Ama iñiqmasinchiskunamanta t’aqakusunchu

JONATÁN esposan Beatrizpiwanmi ninku: “Chunka watañan negociopi llank’aspa qhapaq kapurqayku. Iskayniykuña wawa kasqaykumantapacha Diosta reqsirqayku chaypas, karunchakapurqaykun Diospa llaqtanmanta manataqmi kutimpuytapas atirqaykuchu”, nispa. *

Marek sutiyoq iñiqmasin nillantaq: “Polonia nacionpi imaymana sasachakuykuna kasqanraykun askha llank’anakunamanta wikch’uwarqanku. Chhaynapi tarikuspan huk negociota ruwayta munarqani, ichaqa manan imaynanmantapas qallariyta atirqanichu. Chaywanpas huk negociotan qallarirqani familiayta allinta uywanaypaq Diospa llaqtanpipas allin kanaykuta yuyaykuspa. Ichaqa manan chhaynachu karqan”, nispa.

Wakin iñiqmasikunan qolqe mana aypasqanrayku llank’anapas mana tarikusqanrayku ancha llakisqa tarikunku mana allinta yuyaykuspataq imatapas decidinku. Wakinmi tutakama llank’anku, wakintaq iskay llank’anapi otaq negociota ruwanku mana imata yachashaspa. Ninkun: “Familiayta allinta uywanaypaq aschatawan qolqeta ganakuspaqa allillanmi iñiyniykupipas kasaqku”, nispa. Iñiyninkupi allillan kanankupaq yuyaykuspaña chay negociokunata  ruwanku chaypas, imapas qonqaylla kaqtinqa iñiyninkupin urmapunkuman. Wakinqa pisi-pisimanta qolqe sonqoman tukupuspan Dios servinankumantaqa qolqe maskhayllapiña afanakunku (Ecl. 9:11, 12).

Wakin iñiqmasinchiskunan qolqeta maskhaspa manaña Bibliata estudiankuchu, manaña huñunakuykunaman rinkuchu nitaq predicacionmanpas lloqsinkuchu. Chhaynapin iñiyninkupi chiriyapunku Jehová Dioswanpas manaña allinpichu kapunku. Chaymantapas ‘iñiq-masinchiskunamantan’ t’aqakapunku pisi-pisimantataq Diospa llaqtanmanta karunchakapunku (Gál. 6:10). Chaymi kunan yachasun chaykunamanta cuidakunapaq yanapaykunamanta.

Iñiqmasinchiskunata yanapananchis

Qhariña warmiña kanchis chaypas llapallanchismi rikuchisunman iñiqmasinchiskuna munakusqanchista (Rom. 13:8). Yaqapaschá repararqanchis ‘yanapanata’ necesitaq iñiqmasikunata (Job 29:12). Wakinpaqa yaqapaschá imankupas pisishan. Chaymantan apóstol Juan sut’ita nirqan: “Pipas kay pachapi qhapaq kashaspa iñiqmasinta pisichikushaqta rikuspa mana khuyapayanmanchu chayqa, ¿Diospa munakuyninqa sonqonpi kanmanchu?” nispa (1 Juan 3:17).

Yaqapaschá mayqen iñiqmasitapas yanapaykurqanchis. Ichaqa manan kaqnillanchiswanchu yanapaykunanchis. Wakinqa sapallanku rikukuspa otaq llakiq ñit’isqan tarikuspan yanapanata necesitanku. Yaqapaschá sinchi onqosqa kashanku, munakusqanku runa wañupusqanmanta llakisqa kashanku otaq Diosta servispa manapas allintachu ruwashankuman hina sientekunku. Chhaynapi tarikuq iñiqmasikunata yanapanapaqqa paykunawanmi parlana, makillataqmi uyarina llakikuyninkupi iñiyninkupi ima yanapanapaq (1 Tes. 5:14). Chayta ruwaspan astawan iñiqmasinchiskunawan munanakusun.

Umallikunan astawanqa chhaynapi tarikuq cristianokunata yanapankuman sumaqta uyarispa, imayna sientekusqankuta entiendespa, Bibliawan yuyaychaspanku ima (Hech. 20:28). Chhaynapin apóstol Pablo hina ‘ancha munakuywan’ iñiqmasikunata yanapanqaku (1 Tes. 2:7, 8).

¿Iman suceden mayqen iñiqmasipas qhapaq kayta maskhaspa iñiqmasinkunamanta karunchakapuqtin? Manan iñiqmasinta yanapayta atinmanchu. Llapanchismi chaymanqa urmasunman, umallikunapas urmankumanmi. ¿Imaynapi?

Kay kawsaypi afanakuykunan llakichiwasunman

Familianchispa necesitasqanpi sinchita yuyaykuspaqa llakikuymi ñit’iwasunman Dios serviyninchispipas pisiyapusunmanmi (Mat. 13:22). Marek willakullantaq: “Negocioymi ch’usaqman tukupurqan, chaymi huk nacionta ripuspa allin sueldota gananaypaq hina  llank’anata maskharqani. Kinsa killallapaqmi rirqani chaymantataq kinsa killapaqwan kutirqani, chaytan ruwarqani askha kutipi. Visita hinallan wasiyman chayaq kani. Chaymi mana iñiq esposaypas sinchi llakikuypi tarikurqan”, nispa.

Marekpas sasachakuykunapin tarikurqan, paymi nin: “Sinchi ruphaypa kasqanpin askha horata llank’aq kani, llank’aqmasiykunaqa qhelli simikunatan rimaqku hukkunatapas millaytan trataqku. Sinchitapas llank’achiwashankuman hina qhawarikuspaymi llakikuy onqoy hap’iwarqan. Manan ñoqa kikiypaqpas tiempota aypachikurqanichu chaymi nirqani, ‘manan hukkunata cuidayta atiymanchu’ nispa”, nispa.

Marekpas hukkunapas imakunapichus rikukusqankun kayta yachachiwanchis: huk nacionman ripuyta munaspaqa allintan yuyaykunanchis. Yaqapaschá qolqeyoq kayta munaspa allinpaq chayta qhawarisunman, ichaqa aswan hatun sasachakuykunapin tarikusunman. Chaymi tapukunanchis: “¿Allinchu familiay sientekunqa allinchu iñiyninkupipas kanqaku? ¿Karunchawanqachu Diospa llaqtanmanta? ¿Atisaqchu iñiqmasiykuna yanapayta?” nispa (1 Tim. 3:2-5).

Wakinqa kikin llaqtankupin sinchi llank’ayman qokunku. Jonatanwan esposanpiwanmi chhaynapi tarikurqanku. Jonatán willakun: “Manan hayk’aqpas qhapaq kaypiqa yuyaykurqaykuchu, chaymi casarakusqayku qhepaman huch’uy carpachata kicharqayku mikhunata vendenaykupaq. Allintan chay negociopi ganakurqayku, chaymi negocioykuta hatunyachirqayku. Manan imapaqpas tiempoyku karqanchu, chaymi huñunakuymanpas manaña rirqaykuchu. Manañan precursorchu karqani yanapakuq qhari (siervo ministerial) kasqaytapas saqepurqanin. Chay negocioykupi askha qolqe ganasqaykuwanmi kusisqa kasharqayku, chaymi hatun tiendatañataq kicharqayku. Qhepamantaq mana iñiq runawan rimanakurqayku negociota ruwanaykupaq. Huk nacionman askha qolqepaq contratota ruwaq rishaspaymi mana allin ruwasqayta reparakurqani. Manañan wasiypipas sayaqchu kani, manan esposaywanpas ususiywanpas allinpichu kawsarqayku. Sinchita negocioykupi llank’asqaykun Diosmanta karunchawarqanku. Karunchakapurqaykun Diospa llaqtanmanta manañan iñiqmasiykutapas yuyarirqaykuchu”, nispa.

¿Imatan chaymanta yachanchis? Yaqapaschá imaymanayoq kayta munaspa imamanpas urmasunman hinaspa qonqapusunman Dios serviyninchista, ‘p’achanchistapas’ otaq iñiyninchista chinkachisunman (Apo. 16:15). Chayta ruwaspaqa iñiqmasinchiskunamantan karunchakusunman manataqmi yanapaytapas atisunmanchu.

Allintan qhawarikunanchis

Yaqapaschá nisunman: “Ñoqataqa manan chaykuna pasawanqachu”, nispa. Ichaqa llapallanchismi qhawarinanchis imakunatan necesitanchis kawsananchispaq chayta. Pabloq nisqantan yuyarinanchis: “Kay pachamanqa manan imatapas apamurqanchischu, manallataqmi imatapas apasunchischu. Chayrayku, mikhunanchispaqpas p’achakunanchispaqpas kashaqtinqa, chaykunawanmi sonqopas-sonqo kashananchis”, nispa (1 Tim. 6:7, 8). Arí, sapanka nacionpin mana kaqllachu hayk’a qolqewan kawsay, qhapaq nacionkunapi imachus necesitasqallankuwan kawsasqankun wakcha nacionpi tiyaqkunapaqqa qhapaq hina kawsay kanman.

Wakchaña otaq qhapaqña kasunman chaypas Pabloq nisqanta yuyarinanchis, paymi nirqan: “Qhapaqyayta munaq runakunan ichaqa wateqayta mana atipaspa, toqllaman hina urmaykunku, hinaspan mana valeq waqllichiq munapayaypi rikukuspanku, chaykunawan chinkayman ñak’ariyman urmaykapunku”, nispa (1 Tim. 6:9). Huk toqllaqa animalkunata qonqayllamanta hap’inapaqmi. Chhaynaqa, ¿imaynatan chay ‘waqllichiq munapayay’ toqllamanta ayqekusunman?

Imatachus ñawpaqta ruway munasqanchista yachaymi kallpachawasun Bibliata sapallanchispi estudianapaq Diosmanta mañakunapaqpas.  Chaykunan yanapawasun ‘tukuy allin kaqkunata ruwanapaq allin-allin wakichisqataqmi’ kasun hukkunata yanapanapaqpas (2 Tim. 2:15; 3:17).

Watakunaq pasasqanman hinan askha umallikuna Jonatanta munakuywan yanaparqanku, iñiyninpipas kallpacharqanku chaykunan yanaparqan cambiananpaq. Jonatanmi nin: “Umallikunan Bibliawan yanapawaspanku willawarqanku wiñaypaq kawsay munaq waynamanta, ichaqa askha kaqninkunatan mana saqeyta munasqachu. Chaymantataq munayllata tapuwarqanku: ‘¿Manachu qanpas chhaynapi tarikushanki?’ nispa. Chayraqmi repararqani imapi pantasqayta”, nispa (Pro. 11:28; Mar. 10:17-22).

Jonatanqa imaynapi tarikusqanta qhawarikuspan hatun negocionta saqepurqan. Iskay wata qhepamanmi paypas familianpas iñiyninkupi allinyapurqanku. Kunanqa umallin kashan. Paymi nin: “Iñiqmasikuna negocionkupi sinchita afanakuspa Dios serviyninkuta saqepushasqankuta reparaspaqa imachus sucedewasqanta willaspan nini ‘mana iñiq runakunawan negocio ruwayqa manan allinchu’ nispa. Paykunaqa askha qolqe ganananchispaqmi rimapayawasunman otaq askha qolqeta ganananchisrayku suwakuyman otaq llullakuyman tanqaywasunman, chaykuna atipayqa sasan kanman”, nispa (2 Cor. 6:14).

Marekpas mana allinkunapi tarikuspañan yacharqan allinkaq ruwayta. Huk nacionpi llank’aspa askha qolqetaña ganarqan chaypas, karunchakapurqanmi Diosmanta iñiqmasikunamantapas. Qhepamanmi ichaqa imatachus ñawpaqpi ruwananta repararqan, ninmi: “Askha watakunan Baruc hina ‘allin kaqkunallata’ maskhaspa kawsarqani. Chay qhepamanmi Jehová Diosmanta tukuy sonqowan mañakuspa lliw llakikuyniykunata willarqani, kunanqa allinyashaniñan iñiyniypi”, nispa (Jer. 45:1-5). Marekqa allin cristiano kananpaqmi kallpachakushan, chhaynapi qhepaman umalli kaspa ‘allin llank’ayta’ aparinanpaq (1 Tim. 3:1).

Aswan allin llank’anayoq kanankurayku huk nacionman riy munaqkunatan Marek nin: “Huk nacionman riqqa ratollan ima trampapipas urmanman. Chay nacionpi runakunaq rimayninta mana yachaspaqa sasan kanman paykunawan parlay. Yaqapaschá askha qolqeyoq kutipuwaq, ichaqa iñiyniykipin chiriyapuwaq sasatataqmi Diosman kutirikuwaq”, nispa.

Sichus iñiqmasinchiskunata mana saqespa llank’akusun chayqa, Jehová Diostan kusichisun, allin yuyayniyoq kasqanchistataqmi rikuchisun. Sasachakuykunapi tarikuq iñiqmasinchiskunaqa necesitankun yanapananchista, khuyapayananchista, allin ejemplo kananchistawan. Umallikuna allin iñiyniyoq iñiqmasikunapas yanapanankun iñiqmasinkuta kay kawsaypa llakichikuyninkunawan ama ñit’ichikunankupaq, allin yuyaywan imatapas ruwanankupaq ima (Heb. 13:7).

Ama hayk’aqpas llank’ananchisraykuqa iñiqmasinchiskunata qonqasunchu (Fili. 1:10). Aswanmi sapankanchis kallpachakunanchis Dios serviyninchista ñawpaqman churaspa Diospaq “qhapaq” kananchispaq (Luc. 12:21).

[Uranpi willakuy]

[21 paginapi fotokuna]

¿Llank’ananchisraykuchu huñunakuykunata saqepushanchis?

[23 paginapi fotokuna]

¿Ancha allinpaqchu qhawarinchis iñiqmasinchiskuna yanapayta?