Zezi Kri​—Lekel li vreman?

“Kan Zezi ti antre Zerizalenm, lavil antye ti dan en gran leksitasyon. Zot ti demande, ‘Lekel sa?’ Lafoul ti reponn, ‘Sa se Zezi, profet ki sorti Nazaret Galile.’”​—MATYE 21:10, 11.

AKOZ dimoun ti sitan eksite kan Zezi Kri * ti antre Zerizalenm sa zour prentan lannen 33 N.L? Bokou dimoun dan sa lavil ti’n tann koz konsernan Zezi ek sa bann keksoz merveye ki i ti’n fer. Zot ti kontinyen koz avek lezot lo li. (Zan 12:17-19) Pourtan, sa ki sa bann dimoun pa ti konnen se ki sa zonm ki ti la parmi zot, ti pou annan en gran lenfliyans lo lemonn antye pour plizyer syek ziska dan nou letan!

Annou vwar serten fason dan listwar imen kot Zezi in annan en gran lenfliyans.

▪ Sa kalandriye ki laplipar landrwa dan lemonn i servi, i mars dapre sa lannen ki aparaman Zezi ti ne.

▪ Apepre de bilyon dimoun, preski en tyer popilasyon lemonn, i dir ki zot Kretyen.

▪ Larelizyon Islam ki annan plis ki en bilyon manm dan lemonn antye, i ansennyen ki Zezi i “en profet pli gran ki Abraam, Noe ek Moiz.”

▪ Bokou parol ki Zezi ti dir avek lasazes i ganny servi dan bann konversasyon tou le zour dan diferan form. Sa i serten parmi:

‘Les ou wi wi e ou non non.’​—MATYE 5:37.

‘Personn pa kapab servi de met.’​—MATYE 6:24.

‘Tape e laport i a ouver.’​—MATYE 7:7.

‘Fer pour lezot sa ki oule lezot i fer pour ou.’ ​—MATYE 7:12.

‘Rann Sezar sa ki pour Sezar.’​—MATYE 22:21.

‘Kontan ou prosen parey ou kontan ou prop lekor.’ ​—MATYE 22:39.

San dout Zezi in annan en gran lenfliyans dan listwar imen. Pourtan, dimoun i annan bann lide ek krwayans lo li ki vreman diferan avek kanmarad. Sa i kapab fer ki ou demann sa kestyon: ‘Lekel Zezi Kri?’ Zis Labib ki dir nou kote Zezi ti sorti, ki mannyer i ti viv e akoz i ti mor. Konn laverite lo li i kapab annan en profon lefe lo ou lavi ozordi ek dan le fitir.

[Not anba lo paz]