Mu Kidi Nanhi Jezú Kristu?

“Kia zubha kutula mu Jeluzaleme, mbonge ioso i salumuka, exi: ‘Nanhi muenhú?’ Kuala mundu, exi: ‘Muéne polofeta, Jezú mukua Nazalé ku Ngalileia!’” —MATESU 21:10, 11.

MUKONDA diahi kioso Jezú Kristu * kia bhixila mu Jeluzaleme mu thembu ia nvula ku muvu ua 33. K.K. athu a salumukine kiavulu? Athu avulu evu ia lungu ni Jezú, ni ima ia madiuanu ia bhangele. Ene akexile mu zuela ni akuâ ia lungu ni Jezú. (Nzuá 12:17-19) Kienhiki, o mundu ki ua tenene ku bhanga kima, mukonda ejidile kuila mu kaxi kâ bhua kexile diiala dia fuma, o maka enhá eji fumana ku mundu uoso, katé mu izuua ietu!

Xinganeka mu milongi ia Jezú iejiia ku mundu uoso.

▪ Saí jixi ku mundu ene ni kalendalu, ni muvu ua banze ene kuila, uene o muvu ua vuala Jezú.

▪ Mazunda a iiadi a athu—o mbandu ia katatu ka athu mu ngongo—a zuela kuila Jikidistá.

▪ O Islamismo ala mazunda a midi ndenge ia athu ku mundu uoso, a longa kuma Jezú, “o polofeta ia dikota, Mbalahamu, Noué, ni Mozé ndenge.”

▪ Jisabhu javulu ja tange Jezú, ene mu ji tumbula ku athu izuua ioso mu ukexilu uavulu. Kála o jisabhu jiji:

‘Mu lunguluile ni dia mukuá.’—MATESU 5:39.

‘Enda-nê lékua jiiadi.’—MATESU 5:41.

‘Kana muthu u tena ku bhikila ngana jiiadi.’ —MATESU 6:24.

‘Kana ku ji texila jingulu.’—MATESU 7:6.

‘ima ioso-phe i mua mesena kuila athu a mi bhanga-iu enu, iene ué i mua tokala kua bhanga ene.’—MATESU 7:12.

‘Xinganeka se uala ni kia soko.’—LUKA 14:28.

O milongi ia Jezú, ki i xisa phata ku athu. Né kiki, saí athu ala hanji ni phata ia lungu ni Jezú. Nange u mesena kuijiia, se mu kidi nanhi Jezú Kristu?’ O Bibidia iene ngó i tu tangela se kuebhi kua tundu Jezú, ukexilu uahi ua kexile nau, se mukonda diahi muéne uafú. O kuijiia o kidi kiki kia lungu ni muéne ki tena ku tu bhekela mabesá avulu—lelu ni ku hádia.

[Tanga mu luji]