ක්‍රිස්තු වර්ෂ 33දී යේසුස් ක්‍රිස්තුස් * යෙරුසලමට පැමිණි විට මුළු නුවරම කැලඹුණේ ඇයි? ඊට හේතුව යේසුස් බලවත් ක්‍රියා කරන බව එදා සිටි අය හොඳින් දැන සිටීමයි. ඒ නිසා යේසුස් ගැන කතා නොකළකෙනෙක් සිටියේ නැති තරම්. (යොහන් 12:17-19) නමුත් යේසුස් මිනිස් ඉතිහාසයේ නොමැකෙන චරිතයක් බවට පත් වෙයි කියා නම් ඔවුන් කිසිවිටකත් නොසිතන්න ඇති.

යේසුස් මිනිස් ඉතිහාසයේ සුප්‍රසිද්ධ චරිතයක් බව ඔප්පු වන සාක්ෂි:

• අප භාවිත කරන දිනදර්ශනය සකස් කර තිබෙන්නේ යේසුස් උපත ලැබුවායයි සිතන වර්ෂය පදනම් කරගෙනයි.

• ලෝක ජනගහනයෙන් තුනෙන් එකක් පමණ කියා සිටින්නේ තමන් යේසුස්ගේ අනුගාමිකයන් කියායි.

• ලොව පුරා සිටින බිලියන එකකට අධික ඉස්ලාම් භක්තිකයන් යේසුස්ව හඳුන්වන්නේ “ආබ්‍රහම්, නෝවා හා මෝසෙස්ට වඩා උතුම් අනාගතවක්තෘවරයෙක්” ලෙසයි.

• යේසුස් පැවසූ ඇතැම් දේවල් බොහෝ මිනිසුන් අතර ප්‍රසිද්ධ වී තිබෙනවා. මේ ඉන් කිහිපයක්:

  ‘ඔබේ එක් කම්මුලකට ගැසුවොත් ඔහුට අනික් කම්මුලත් හරවන්න.’—මතෙව් 5:39.

  ‘ඔබට සැතපුමක් යන්න අණ කළොත් සැතපුම් දෙකක් යන්න.’—මතෙව් 5:41.

  ‘ස්වාමිවරුන් දෙදෙනෙකුට දාසයෙක් වෙන්න කාටවත් බැහැ.’—මතෙව් 6:24.

  ‘ඌරන් ඉදිරියෙහි මුතු නොදමන්න.’—මතෙව් 7:6.

  ‘අනුන් ඔබට කරනවාට කැමති දේ ඔබත් ඔවුන්ට කරන්න.’—මතෙව් 7:12.

  ‘මුලින්ම වියදම ගණන් බලන්න.’—ලූක් 14:28.

යේසුස් මිනිස් ඉතිහාසයේ නොමැකෙන චරිතයක් බව ඒ සියල්ලෙන් මනාව පැහැදිලි වෙනවා. නමුත් බොහෝදෙනා යේසුස් ගැන එකිනෙකට වෙනස් අදහස් දරනවා. සමහරවිට ‘යේසුස් ඇත්තටම කවුද’ කියා ඔබත් කල්පනා කර ඇති. ඒ ප්‍රශ්නයට පිළිතුර තිබෙන්නේ බයිබලයෙයි. උදාහරණයකට යේසුස් පැමිණියේ කොහේ සිටද, ඔහු ජීවත් වුණේ කෙසේද හා ඔහුට මිය යෑමට සිදු වුණේ ඇයි කියා එහි සඳහන් වෙනවා. ඒ ගැන දැනගැනීමෙන් දැනුත් අනාගතයෙත් ප්‍රයෝජන රැසක් අත් කරගන්න ඔබට මඟ විවර වෙනවා.