Nwane A Le Gyisɛse Kelaese?
“Mɔɔ Gyisɛse dwule Gyɛlusalɛm la, suakpole ne azo kpudwule na bɛbizale kɛ, ‘Na nwane ɛne?’ Na menli dɔɔnwo ne zele kɛ, ‘Ɛhye a le Nyamenle kpɔmanvolɛ ne mɔɔ bɛfɛlɛ ye Gyisɛse, mɔɔ vi Nazalɛte mɔɔ wɔ Galeli la.’”—MATEYU 21:10, 11.
DUZU ati a mekɛ mɔɔ Gyisɛse Kelaese * hɔle Gyɛlusalɛm wɔ nyenyesuo ne anu wɔ 33 Y.M. la, Gyɛlusalɛm kpudwule ɛ? Ɛnee menli mɔɔ wɔ suakpole ne azo la anu dɔɔnwo ɛde Gyisɛse nee nwanwane gyima mɔɔ yeyɛ la anwo edwɛkɛ. Bɛhɔle zo bɛhanle ɔ nwo edwɛkɛ bɛhilele awie mɔ. (Dwɔn 12:17-19) Noko akee, ɛnee menli dɔɔnwo ne ɛnze kɛ sonla ne mɔɔ wɔ bɛ avinli la bayɛ sonla kpole na ɔ nwo edwɛkɛ adende ara yɛ mekɛ ye azo!
Maa yɛzuzu neazo ekyi mɔɔ fane duma mɔɔ Gyisɛse ɛlie ye wɔ alesama tetedwɛkɛ nu la anwo.
Kalenda mɔɔ menli dɔɔnwo fa di gyima wɔ ewiade ye ɛleka dɔɔnwo la gyi ɛvolɛ mɔɔ bɛsuzu kɛ bɛvale bɛwole Gyisɛse la azo.
Menli kɛyɛ mgbe mgbe nwiɔ—mɔɔ bɛbayɛ alesama anu nsa ɛkpɔ ko la—fɛlɛ bɛ nwo Keleseɛnema.
Ngɛnlamoma, mɔɔ bɛbo mgbe mgbe ko wɔ ewiade ye la, kilehile kɛ Gyisɛse le “ngapezonli kpole tɛla Ebileham, Nowa, nee Mosisi.”
Menli fa Gyisɛse nrɛlɛbɛ edwɛkɛ mɔɔ ɔhanle la anu dɔɔnwo bɛdi adwelie ɛnɛ wɔ ndenle ngakyile zo. Bie mɔ ɛne:
“Kakyi bɛne ne ɔdaye maa ye.”—MATEYU 5:39.
“Ɛ nee ye ɛhɔ [kilomita] nwiɔ.”—MATEYU 5:41.
“Awie biala ɛnrɛhola ɛnrɛzonle menlenlɛ nwiɔ.”—MATEYU 6:24.
“Bɛmmafa bɛ anwoneɛ bɛgua agbolike nyunlu.”—MATEYU 7:6.
“Mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ.”—MATEYU 7:12.
‘Sese ye bolɛ.’—LUKU 14:28.
Ɔda ali kɛ Gyisɛse ɛlie duma wɔ alesama tetedwɛkɛ nu. Noko, menli dɔɔnwo lɛ adwenle nee diedi ngakyile wɔ ɔ nwo. Ɛhye ati, bie a ɛbabiza kɛ, ‘Nwane bɔbɔ a le Gyisɛse Kelaese?’ Baebolo ne angome a ka ɛleka mɔɔ Gyisɛse vi, kɛzi ɔbɔle ye ɛbɛla nee deɛmɔti ɔwule la ɔkile yɛ a. Saa ɛnwu nɔhalɛ mɔɔ wɔ edwɛkɛ ɛhye mɔ anu la a, ɔbaboa wɔ kpole wɔ wɔ ɛbɛlabɔlɛ nu—ɛnɛ nee kenlebie.
^ ɛden. 3 “Gyisɛse,” ngapezonli ɛhye mɔɔ vi Nazalɛte la duma ne abo kile kɛ, “Gyihova Le Ngoanelielɛ.” Edwɛkɛkpɔkɛ “Kelaese” le amodinli na ɔ bo kile “Mɔɔ Bɛkpokpa Ye.” Ɛhye kile kɛ ɛnee bɛkpokpa Gyisɛse anzɛɛ Nyamenle vale ye ziele gyinlabelɛ titile bie.