O Cei Sara Mada o Jisu Karisito?

“Ni yaco yani i Jerusalemi, era maue na lewenikoro ena nodra kaya: ‘O cei qo?’ Era kaya tiko yani na ilala levu: ‘Qo na parofita o Jisu mai Nasareci e Kalili!’”—MACIU 21:10, 11.

NA CAVA era maue kina na lewenivanua ni yaco yani o Jisu Karisito * e Jerusalemi ena vulaitubutubu ni 33 S.K.? E levu ena vanua oya era rogoca na kena itukutuku kei na veika vakatubuqoroqoro a vakayacora o Jisu. Era sega ni cegu na talanoataki koya. (Joni 12:17-19) Ia era sega ni liaca ni tu ena kedra maliwa e dua na turaga ena yaga raraba na ka e tukuna kei na ka e cakava ena veisenitiuri sa sivi me yacova mai nikua!

Meda raica mada eso na ivakaraitaki e tara kina na bula ni kawatamata na veika a tukuna qai cakava o Jisu.

▪ Na ivolanivula mada ga e vakayagataki ena levu na vanua e veiyasa i vuravura e yavutaki ena yabaki e nanumi ni a sucu kina o Jisu.

▪ E voleka ni le rua na bilioni nikua se rauta ni dua na ikatolu ni lewe i vuravura era tukuna nira lotu vaKarisito.

▪ Na lotu Musilimi e sivia na rua na bilioni na lewena e veiyasa i vuravura e vakavulica ni o Jisu e “parofita levu cake vei Eparama, Noa, kei Mosese.”

▪ Sa dau vakayagataki ena veivosaki ni veisiga eso na ivakavuvuli a cavuta o Jisu. Qo eso vei ira:

‘Kua ni veisausaumitaka na ca.’—MACIU 5:39.

‘Kua ni vakalelewa.’—MACIU 7:1.

“Sega ni dua e rawa ni qarava e rua na turaga.”—MACIU 6:24.

‘Kua ni biuta na mataniciva e mata ni vuaka.’—MACIU 7:6.

‘Na ka kece o vinakata mera cakava vei iko na tamata, mo cakava tale ga vei ira.’—MACIU 7:12.

‘Cakacakataka rawa na kena isau.’—LUKE 14:28.

Sa bau yaga dina ena bula ni kawatamata na veika a tukuna qai cakava o Jisu. Ia se duidui ga na nodra rai kei na ka era vakabauta e levu me baleti koya. O na rairai taroga, ‘O cei sara mada o Jisu Karisito?’ Na iVolatabu duadua ga e tukuna na vanua e lako mai kina o Jisu, na ka e cakava, kei na vuna e mate kina. Na noda kila na veika dina me baleti koya ena yaga vakalevu sara ena noda bula ena gauna qo kei na veigauna se bera mai.

[iVakamacala e ra]