Kujowora Ŵakhristu Ŵanyinu Cara

JAROSŁAW na muwoli wake Beata, * ŵakati: “Kwa vilimika khumi, tikatangwanikanga comene na bizinesi ndipo tikasambazga. Nangauli tikakulira mu unenesko, tikapuluka comene mwauzimu ndipo tikaŵavya nkhongono zakuti tiwelereso.”

Mbali munyake, zina lake Marek wakati: “Cifukwa cakuti ndyali na vinthu vinyake vikasintha mu Poland, nkhakhaliskanga yayi pa nchito. Nkhakhuŵara. Nkhacitanga wofi kwambiska kampani yane cifukwa nkhamanyanga makora yayi vya bizinesi. Paumaliro, nkhayezga kwamba bizinesi na cilato cakuti yinovwirenge kupwelelera makora mbumba ndipo nkhaŵavya maghanoghano ghakuti yinganitimbanizga mwauzimu. Pamasinda nkhawona kuti nkhajipusika.”

Cifukwa cakuti vinthu vikukwera mtengo nyengo yiliyose, ndipo ulova ukusazgikira comene, ŵanyake ŵakusoŵerathu pakukora ndipo ŵakusankha vinthu mwambura mahara. Ŵabali ŵanandi ŵakugwira nchito kwa maora ghanandi, kucita maganyu para ŵaŵeruka ku nchito, panji kwamba bizinesi nangauli ŵakumanya yayi kendeskero kake. Ŵakughanaghana kuti para ŵangasanga ndalama zinandi zovwirenge mbumba zawo ndipo ŵalutilirenge  kuŵa paubwezi na Yehova. Kweni vinthu vyamabuci na kuleka kukhazikika kwa ndalama vingatimbanizga munthu mwauzimu nanga nipara wanguŵa na pulani yiwemi. Ŵanji ŵawira mu cipingo ca uryezi ndipo ŵakudangizga vinthu vyakuthupi m’malo mwa vyauzimu.—Muph. 9:11, 12.

Ŵabali na ŵadumbu ŵanji ŵakutangwanika comene na vyacaru mwakuti ŵakuŵavya nyengo yakucitira sambiro la ŵeneko, yakulutira ku maungano, panji kupharazga. Nchakuwonekerathu kuti cifukwa cakuti ŵakusulako vinthu ivi, ŵakuwelera nyuma mwauzimu ndipo ubwezi wawo na Yehova ukunangika. Kweniso ŵakutaya cinthu cakuzirwa comene ico ni ubwezi wawo na awo ŵali nawo ‘lumoza mu cipulikano.’ (Gal. 6:10) Mwapacokopacoko ŵanji ŵakufumako ku ubali wa pa caru cose. Ghanaghaniranipo comene pa nkhani iyi.

Mulimo Withu ku Ŵakhristu Ŵanyithu

Pakuŵa ŵabali na ŵadumbu, tikuŵa na mipata yinandi yakulongolera citemwa kwa yumoza na munyake. (Rom. 13:8) Mu mpingo winu, mutepanji mukuwona ŵanji awo ‘ŵakulira ndipo ŵakupenja wovwiri.’ (Job 29:12) Ŵanji ŵangaŵa kuti ŵalije vinthu vyakukhumbikwa comene pa umoyo wawo. Mpositole Yohane wakayowoya za mpata uwo ukujulika para vinthu vili nthena. Wakati: “Uyo wali na vinthu vyakukhumbikwa pa umoyo mu caru cino, ndipo wakudodoliska mbali wake wakusoŵerwa, kweni wakumucitira cara ciwuravi, kasi wakumutemwa wuli Ciuta?”—1 Yoh. 3:17.

Mutepanji mwawovwirapo ŵanyake mwakuthupi. Kweni tikwenera kovwira ŵabali ŵithu mwakuthupi pera yayi. Ŵanji ŵangaŵa na suzgo la maghanoghano nga ni phukwa panji kugongoweskeka. Ŵanji ŵangaŵa kuti mbalwari comene, wakutemweka wawo wali kufwa, panji ŵakujiwona kuti mbambura kwenelera. Nthowa yimoza iyo tingaŵakhozgera nkhuŵategherezga na kuyowoya nawo. Para tingacita nthena tingaŵawovwira kuti ŵajipulike makora ndiposo kuti ŵakhozge ubwezi wawo na Yehova. (1 Tes. 5:14) Kanandi kucita nthena kukukhozga ubali withu wauzimu.

Ŵaliska ŵauzimu ndiwo ŵakwenera kuŵa panthazi kutegherezga, kupulikiska, ndiposo kupeleka ulongozgi wa mu Malemba. (Mil. 20:28) Para ŵalaŵiliri ŵakucita nthena, ŵakuyezga mpositole Paulosi uyo wakaŵa na “mtima wacitemwa” ku ŵabali na ŵadumbu ŵake ŵauzimu.—1 Tes. 2:7, 8.

Para Mkhristu wafumapo pa mskambo, wangamanya yayi masuzgo gha Ŵakhristu ŵanyake ndipo wangaŵawovwira yayi. Ŵalaŵiliri nawo ŵakuyezgeka na makhumbiro gha kutemwa vinthu vyakuthupi. Kweni wuli usange Mkhristu wathera ku ciyezgo ici?

 Kuzotofyeka na Vyenjezgo vya Umoyo

Apo tikuyezgayezga kupenja vinthu vyakukhumbikwa vya mbumba yithu kanandi tingenjerwa ndipo tingamba kuwona kuti vinthu vyauzimu ni vyakuzirwa pacoko. (Mat. 13:22) Marek wakati: “Bizinesi yane yikati yatondeka, nkhaghanaghana kuti nkhapenje nchito ya ndalama zinandi ku caru cinyake. Nkhafumangapo kwa myezi yitatu na kuwerako, pa nyumba nkhakhalangapo yayi. Muwoli wane wakasuzgikanga comene maghanoghano, cifukwa ca umo nkhacitiranga.”

Ni mbumba yake pera yayi iyo yikasuzgikanga. Marek wakatiso: “Padera pa kugwira nchito maora ghanandi pa malo ghakocha, nkhakhalanga na ŵanthu ŵa nkharo ziheni awo ŵakalyeranga ŵanyawo masuku pa mutu. Ŵakacitanga vinthu nga vigeŵenga. Nkhasuzgika maghanoghano ndipo ŵakanisuzganga comene. Nkhaŵavya nyengo ya kujipwelelera mwauzimu ndipo nkhamba kukayika usange ningafiska kuteŵetera ŵanji.”

Nkhani ya Marek iyi yikwenera kutovwira kuti tikhalenge dankha cete na kughanaghanira pambere tindasankhe cakucita. Nanga mungawona kuti kuluta ku caru cinyake kukapenja nchito kungamazga suzgo la ndalama, kweni kasi pangaŵaso masuzgo ghanyake yayi? Mwaciyelezgero, kasi umoyo wauzimu wa mbumba yinu uŵenge wuli ndipo yijipulikenge wuli? Para mungaluta ku caru cinyake, kasi mutalikiranenge na mpingo yayi? Kasi kucita nthena kumupokaninge mwaŵi wakuteŵetera Ŵakhristu ŵanyinu?—1 Tim. 3:2-5.

Nanga munthu wangaŵa mu caru cake wangatangwanika nipera na nchito yakulembeka. Wonani ivyo vikacitikira Jarosław na muwoli wake Beata. Jarosław wakati: “Pakwamba vyose vikaŵa makora waka. Tikati tatorana waka, tikamba kabizinesi kakuguliska masoseji. Pakuti tikasanganga ndalama zinandi tikaghanaghana za kusazgirako bizinesi yithu. Kweni tikatandalanga ku bizinesi mwakuti tikakhalanga ku maungano. Nyengo yicoko waka yikati yajumphapo nkhaleka upayiniya na uteŵeti wakovwira. Cifukwa ca ndalama izo tikasanganga, tikajura sitoro yikuru ndipo tikamba kucitira lumoza bizinesi na munthu wakuwaro kwa gulu. Mwaluŵiro nkhamba kwenda ku vyaru vinyake kukasanga misika ya ndalama zinandi. Nkhasangikanga viŵi yayi pa nyumba, ndipo nkhawonananga viŵi yayi na muwoli wane na mwana wane. Paumaliro, bizinesi yikatigoneska tulo twauzimu. Pakuti tikaleka kuwungana na mpingo, tikaghanaghanirangako yayi Ŵakhristu ŵanyithu.”

Kasi apa tikusambirapo vici? Cifukwa ca kukhumba kujipangira paradiso wayekha, Mkhristu wangamba kudemwera ndipo wangataya nanga ni “malaya ghake ghakuwaro” panji kuti Ukhristu wake. (Uvu. 16:15) Para vyaŵa nthena, titalikiranenge na ŵabali ŵithu awo pakwamba tikaŵawovwiranga.

Jisandani Mwakukwana

Taŵanji tingaghanaghana kuti, ‘Ivi vinganicitikira yayi.’ Kweni tose tikwenera kusanda makora ivyo tikukhumbikwira nadi pa umoyo. Paulosi wakati: “Tikizamo na kanthu cara mu caru, ndipo tingayegha kanthu cara pakufumamo. Ntheura, pakuŵa na vyakurya ndiposo vyakuvwara na nyumba, tiŵenge ŵakukhorwa na vinthu ivi.” (1 Tim. 6:7, 8) Mbunenesko kuti kakhaliro kakupambana. Ivyo ŵanji ŵangawona kuti ni vicoko mu vyaru visambazi, mu vyaru vinyake ungaŵa usambazi ukuru.

Kwali ndise ŵakavu panji ŵasambazi, tikwenera kukumbuka mazgu gha Paulosi ghakuti: “Awo ŵakukhumbisiska kuŵa ŵasambazi, ŵakuwa mu ciyezgo na cipingo ndiposo makhumbiro ghanandi ghauzeleza na ghakupweteka, agho ghakubizga ŵanthu mu pharanyiko na phasulo.” (1 Tim. 6:9) Cipingo cikuŵa pa malo ghakubisika. Cikupangika kuti cikolenge mwakubucizga. Kasi tingacita wuli kuti tileke kuwira mu cipingo ca ‘makhumbiro ghakupweteka’?

Para tikuŵika vinthu vyakuzirwa pa malo ghakwamba, tiŵenge na nyengo yinandi yakuteŵetera Yehova ndiposo yakusambilira patekha. Mkhristu uyo wakusambira na kulomba wakuŵa “wakukwana fikepo, wakunozgekera  nkhanira” kovwira ŵanji.—2 Tim. 2:15; 3:17.

Vilimika vikati vyajumphapo, ŵalara ŵakamovwira na kumukhozga Jarosław. Wakaciskika kusintha vinthu vinyake. Iyo wakati: “Nyengo yinyake apo tikadumbiskananga, ŵalara ŵakayowoya waka ciyelezgero ca mu Malemba ca muwukirano yunji musambazi uyo wakakhumbanga kuŵa na umoyo wamuyirayira kweni wakakhumba yayi kuleka vinthu vyakuthupi ivyo wakaŵa navyo. Pamanyuma ŵalara ŵakanifumba usange nkhani iyi yikunikhwaska. Fundo iyi yikanibenura ku maso.”—Zinth. 11:28; Mrk. 10:17-22.

Pamasinda Jarosław wakajisanda mwakukwana ndipo wakaleka bizinesi yikuru iyo wakacitanga na munyake. Mu vilimika viŵiri, iyo na mbumba yake ŵakacira mwauzimu. Sono ni mulara mu mpingo. Jarosław wakati: “Para ŵabali ŵakutangwanika comene na bizinesi kufika pa kusulako umoyo wawo wauzimu, nkhuŵaphalira ivyo vikanicitikira mwakuti niŵalongosolere uheni wa kukakika joko na ŵambura kugomezga. Nchipusu yayi kukana mwaŵi uwo ukusangika para wakakika joko na ŵambura kugomezga ndiposo kugega upusikizgi.”—2 Kor. 6:14.

Marek nayo wakavimyantha dankha kuti wasambirepo. Nangauli nchito ya malipiro ghawemi iyo wakagwiranga ku caru cinyake yikawovwiranga mbumba yake, kweni ubwezi wake na Ciuta ndiposo Ŵakhristu ŵanyake ukaŵa makora yayi. Pamanyuma wakasandaso ivyo wakeneranga kuŵika pakwamba. Marek wakati: “Mu vilimika ivyo vyajumpha ivyo nkhacitanga vikayana waka na Baruki uyo ‘wakajipenjeranga vikuru.’ Paumaliro, nkhakhutulira mtima wane kwa Yehova na kumuphalira ivyo nkhenjerwanga navyo, ndipo sono nkhuwona kuti nakhazikika mwauzimu.” (Yer. 45:1-5) Marek sono wakunwekera “mulimo uwemi” wa ulaŵiliri.—1 Tim. 3:1.

Pakucenjezga awo ŵakughanaghana kuluta ku caru cinyake kuti ŵakasange nchito ziwemi, Marek wakati: “Para uli ku caru cinyake, nchipusu comene kuwira mu vipingo vya mu caru ciheni ici. Munthu wakutondeka kudumbiskana na ŵanyake cifukwa ca ciyowoyero. Ungawera kukaya na ndalama zinandi, kweni ukuŵaso na vilonda vyauzimu ivyo pangatora nyengo yitali kuti vipore.”

Tikondweskenge Yehova para tikuwona nchito yakulembeka mwakwenelera ndiposo mulimo withu wa kuteŵetera Ŵakhristu ŵanyithu. Kucita nthena kungawovwira ŵanji kuti nawo ŵasankhenge vinthu mwamahara. Awo ŵazotofyeka ŵakukhumbikwira wovwiri, ciwuravi ndiposo kuti ŵabali na ŵadumbu ŵaŵalongore ciyelezgero ciwemi. Ŵalara mu mpingo na ŵabali ŵanyake ŵakukhoma mwauzimu, ŵangawovwira ŵanyawo kuti ŵacitenge vinthu mwakwenelera ndiposo kuti ŵaleke kusuŵilira na vyenjezgo vya umoyo.—Heb. 13:7.

Tileke kujowora Ŵakhristu ŵanyithu cifukwa ca kutangwanika na nchito yakulembeka. (Fil. 1:10) M’malo mwake, tiyeni tiŵe ‘ŵasambazi kwa Ciuta’ apo tikuŵika vinthu vya Ufumu pa malo ghakwamba.—Luka 12:21.

[Mazgu ghamusi]

[Vithuzithuzi pa peji 21]

Kasi nchito yikumutondeskani kuwungana?

[Vithuzithuzi pa peji 23]

Kasi mukuzirwiska mulimo wa kukhozga ŵabali na ŵadumbu?