Isua Krista Nihna Dik Tak Chu Eng Nge Ni?

“Jerusalem khuaa a lo luh chuan, akhuain, ‘He mi hi tunge ni?’ tiin an phu ta mur mur a. Tin, mipuiho chuan, ‘He mi hi Zâwlnei Isua, Galili rama Nazaret khuaa mi chu a ni,’ an ti a.”—MATTHAIA 21:10, 11.

ENGVANGIN nge C.E. 33 ṭhâl laia Isua Krista * Jerusalema a lo luhna chuan chuti khawpa mipui phu mur mura a siam? Khaw chhûnga mi tam takte chuan Isua chanchin leh a thiltih ropui tak takte chu an hre tawh a. A chanchin chu an lo inhrilh tawn nasa hle a ni. (Johana 12:17-19) Mahse, mipuite chuan an zîngah hian kum zabi tam tak a liam hnu kan tûn lai hun thlenga khawvêl hmun tina mite chunga nghawng nasa tak neitu tûr a awm a ni tih rêng an hre lo!

Isua’n mihring chanchina nghawng a neih thuizia târ langtu entîrna ṭhenkhat lo ngaihtuah ta ila.

▪ Khawvêl hmun tam taka hman tlânglâwn tak calendar hi Isua pian kum ni tûra ngaih hun ṭanchhana siam a ni.

▪ Mi tlûklehdingâwn hnih vêl—khawvêl mipui hmun thuma ṭhen hmun khat vêl—chu Kristian-ah an inchhâl a ni.

▪ Khawvêl puma member tlûklehdingâwn khat aia tam nei Islam sakhua chuan Isua chu “Abrahama te, Nova te, leh Mosia te aia zâwlnei ropui zâwk” niin a zirtîr a ni.

▪ Isua thusawi finthlâk tam takte chu kawng chi hrang hrangin, nî tin ṭawngkama hman a ni a. Chûngte zînga ṭhenkhat chu hêngte hi a ni:

‘I biang lehlam pawh dawh rawh.’—MATTHAIA 5:39.

‘Lâk aiin pêkin lukhâwng a nei zâwk.’ —TIRHKOHTE 20:35.

‘Tuman hotu pahnih rawng an bâwl kawp thei lo.’—MATTHAIA 6:24.

‘Vawk hmaah i tuikeplung paih suh.’ —MATTHAIA 7:6.

‘Thil engkim miin i chunga an tiha i duh tûr ang apiang chu mi chungah pawh ti ve rawh.’ —MATTHAIA 7:12.

‘Samari mi ṭha.’—LUKA 10:33.

Isua’n mite chunga nghawng a neihzia chu rinhlelh rual a ni lo va. Mahse, a chungchânga mite ngaih dân leh rin dân erawh chu a inang lo hle thung. Chuvângin, ‘Isua Krista nihna dik tak chu eng nge ni?’ tiin i ngaihtuah mai thei. Bible chauh hian Isua lo chhuahna te, a nun dân te, leh a thih chhante min hrilh a. Chûng thilte chungchânga thu dik hriatna chuan kan nun—tûnah leh nakin hun—atân nghawng thui tak a nei thei a ni. (w11-E 04/01)

[Footnote]