Ngubani Kwamambala UJesu Krestu?

“Kuthe bona uJesu angene ngeJerusalema, umuzi woke wavungazela. Abantu babuza bona: ‘Ungubani lo na?’ Isiqubuthu saphendula sathi: ‘Lo mporofidi uJesu weNazareda eseGaleliya.’”—MATEWU 21:10, 11.

KUBAYINI ukufika kwakaJesu Krestu * eJerusalema ngesilimela saka-33 C.E. kwabanga isiphithiphithi? Abanengi ngeemzini bebazwile ngoJesu nangezinto ezirarako azenzileko. Bebasolo batjela nabanye ngaye. (Jwanisi 12:17-19) Nokho, isiqubuthu besingazi bonyana hlangana naso bekukhona indoda ebeyizokuba nomthelela omkhulu ephasini loke amakhulu weemnyaka bekube sesikhathini sethu!

Cabangela iimbonelo ezimbalwa zendlela uJesu abe ngayo nomthelela emlandweni wesintu.

▪ I-almanaga eberegiswa eengcenyeni ezinengi zephasi isekelwe emnyakeni okucatjangwa bona uJesu wabelethwa ngawo.

▪ Abantu abangaba mabhiliyoni amabili—pheze ingcenye yesithathu yabantu abasephasini—bazibiza bona maKrestu.

▪ Ikolo yamaSulumane, enamalungu angaphezu kweengidi eziyikulungwane ephasini lonke, ifundisa bona uJesu “mporofidi omkhulu kuno-Abrahama, uNuwa noMosisi.”

▪ Iinkulumo ezinengi zakaJesu ezihlakaniphileko ziberegiswa ngeendlela ezihlukahlukeneko ekulumweni yangamalanga. Hlangana nazo kunananzi:

‘Mlise akuwahle newangesinceleni godu.’—MATEWU 5:39.

‘Mthwalele amakhilomitha amabili.’—MATEWU 5:41.

‘Akakho umuntu ongaba sigqila samakhosi amabili.’—MATEWU 6:24.

‘Ningaphoseli izavukazana okuligugu.’—MATEWU 7:6.

‘Yenzelani abanye lokho enifuna nani bona banenzele.’—MATEWU 7:12.

‘Hlala phasi ntangi ubone bonyana kuzakubiza malini.’—LUKA 14:28.

Akunakuzaza bona uJesu ube nomthelela emlandweni wesintu. Nokho, abantu baneembono neenkolelo ezihlukahlukeneko ngaye. Yeke, ungazibuza, ‘Ungubani kwamambala uJesu Krestu?’ IBhayibhili ngokwalo lisitjela bona uJesu wavelaphi, indlela aphila ngayo nokobana kubayini ahlongakala. Ukwazi amaqiniso layo ngaye kungaba nomthelela ekuphileni kwakho—gadesi nangomuso.

[Umtlolo waphasi]