Bushe Yesu Kristu Nani?
Bushe Yesu Kristu Nani?
“Nomba ilyo aingile mu Yerusalemu, mu musumba onse mwakabile na se ku congo, ilyo abantu baletila: ‘Ngo yu muntu nani?’ Na mabumba ya bantu yalasosa ayati: ‘Uyu e kasesema Yesu, uwa ku Nasarete wa mu Galili!’”—MATEO 21:10, 11.
MULANDU nshi mu Yerusalemu mwabelele icongo ilyo Yesu Kristu * aingilemo pali bulya bushiku, mu mwaka wa 33 C.E.? Abengi muli ulya musumba balibashimikileko pali Yesu na pa fipesha amano ifyo acitile. Kabili balitwalilile ukushimikilako na bambi ifyo bamwene no kumfwa. (Yohane 12:17-19) Na lyo line, aba bantu tabaishibe ukuti ifyo umwaume wali pa kati kabo alecita ne fyo alesosa fyali no kukuma abantu mu calo conse ukufika fye na mu nshiku shesu!
Moneni ifya kumwenako fye ifinono ifilanga ukuti Yesu alikuma abantu ukufika na lelo.
▪ Abapangile kalenda iyo abantu babomfya mu fyalo ifingi bakonkele ubushiku batila e bo Yesu afyelwepo.
▪ Abantu abengi nga nshi, nalimo 2 bilioni, baita ukuti Bena Kristu.
▪ AbaShilamu, abacila pali 1 bilioni, basambilisha ukuti Yesu ni “kasesema mukalamba uwacila pali Abrahamu, Noa, na Mose.”
▪ Amashiwi ya mano ayengi ayo Yesu alandile yalishibikwa sana ica kuti na bantu abengi muno nshiku balayabomfya mu milandile yabo.
Ukwabula no kutwishika ifyo Yesu alecita ne fyo asosele fyalikuma abantu abengi pano calo. Na lyo line, ifyo abantu baishiba pali Yesu ne fyo basuminamo fyalipusanapusana. E ico kuti mwatontonkanya amuti, ‘Bushe Yesu Kristu nani?’ Ni Baibolo fye e itweba uko afumine, ifyo alecita, no mulandu afwilile. Nga mwaishiba ifi fishinka pali Yesu mukanonkelamo sana, pali ino nshita na ku ntanshi.
[Futunoti]
^ para. 3 Ishina lya kwa kasesema uyu uwa ku Nasarete ilya kuti “Yesu,” lipilibula ukuti “Yehova E Pusukilo.” Ishiwi lya kuti “Kristu” lilumbo ilipilibula ukuti “Uwasubwa,” icalola mu kuti Lesa alimusubile, nelyo ukumusala no kumupeela icifulo caibela.