Yezu Kristu Kele Mpenza Nani?
Yezu Kristu Kele Mpenza Nani?
“Ntangu Yesu kotaka na Yeruzalemi, bwala yonso kunikana. Bantu vandaka kuyula nde: ‘Muntu yai kele nani?’ Bantu yina vandaka ti Yesu vutulaka nde: ‘Yai kele profete Yesu; yandi kele muntu ya Nazareti na ntoto ya Galilea.’”—MATAYO 21:10, 11.
SAMBU na nki kukwisa ya Yezu Kristu * na Yeruzalemi na nsungi ya printemps ya mvu 33 T.B. kunikisaka bwala mpidina? Bantu mingi na mbanza kuwaka mambu ya metala Yezu mpi mambu ya kuyituka yina yandi salaka. Bo vandaka kusonga bantu yankaka mambu ya metala yandi. (Yoane 12:17-19) Ata mpidina, bantu fyoti na kati ya kibuka yina kuzabaka nde, na kati na bo kuvandaka ti muntu mosi yina zolaka kuvanda ti bupusi ya ngolo na ntoto ya mvimba mpi na nsungi ya bamvu-nkama mingi tii na bilumbu na beto!
Beto tadila mwa bambandu ya kemonisa bupusi ya ngolo yina Yezu kuvandaka ti yo na disolo ya luzingu ya bantu.
▪ Kalandrie yina bantu mingi kesadilaka na bisika mingi na nsi-ntoto, mesimbama na mvula yina bo keyindulaka nde Yezu kubutukaka.
▪ Bantu kiteso ya bamiliare zole—kana beto kabisa ntoto na bitini tatu—kekudibingaka Bakristu.
▪ Dibundu ya Bamizuluma, yina kele ti bansambidi kuluta miliare mosi na ntoto ya mvimba, kelongaka nde Yezu kele “profete ya nene kuluta Abrahami, Noa, mpi Moize.”
▪ Bangogo mingi ya mayele yina Yezu kutubaka, mekotaka na ntubidi ya konso kilumbu. Na kati ya bangogo yango beto lenda tanga:
‘Pesa ditama yankaka.’—MATAYO 5:39.
‘Kwenda na kilometre ya ngika.’—MATAYO 5:41.
“Ata muntu mosi ve lenda sadila bamfumu zole.”—MATAYO 6:24.
‘Beno losa ve mayaka na beno ya ntalu na ntwala ya bangulu.’—MATAYO 7:6.
‘Mambu yonso yina beno kezola nde bantu kusadila beno, beno fwete sadila bo mpi.’—MATAYO 7:12.
‘Yindula mbongo yina nge tabasisa.’—LUKA 14:28.
Ntembe kele ve nde, Yezu kuvandaka ti bupusi ya ngolo na disolo ya luzingu ya bantu. Kansi, bantu kele ti bangindu mpi balukwikilu ya kuswaswana na yina metala yandi. Yo yina, nge lenda kudiyula nde: ‘Yezu Kristu kele mpenza nani?’ Kaka Biblia mpamba kesongaka beto kisika Yezu kukatukaka, mutindu yandi zingaka, mpi kikuma yandi fwaka. Kuzaba bakyeleka yai ya metala yandi, lenda vanda ti bupusi ya ngolo na luzingu na nge—bubu yai mpi na makwisa.
[Noti na nsi ya lutiti]
^ par. 3 “Yezu,” zina ya profete yai ya Nazareti, ketendula “Yehowa Kele Luguluku.” Ngogo “Kristu” kele titre yina ketendula “Mupakulami,” disongidila nde Yezu kupakulamaka, to Nzambi kuponaka yandi sambu na kisalu mosi.