Yecu Kricito Ada En Anga?

“Ka dong odonyo i Jerucalem ci gang ducu otugge woko pire, kun dano giwacci: ‘Man anga?’ Lwak gugamo ni: ‘Man aye lanebi Yecu ma oa ki i Najaret me Galilaya.’”​—MATAYO 21:10, 11.

PINGO donyo pa Yecu Kricito * i Jerucalem i mwaka 33 K.M. okelo tugge ma kit meno? Pol pa dano ma i gang onongo dong guwinyo pi Yecu kacel ki lanyut mapol ma en otimogi. Gumedde ki tito lok i kome bot jo mukene. (Jon 12:17-19) Ento, gin onongo pe gingeyo ni i kingi onongo tye laco mo ma lokke bigudo kwo pa dano i twok lobo-ni ducu pi cencwari mapol nio wa i kareni!

Tam kong i kom lanen mogo manok ma ginyutu kit ma lok pa Yecu ogudo kwede tekwaro pa dano pi kare malac.

▪ Kalenda ma kitiyo kwedgi i twok lobo mapol jenge i kom mwaka ma kitamo ni kinywalo iye Yecu.

▪ Dano ma romo bilion aryo kulu​—cokcok acel me adek pa dano ma i lobo-ni​—gilwonge ni gin Lukricitayo.

▪ Dini Cilam, ma tye ki lumemba ma cok kato bilion acel kulu i lobo-ni, pwonyo ni Yecu obedo “lanebi madit kato Abraim, Nua, ki Moses.”

▪ Lok mapol me ryeko ma Yecu owacogi, tye ginonge i lok ma dano giloko nino ducu. I kin lok me ryekone-ni mogo gitye ene:

‘Lok bene bote lemi tungcel.’​—MATAYO 5:39.

‘Wot kwede mairo mukene.’​—MATAYO 5:41.

‘Pe tye dano mo ma romo tic pi ludito tic aryo.’​—MATAYO 6:24.

‘Pe i bol kidi me wel i nyim opego.’​—MATAYO 7:6.

“Kit gin ducu ma wumito ni dano gutim botwu, wun bene wutim botgi kit meno.”​—MATAYO 7:12.

‘Kwan wel lim ma mitte.’​—LUKA 14:28.

Wangeyo labongo akalakala ni lok pa Yecu ogudo kwo pa dano mapol. Ento, inongo ni dano gitye ki tam ki niye mapat pat i kome. Pi meno, itwero penye kekeni ni, ‘Yecu Kricito ada en anga?’ Baibul keken aye tittiwa ka ma Yecu oa ki iye, kit ma en okwo kwede, ki dong gin mumiyo en oto. Ngeyo lok ada magi twero gudo kwoni​—i kareni ki dong i anyim.

[Lok ma tye piny]