Auraka e Akaruke i Toou Au Taeake Irinaki

“E TAI ngauru mataiti, kua pou to maua manako ki teia ao pitiniti, e kua maata ta maua apinganui. Noatu kua utuutuia maua i roto i te tuatua mou, kua topa rava maua ki vao e kare e maroiroi i te oki mai,” i akakite ei a Jarosław e tana vaine, ko Beata. *

Kua akakite tetai taeake ko Marek e: “No te tauianga o te turanga o te oraanga e te pae poritiki i Porani, kare e tinamou ana taku angaanga. Kua taitaia tikai au. Kua mataku au i te akamata i taku uaorai kamupani no te mea kare oku kite no te angaanga pitiniti. I te openga, kua timataia au kia akamata i tetai, e kua manako e ka tauturu teia iaku kia akono meitaki i toku pamiri i te pae materia ma te kore e tamanamanata i toku turanga pae vaerua. Aere ua rai, kua kite mai au i toku tarevake.”

I te ao nei e kake ua atura te moni o te au mea e kare e tinamou ana te angaanga moni, no te taitaia kua rave tetai pae i te au ikianga tau kore. Kua iki tetai au taeake kia maata atu te ora angaanga, kia maata atu te angaanga, me kore kia akamata i ta ratou uaorai pitiniti noatu kare o ratou kite. Kua manako ratou e me maata atu te moni, ka tauturu te reira i te pamiri e kare e kino te pirianga kia Iehova. Inara, ka tamanamanata  mai te au turanga kitea koreia e te tinamou kore o te moni i te au parani meitaki. Tei tupu mai, kua topa atu tetai pae ki roto i te ereere o te noinoi e kua akaatinga i te au anoano pae vaerua no te au mea materia.​—Kohe. 9:11, 12

Kua pou te maroiroi o tetai au taeake e te tuaine ki te au angaanga o teianei ao e kare o ratou taime no ta ratou uaorai apii, te au uipaanga, e te angaanga orometua. Taka ua ra, me kopaeia taua au angaanga ra ka kino to ratou turanga pae vaerua e te pirianga kia Iehova. Penei ka akaruke katoa ratou i tetai pirianga puapinga maata​—to ratou pirianga ki te aronga o “te ngutuare o te akarongo.” (Gala. 6:10) Aere ua rai kare tetai pae e piri akaou mai ki te taokotaianga taeake Kerititiano. Akamanako meitaki i teia turanga.

Ta Tatou Apainga ki te Au Taeake Irinaki

Ei au taeake e te au tuaine, e maata te au atianga no tatou kia akaari i te aroa ki tetai e tetai. (Roma 13:8) I roto i taau putuputuanga, penei kua kite ana koe i ‘te aronga e kapiki maira no te tauturu.’ (Iobu 29:12) Tetai pae kare maata ana ta ratou apinga materia. Kua akamaara mai te apotetoro ko Ioane ia tatou i ta teia ka oronga mai. “Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia?”​—1 Ioa. 3:17.

Penei kua ariu atu ana koe ki taua au patianga e kua tauturu aroa atu i tetai ke. Inara, kare to tatou inangaro no te taokotaianga taeake i kotinga uaia ki te tauturu anga i te pae materia. Penei ka pati tauturu mai tetai pae no te mea ko ratou anake ua me kore kua maromaroa ratou. Penei kua manako ratou e kare ratou e puapinga ana, kua rokoia e te maki kino, me kore kua mate tetai tei akaperepereia. Tetai mataara no tatou kia akamaroiroi ia ratou, na te akarongo anga e te tuatua anga kia ratou, e rauka ai ia tatou i te tauturu atu ia ratou i te pae manako e te pae vaerua. (1 Tesa. 5:14) E akaketaketa ua ana teia i te pirianga aroa mou ki to tatou au taeake.

Ka rauka i te aronga pakari o te putuputuanga i te akarongo ma te tu akaaroa, akaari e te marama ra ratou, e kia oronga i te akoanga aroa Tuatua Tapu. (Anga. 20:28) Na roto i taua tu, te aru ra te au akaaere i te apotetoro ko Paulo, tei ‘maata te aroa’ no tona au taeake e te au tuaine i te pae vaerua.​—1 Tesa. 2:7, 8.

Inara, me ka aere ke tetai Kerititiano mei te anana, eaa te ka tupu ki tana apainga ki tona au taeake irinaki? E timataia ana te au akaaere kia aruaru i te au apinga materia. Akapeea me ka vare atu tetai Kerititiano i taua timataanga ra?

Taomiia e te Au Manamanata o te Oraanga

Mei tei akakiteia, e tupu ana te manamanata no te angaanga pakari i te akono i te au anoano  pae kopapa o te pamiri e ka paruparu to tatou manako no te au mea puapinga pae vaerua. (Mata. 13:22) Kua akamarama mai a Marek tei taikuia i mua ana e: “Te puapinga kore anga taku pitiniti, kua kimi au i tetai angaanga maata te moni i tetai enua ke. Kua tere atu i te ono marama toku aereanga, e e oki ana au no tetai tuatau poto ua ki te kainga. Taitaia tikai taku vaine kare i roto i te tuatua mou, no te reira.”

Kare ko te oraanga ua o te pamiri tei kino. “Kapiti mai ki te angaanga roa anga i roto i te vera,” i karanga ai a Marek, “kua kite au i te au tangata viivii e akakino ra i tetai ke. Mei te pupu takinga kino rai to ratou tu. Taitaia tikai au e kua manako puapinga kore. Kua ekoko au me ka rauka iaku te angaanga na tetai ke, no te mea kare oku taime i te akono iaku uaorai.”

Te au mea taitaia tei tupu no ta Marek au ikianga, ka akakeu i tetai ke kia akamanako meitaki. Noatu ka meitaki mai te au turanga ngata i te pae moni me aere ki tetai enua ke, kare ainei e ka akatupu mai i tetai atu au manamanata? Ei akatauanga, eaa te ka tupu ki te turanga pae vaerua e te pae manako o to tatou pamiri? Ka riro ainei te neke anga ei akavee i to tatou pirianga ki te putuputuanga? Kare ainei ka akangere te reira i to tatou tikaanga ngateitei te matuapuru anga i te au taeake irinaki?​—1 Timo. 3:2-5.

Mei taau rai i kite, kare e anoanoia tetai tangata kia angaanga i vao ake i tona enua anau kia pou te maroiroi ki te angaanga moni. Akamanako ana ia Jarosław e tana vaine ko Beata. “Meitaki ua te akamataanga,” i karanga ai aia. “Koi akaipoipo ua akera maua, kua akatuera maua i tetai manga toa okooko totiti i roto i te varaoa i tetai ngai meitaki tikai. No tei maata ta maua moni kua inangaro maua i te akamaata atu i ta maua pitiniti. Inara e iti ua to maua taime, e kare maua e tae ana ki te au uipaanga Kerititiano. Kare i roa ana, kua akaruke au i te angaanga painia e te tavinianga ei tavini orometua. No te rekareka i te moni ta maua i rauka mai, kua akatuera maua i tetai toa maatamaata e kua o atu ki tetai pirianga pitiniti ma tetai tangata kare i roto i te tuatua mou. Kare i roa ana kua aere atu au ki tetai enua ke i te taina i tetai au koreromotu e mirioni ua atu tara. Kare oku taime i te kainga, e kua kino toku pirianga ki taku vaine e taku tamaine. I te openga, no tei pou to maua maroiroi ki te pitiniti meitaki, kua akamutu maua i te tavini ia Iehova. No te mea kare maua e piri akaou ana ki te putuputuanga, kare maua e manako akaou atu ana i to maua au taeake.”

Eaa te apiianga i konei no tatou? Ka akaereereia tetai Kerititiano te inangaro anga i te akatupu i tetai oraanga meitaki i teianei mei tetai “parataito” rai. Kare aia e manako atu i te kino ka tupu mai, e ka ngere aia i “tona kakau,” tei akataka iaia ei Kerititiano. (Apo. 16:15) Ka akatakake te reira ia tatou mei te au taeake tei tauturu ana tatou i te taime mua.

Rave i te Ikianga Tau

Penei ka manako tatou e, ‘Kare te reira e tupu kiaku.’ Inara, ka tau tatou kia akamanako meitaki e mei teaa ra te maata ka anoanoia no te oraanga. “Kare ua oki a tatou apinga i apai mai ki teianei ao; e kua kitea tikaia e kare takiri e apinga e tika kia apai katoa kia aere ke tatou nei,” i tata ai a Paulo. “E teianei, e kai ta tatou, e te kakau, kia mareka tatou i te reira.” (1 Timo. 6:7, 8) E tika rai, tukeke te turanga o te oraanga mei tetai enua ki tetai. Tei manakoia e e iti ua i tetai enua puapinga, ka manakoia e e maata tikai i roto i tetai au enua ke.

Noatu eaa te turanga e noo ra tatou, e akamanako i te au tuatua a Paulo ka aru mai: “Te aronga e māro e kia maata te apinga, e rokoia ïa e te timataanga, e te ereere, e te anoano neneva e manganui, e kino ei ra, e maremo takiri atu ei te tangata ki roto i te pou e te mate.” (1 Timo. 6:9) E uunaia ana te ereere mei te manu ka mareiia. Kua maaniia te reira kia opu poitirere i te manu. Akapeea ra tatou me kopae i te au mea “kino” kia kore tatou e o atu ki roto i te ereere?

Te akanooanga i te au mea puapinga, ka akakeu ia tatou kia maata te taime no te au anoano o te Patireia, kapiti mai ta tatou uaorai apii. Ka tauturu taua apiianga ma te pure i tetai Kerititiano ‘kia apa kore, ma te tau tikai’ i te tauturu i tetai ke.​—2 Timo. 2:15; 3:17.

 No tetai au mataiti, kua akaketaketa e kua akamaroiroi te aronga pakari aroa ia Jarosław. Kua akakeuia aia kia rave i tetai au tauianga puapinga. Kua tuatua aia e: “I roto i tetai pukapukaanga puapinga, kua taiku mai te aronga pakari i tetai akaraanga Tuatua Tapu no tetai tangata mapu apinganui tei inangaro i te oraanga mutu kore, inara kare e inangaro ana i te akaruke i tana au apinga materia. Kua ui maru mai ratou e me te tau ra teia akaraanga kiaku. Kua tauturu te reira iaku kia marama eaa taku ka rave!”​—Mase. 11:28; Mare. 10:17-22.

Kua akamanako meitaki a Jarosław i tona turanga e kua iki aia kia akamutu i te piri atu ki roto i te angaanga pitiniti mamaata. E rua mataiti i muri mai, kua akaketaketa akaou aia e tona pamiri i to ratou pirianga kia Iehova. Te tavini ra aia i tona au taeake i teianei ei tangata pakari. Kua akakite a Jarosław e: “Me pou te maroiroi o te au taeake ki te angaanga pitiniti e kua akangere i to ratou turanga pae vaerua, ka akakite au i toku akaraanga ei akatutuanga i te tu tau kore no te kapitianga ki te aronga akarongo kore. Kare i te mea mama i te patoi atu i te au mea me orongaia mai, e kia kore e rave i te au angaanga tika kore.”​—2 Kori. 6:14.

Kua kite katoa mai a Marek i tetai apiianga puapinga. Noatu e kua tauturuia tona pamiri i te pae moni no te angaanga moni maata i tetai enua ke, kua kino tona pirianga ki te Atua e ki tona au taeake. Kare i roa ana, kua akamanako akaou aia i te au mea puapinga kiaia. “Te au mataiti i aereia, kua aite toku turanga ki to Baruka i taito tei ‘kimi i te meitaki maata nona uaorai.’ I te openga, kua akakite au eaa to roto i toku ngakau, te akakiteanga i toku au manamanata kia Iehova, e i teianei kua rauka akaou toku pirianga kia Iehova.” (Iere. 45:1-5) Te itae nei a Marek i te “angaanga meitaki” ei akaaere i roto i te putuputuanga.​—1 Timo. 3:1.

Te akamatakite nei a Marek i te aronga ka manako i te aere ki tetai enua ke i te kimi i tetai angaanga moni meitaki: “Ia koe i tetai enua, mama ua i te topa atu ki roto i te au ereere o teia ao kino. No te kite kore i te reo o tera enua, kare e rauka i te komunikeiti atu ki tetai ke. Penei ka oki koe ki toou enua e taau moni, inara kua kino toou turanga pae vaerua e ka roa te tuatau e meitaki mai ei.”

Ka akamareka tatou ia Iehova me akono meitaki tatou i te angaanga moni e ta tatou apainga ki to tatou au taeake. Ka rauka ia tatou i te oronga i te akaraanga meitaki te ka akakeu i tetai ke kia rave i te ikianga tau. Te anoano ra te aronga taitaia i te tauturu, e kia akaariia te tu ngakau aroa, e te akaraanga meitaki a to ratou au taeake e te au tuaine. Ka rauka i te aronga pakari o te putuputuanga e tetai atu aronga maroiroi i te tauturu i te au taeake irinaki kia akono meitaki i to ratou turanga e kia kore e akapou i te maroiroi ki te au manamanata o te oraanga.​—Ebe. 13:7.

Ae, auraka tatou e akaruke i to tatou au taeake irinaki na te akapou anga i te maroiroi ki roto i ta tatou angaanga moni. (Phili. 1:10) Kareka ra, kia ‘maata te apinga ki te Atua’ ia tatou e tuku ra i te au anoano o te Patireia na mua i roto i to tatou oraanga.​—Luka 12:21.

[Tataanga Rikiriki i Raro]

[Au Tutu i te kapi 21]

Aruaruanga i te au mea pitiniti ka tuku ainei ia koe kia akaruke i toou au taeake?

[Au Tutu i te kapi 23]

Akaperepere ra ainei koe i taau au apainga ei tauturu i toou au taeake e te au tuaine pae vaerua?