TAANO ta nagresulta sa kariribokan an pag-abot ni Jesu-Cristo * sa Jerusalem kan aldaw na idto kan tigsoli kan 33 C.E.? Dakol sa siudad an nakabareta manongod ki Jesus asin sa pambihirang mga bagay na ginibo nia. Sinda padagos na nagsasabi sa iba manongod sa saiya. (Juan 12:17-19) Pero, dai aram kan mga tawo kaidto na sa tahaw ninda may sarong tawo na an impluwensia malakop sa bilog na kinaban asin malawig nin dakol na siglo sagkod sa panahon niato!

Estudyare an pirang halimbawa dapit sa kun gurano kalakop kan nagin impluwensia ni Jesus sa kasaysayan nin tawo.

• An kalendaryo na ginagamit sa dakol na parte kan kinaban nakabasar sa ipinapamugtak na taon na namundag si Jesus.

• Mga dos bilyones katawo—mga un-tersio kan populasyon kan kinaban—an nagsasabing Kristiano sinda.

• An Islam, na labing sarong bilyon an miembro sa bilog na kinaban, nagtotokdo na si Jesus “orog na dakulang propeta kisa ki Abraham, Noe, asin Moises.”

• Dakol sa madonong na mga sinabi ni Jesus an ginagamit sa manlaenlaen na paagi sa pang-aroaldaw na pananaram. Kaiba dian an mga minasunod:

  ‘Itao mo an sa ibong na pisngi mo.’—MATEO 5:39.

  ‘Umiba ka nin saro pang milya.’—MATEO 5:41.

  “Mayo nin siisay man na makakapaglingkod sa duwang kagurangnan.”—MATEO 6:24.

  ‘Dai mo iapon an saimong mga perlas sa atubangan nin mga orig.’—MATEO 7:6.

  ‘An gabos na boot mong gibohon sa saimo nin mga tawo, dapat man na gibohon mo sa sainda.’—MATEO 7:12.

  ‘Kuentahon mo an gastos.’—LUCAS 14:28.

Dai mapagdududahan an nagin impluwensia ni Jesus. Pero, dakol asin manlaenlaen an ideya saka paniniwala nin mga tawo manongod sa saiya. Huli kaini, tibaad maghapot ka, ‘Siisay man nanggad si Jesu-Cristo?’ An Biblia sana an nagsasabi sa sato kun saen hale si Jesus, kun paano sia namuhay, asin kun taano ta sia nagadan. An pakaaram sa mga katotoohan na iyan manongod sa saiya puedeng magkaigwa nin dakulang epekto sa saimong buhay—ngonyan asin sa puturo.