Wesewesen Iö Ena Jises Kraist?

‘Iwe, lupwen Jises a tolong lon Jerusalem, unusen chon ewe telinimw ra mwökütüküt ren. Ra eis: “Iö ätewe?” Ekewe aramas ra pölüeni, “Iei i ewe soufos Jises seni Nasaret lon Kalilea!”’​—MATTU 21:10, 11.

PWATA ekkewe aramas ra fokkun akürang atun Jises Kraist * a tolong lon Jerusalem lon ewe ier 33? Chommong lon ewe telinimw ra rongorong usun Jises me ekkewe mettoch mi amwarar a föri. Iwe, ra apworausa ngeni ekkewe ekkoch. (Jon 12:17-19) Nge, ekkena aramas rese silei pwe ena mwän mi nom leir, an kapas me föfför epwe achüngü letipen aramas woon unusen fönüfan tori ei fansoun!

Nengeni ükükün än Jises achüngü letipen aramas loom tori ikenäi.

▪ Chommong aramas ra nönnöünöü ewe pwinin maram mi longolong woon ewe ier ra ekieki pwe ierin än Jises uputiw.

▪ Ruu billion som aramas are orun eü na aülüngätin chochoon chon fönüfan, ra apasa pwe iir Chon Kraist.

▪ Lap seni eü billion Chon Islam ra asukula pwe Jises “emön soufos mi lap seni Eperiam, Noa me Moses.”

▪ Aramas ra nönnöünöü lon ar fos chommong än Jises kewe mwuten kapas mi pwäratä tipatchem. Äwewe chök:

‘Okullu ngeni pwal ewe epek.’​—MATTU 5:39.

‘Esap wor emön a tongeni angang ngeni rüüemön samol.’​—MATTU 6:24.

‘Oupwe föri ngeni aramas usun minne oua mochen repwe föri ngenikemi.’​—MATTU 7:12.

‘Ngeni Sisar minne än Sisar.’​—MATTU 22:21.

‘Tongei chon orum usun chök pwisin en.’​—MATTU 22:39.

‘Pwapwaan liffang a lap seni pwapwaan angei.’​—FÖFÖR 20:35.

Ese wor tipemwaramwar pwe Jises a achüngü letipen aramas loom me ikenäi. Nge, a sokkopat ar ekiek me lükü usun i. Iwe, eli kopwe pwal ekieki, ‘Wesewesen iö ena Jises Kraist?’ Paipel chök a äiti ngenikich ia Jises a feito me ia, ifa usun manauan, me popun an mälo. Om silei ekkena pworaus epwe tongeni fokkun kküü manauom iei pwal lon mwach kkan.

[Pwóróus fan]