“Ko kyäjpndëjkëdë Jerusalen, nidëgekyë ja jäˈäy tmëjˈix tmëjjawëdë, es dyajtëwdë: ¿[Pënë] dëˈënë tyäˈädë? Ja jäˈäyëty jyënäˈändë: Yëˈë dëˈën ja Diosë kyugäjxpë, Jesus diˈibë kugäjpn Nasaret, Galileeë nyääxoty.” (MATEWɄ 21:10, 11)

KO Jesukristë * jyajty Jerusalén mä jëmëjt 33, ¿tiko ak yëˈë jäˈäy myaytyakëdë? Yëˈko të naty tmëdoyˈattë yajmaytyaˈaky ets mä wiˈix ttunyë mëjˈäjtën ets ak yëˈë natyë jäˈäy maytyäägëdijtëp (Fwank 12:17-19). Per ninuˈun tkawinmääytyë pënë Jesus mëj yˈitäˈäny nuˈun ja xëë tiempë tyuˈuyoˈoyaˈany. Ets ko tyukniˈˈijxënë wyäˈkxäˈäny abëtsemy nyaxwinyëdë ets jyäˈtäˈäny axtë mä ndiempëˈäjtëm.

Min nˈokˈijxëm tuˈuk majtskë ijxpajtën diˈib xytyukˈijxëm ko Jesus xëmë jäˈäy mëj yaˈityëty.

▪ Mä mayë it lugäär yëˈë jäˈäy yajtuundëbë kalendaaryë diˈib wyinmääytyëp yajmaytsyootsondaky ko Jesus myaxuˈunkˈäjty.

▪ Naa majtsk mil miyongënë jäˈäy diˈib naytyijëdëp kristianë.

▪ Islam, tuˈugë relijyonk diˈib tuk mil miyonk naxyë jyaˈay, tmëbëktë ko Jesus yëˈë “tuˈugë kugajpxy diˈib mas mëj ets kyaj dyuˈunëtyë Abrahán, Noé etsë Moisés”.

▪ Mä näägë it lugäär yajtuundëbë jäˈäyë ää ayuk diˈibë Jesus kyäjpx, extëmë tyäˈädë:

Kyaj tyimˈyëˈëyëtyë tsäjpkaagyë jäˈäy tnijukyˈaty (MATEWɄ 4:4).

Pën mgojxëp mä mˈagäˈänytsyoobë mˈamäˈätsy, koojëmbit ja tukˈaduˈum (MATEWɄ 5:39).

Këdii xyˈixy ti ja mmëguˈuk myëdäjtypy wyiinoty (MATEWɄ 7:3).

Tukmëdunë mmëguˈuk diˈib mtsojktëp ets mdukmëdunëdët (MATEWɄ 7:12).

Mmoˈoytyë ja yajkutujkpë diˈib jyaˈäjtypy (MATEWɄ 22:21).

Nipën kyatuny kugajpxy mä nyax kyäjpn (LUKɄS 4:24).

Extëm nˈijxëm, Jesus mëj yˈity nuˈun kujkë tiempë nyaxy. Per mayë jäˈäy wiˈixëm tmëbëktë ets wyinmaytyë mä pënën yëˈë. ¿Mnijawëyaampy pënën Jesusˈäjtp? Biiblyë yëˈë jeˈeyë tëyˈäjtën mëët nyimaytyakypy, mä tsyoˈony, wiˈix jyukyˈajty ets tiko yˈoˈky. Ko xynyijawët ja tëyˈäjtën mä pënën yëˈë, mbäät dyajtëgatsyë mjukyˈäjtën winë xëë winë tiempë.

[Notë diˈib noky ëxˈääy]