusqanta allinta qawaspanmi Julioqa hatun negocionkunata saqerurqa. Iskay watamantam paypas familianpas Dioswan amistadninkupi allinña karqaku. Kunanqa congregacionninpim ancianoña. Paymi nin: “Wakin cristianokuna negocionkuman qokuruspanku Dios serviyninkupi hukmanyaptinkum, kikiyta pasawasqanwan qawachini mana iñiq runakunawan negocio ruray mana allin kasqanta. Wakinpiqa aswan qollqeyoq kanapaqmi munachiwachwan otaq qollqerayku engañanapaq hikutawachwan, chaykuna qepanchayqa sasapunim”, nispa (2 Cor. 6:14).

Dariopas mana allinkuna pasasqanwanmi yacharurqa. Huk law nacionpi llamkaspan familianpaq achka qollqeta apachimuspanpas, Dioswan hinaspa iñiqmasinkunawan amistadninmi yanqachakururqa. Tiempo pasasqanman hinam imayna tarikusqanta qawakurqa. Paymi nin: “Achka watam Baruc hina tarikurqani, paymi Bibliapa nisqanman hina ‘admirakuypaq kaqkunata’ maskarqa. Hinaptinmi sonqomanta Diosta mañakuspay willarqani llakiykunata, kunanqa allinñam tarikuni”, nispa (Jer. 45:1-5). Darioqa kallpanchakuchkanmi ‘allin oficiota’ otaq congregacionpi anciano kananpaq (1 Tim. 3:1).

Dariom allin llamkayrayku huk law nacionman riy munaqkunata kaynata nin: “Huk law nacionpi kaspaqa chayllam mana allinkunaman wichiykuchwan. Hinaspa chay nacionpi rimayninkuta mana yachaspaqa, sasachakunkim hukkunawan rimayta. Yaqapaschá achka qollqeyoq wasikiman kutinki, ichaqa iñiynikipim hukmanyasqa tarikunki”, nispa.

Llamkayllamanña mana qokuspa iñiqmasinchikkunatapas yanapaptinchikqa, Jehová Diostam kusichisun. Chaymantapas allin tanteaq kasqanchikwanmi allin ejemplota qosun. Hukmanyasqakunaqa necesitankum yanapananchikta, llakipayananchikta hinaspa allin ejemplo qonanchiktapas. Congregacionpi ancianokunawan yuyayniyoq cristianokunam, iñiqmasinkunata yanapananku allinta tanteanankupaq chaynapi llamkayllamanña mana qokurunankupaq (Heb. 13:7).

Amayá haykapipas llamkayraykuqa iñiqmasinchikkunamantaqa karunchakusunchu (Fili. 1:10). Aswanmi sapakama kallpanchakunanchik Diospa munayninta puntapi churaspa qayllanpi allin kanapaq (Luc. 12:21).

[Willakuy]

[21 kaq paginapi dibujokuna]

¿Llamkayraykuchu huñunakuykunaman mana rinchik?

[23 kaq paginapi dibujokuna]

¿Chaninchanchikchu iñiqmasinchikkuna imapipas yanapayta?